ވެކްސިން ފުރިހަމަ ނުކުރާ ފަނޑިޔާރުންނަށް އަންނަ މަހުން ފެށިގެން ކޯޓުތަކަށް ނުކުމެވޭނީ ޕީސީއާރް ޓެސްޓް ހަދައިގެންކަން ޖުޑީޝަލް ސާވިސް ކޮމިޝަން (ޖޭއެސްސީ)ން އަންގައިފި އެވެ.
އެޗްޕީއޭން ވެކްސިންނާ ގުޅޭ ގޮތުން ހަދާފައިވާ އުސޫލުގައިވާ ގޮތުން ރާއްޖޭގައި ވަޒީފާ އަދާކުރާ ފަރާތްތަކުގެ ތެރެއިން ވެކެސިން ޖެހުމަށް ޝަރުތު ހަމަވާ ފަރާތްތަކުން ވެކެސިންގެ ޑޯޒްތައް ޖަހާފައިނުވާނަމަ، 1 ސެޕްޓެމްބަރުން ފެށިގެން ވަޒީފާއަށް ނުކުމެވޭނީ ކޮންމެ 14 ދުވަހަކުން ޕީސީއާރު ޓެސްޓް ހަދައިގެންނެވެ.
އެހެންވެ، ޖޭއެސްސީން ފަނޑިޔާރުންގެ މައްޗަށް ވެކްސިންނާ ގުޅޭ ސާކިއުލާއެއް ނެރުނީ އެ އުސޫލަށް ރިއާޔަތްކޮށެވެ.
ޖޭއެސްސީގެ ރައީސް ހިސާން ހުސެއިން ސޮއި ކުރައްވައި ނެރުއްވާފައިވާ ސާކިއުލާގައި ބުނީ ކޯޓުތަކުގެ ފަނޑިޔާރުންގެ ތެރެއިން ވެކްސިން ޖެހުމަށް ޝަރުތު ހަމަވާ ފަނޑިޔާރުން ވެކްސިން ޖެހުމަށް އަންގާ ކަމަށެވެ.
އަދި ވެކްސިން ޖެހުމަށް ޝަރުތު ފުރިހަމަވާ ފަނޑިޔާރުންގެ ތެރެއިން ވެކްސިންގެ އެއްވެސް ޑޯޒެއް ފުރިހަމަކޮށްފައި ނުވާ ފަނޑިޔާރުން އަންނަ މަހުން ފެށިގެން ކޮންމެ 14 ދުވަހަކުން ޕީސީއާރު ޓެސްޓް ހަދަން ޖެހޭނެ ކަމަށެވެ.
"އެގޮތުގެ މަތީން ފަނޑިޔާރުން އަމަލުކުރައްވާކަން މި ކޮމިޝަނުން ކަށަވަރުކުރަމުން ގެންދާނެ ވާހަކަ ވެސް ދެންނެވީން،" ޖޭއެސްސީގެ ސާކިއުލާގައިވެ އެވެ.
