ބެއިޖިން، ޗައިނާ (އޯގަސްޓު 30) - ޗައިނާގެ ވާދަވެރި ސްކޫލު ނިޒާމުގެ ސަބަބުން ދަރިވަރުންނާއި މައިންބަފައިންނަށް ކުރިމަތިވާ ޕްރެޝަރު ލުއިކުރުމުގެ ގޮތުން ގެންނަ އިސްލާހުތަކުގެ ދަށުން އުމުރުން ހަ އަހަރުގެ ކުދިންނަށް އިމްތިހާން ދިނުން މަނާކޮށްފި އެވެ.
ޗައިނާގެ ތައުލީމީ ނިޒާމު ބޮޑަށް ބިނާވެފައި އޮންނަނީ ކުދިން ހަދާ އިމްތިހާނުގެ ނަތީޖާއަށް ބެލުމަށް ފަހު ކުރިއެރުން ލިބޭ ގޮތަށެވެ. މީގެ ކުރިން އަމަލު ކުރަމުން ދިޔަ ގޮތުން ގްރޭޑް އެކަކުން ފެށިގެން ހުރިހާ ކުދިން ވެސް އިމްތިހާން ހަދަން ޖެހެ އެވެ.
ޗައިނާގެ ތައުލީމީ ނިޒާމު އެހާ ބޮޑަށް އިމްތިހާނުތަކާ ގުޅިފައި ވަނީ އުމުރުން 18 އަހަރުވުމުން ޔުނިވާސިޓީއަށް ޝަރުތު ހަމަވާ ކުދިން ހޮވުމަށް ހަދަން ޖެހޭ "ގާއޯކާއޯ" އިމްތިހާނުގެ ސަބަބުންނެވެ. ޅަ އުމުރުން ފެށިގެން ކުދިން ބޮޑުވަނީ އެ އިމްތިހާނަށް ތައްޔާރުވުމަށެވެ.
އެޑިއުކޭޝަން މިނިސްޓްރީން ހޯމަ ދުވަހު ނެރުނު އާ އުސޫލުގައި ބުނެފައި ވަނީ މާ ގިނައިން އިމްތިހާން ހަދަން ޖެހުމުން ކުދިންނަށް ބުރަވެ، ޕްރެޝަރު އިތުރުވާ ކަމަށެވެ. ޅަ އުމުރުން ފެށިގެން މާ ބޮޑަށް ވިސްނަން ޖެހުމުން ކުދިންގެ ނަފްސާނީ އަދި ޖިސްމާނީ ދުޅަހެޔޮ ކަމަށް އަސަރު ކުރާ ކަމަށް އުސޫލުގައި ވެ އެވެ.
އޭގެ އިތުރުން އެހެން ގްރޭޑްތަކުގެ ކުދިން ހަދަން ޖެހޭ އިމްތިހާނު ވެސް ބޭއްވޭނީ ޓާމަކު އެއް ފަހަރު ކަމަށާއި ޖޫނިއާ ހައި ސްކޫލުގައި މިޑްޓާމް އަދި މޮކް އިމްތިހާން ބޭއްވިދާނެ ކަމަށް އުސޫލުގައި ވެ އެވެ.
ޗައިނާ ސަރުކާރުން ދަނީ ތައުލީމީ ނިޒާމު އިސްލާހު ކުރުމަށް ބޮޑު ބަދަލުތަކެއް ގެންނަމުންނެވެ. އެގޮތުން މިދިޔަ ޖުލައި މަހުން ފެށިގެން ޓިއުޝަން ދޭ އަމިއްލަ ފަރާތްތަކުން ފައިދާ ހޯދުމުގެ ބޭނުމުގައި އެ މަސައްކަތް ނުކުރެވޭނެ ކަމަށް އެންގި އެވެ. އޭގެ އިތުރުން ހަފްތާ ބަންދާއި ޗުއްޓީ ދުވަސްތަކުގައި ޓިއުޝަން ދިނުން މަނާކުރި އެވެ.
ޓިއުޝަން ދޭ ކުންފުނިތަކުން ފައިދާ އަށް މަސައްކަތް ކުރުން މަނާކުރުމުގެ ބޭނުމަކީ ތައުލީމީ ނިޒާމުގައި ހަމަހަމަކަން ގާއިމްކުރުމެވެ. ބައެއް މައިންބަފައިން ދަނީ ކޮންމެ އަހަރަކު ވެސް ކުދިންގެ ޓިއުޝަން ފީ އަށް 15،400 ޑޮލަރަށް ވުރެ ގިނައިން ހޭދަކުރަމުންނެވެ. އެއީ ޗައިނާގެ އެންމެ ނަން މަޝްހޫރު ސްކޫލުތަކުން ޖާގަ ހޯދުމުގެ ބޭނުމުގަ އެވެ.
މިދިޔަ ހަފްތާގައި ސަރުކާރުން ޓީޗަރުންނަށް އަންގާފައި ވަނީ ވަޒީފާ އަދާ ކުރާ ސްކޫލް ކޮންމެ ހަ އަހަރަކުން ބަދަލު ކުރަން ޖެހޭނެ ކަމަށެވެ. އެއީ މަދު ސްކޫލުތަކެއްގައި އެންމެ ފެންވަރު ރަނގަޅު ޓީޗަރުން ތިބުމުން، އެ ސްކޫލުތަކަށް ކުދިން ގެންދަން ޑިމާންޑު ބޮޑު ވާތީ އެވެ.
އޭގެ އިތުރުން ކިޔެވުމަށް މޮޅު ކުދިންނަށް ހިންގާ ހާއްސަ "ޕްރަޔޯރިޓީ" ކްލާސްތައް ހުއްޓާލަން ވެސް ވަނީ އަންގާފަ އެވެ. ގްރޭޑް އެކެއް އަދި ދޭއްގައި އުޅޭ ކުދިންނަށް ދޭ ހޯމްވޯކްގައި ލިޔުމުގެ ބައި މަދު ކުރުމަށާއި ޖޫނިއާ ހައި ސްކޫލުގެ ދަރިވަރުންނަށް ދޭ ހޯމްވޯކަކީ ރެޔަކު 1.5 ގަޑިއިރަށް ވުރެ އިތުރު ނުވާ ވަރުގެ މަސައްކަތަށް ހެދުމަށް ވެސް ވަނީ އަންގާފަ އެވެ.
