މިވަގުތު މުޅި ދުނިޔޭގެ ލޯ ހުއްޓިފައިވާ އެއް ތަނަކީ އަފްގާނިސްތާނެވެ. ޓްވިޓާގައި މިފަހުން ވައިރަލްވި އެއް ޓްވީޓަކީ އަފްގާނިސްތާނުގައި މިނިސްޓަރުކަން ކުރެއްވި ސައިދް އަހްމަދު ޝާހް ސާދަތު ޖަރުމަނުގައި ޕިއްޒާ ޑެލިވަރީ ކުރާ ފޮޓޯ އެކެވެ.
ސައިދް އަހްމަދު ޝާހު އަކީ ކުރީގެ ރައީސް އަޝްރަފް ގަނީގެ ކެބިނެޓަށް 2018 ވަނަ އަހަރު އައްޔަނު ކުރެވުނު ކޮމިއުނިކޭޝަންސް އެންޑް އައިޓީ މިނިސްޓަރެވެ. ނަމަވެސް އޭގެ ދެ އަހަރުފަހުން 2020 ގައި އޭނާ ވަނީ ރައީސް އަޝްރަފް އާއި ޖެހުނު މައްސަލަތަކެއްގެ ސަބަބުން ކެބިނެޓުން އިސްތިއުފާ ދީފަ އެވެ.
ސައިދް އަހުމަދު ޝާހު މިނިސްޓަރުކަން ކުރެއްވި ދުވަސްވަރުގެ ފޮޓޯއެއް - ފޮޓޯ ޓްވިޓާ
އޭގެ ދުވަސްކޮޅެއް ފަހުން ސައިދް އަހުމަދު ވަނީ އަފްގާނިސްތާނު ދޫކޮށް ދިރިއުޅުން ޖަރުމަނުގެ ލައިޕްސިގް އަށް ބަދަލުކޮށްފަ އެވެ. ނޫސްވެރިއެއްކަމުގައިވާ ޖޯސާ މޭނިއާ ޝްލީގަލް ނަގާފައިވާ ފޮޓޯތަކުގައި ސައިދް ޝާހް ފެނިގެންދަނީ އޮރެންޖް ޓީޝާޓެއް ލައިގެން ޖަރުމަނުގެ މަގުތަކުގައި ބައިސްކަލެއްގައި ޕިއްޒާތައް ޑެލިވަރީ ކުރާ މަންޒަރެވެ. އަރަބި ސްކައި ނިއުސް އިން މިހާރުވަނީ މިއީ އަފްގާނިސްތާނުގެ ކުރީގެ މިނިސްޓަރުކަން ޔަގީންކޮށްދީފަ އެވެ.
އަފްގާނިސްތާނުގެ ކުރީގެ މިނިސްޓަރަކަށް ވުމުގެ އިތުރަށް ސައިދް ޝާހު އަކީ ކޮމިއުނިކޭޝަންސް އާއި އިލެކްޓްރޯނިކް އިންޖިނިއަރިންގެ ދާއިރާއިން ދެ މާސްޓާސް ޑިގްރީ ހާސިލްކޮށްފައިވާ މީހެކެވެ.
