ޕެރިސް (އޮގަސްޓް 30) - ފްރެންޗް ލީގުގައި މިރޭ ލިއޮނަލް މެސީ ޕީއެސްޖީ ޖޯޒީގައި ކުޅުނު ފުރަތަމަ މެޗުގައި އެ ޓީމުގެ ފްރާންސް ތަރި ކީލިއަން އެމްބާޕޭގެ ގޯލުތަކާ އެކު ރެއިމްސް އަތުން 2-0 އިން މޮޅުވެއްޖެ އެވެ.
ހިލޭ ޓްރާންސްފާއެއްގެ ދަށުން ބާސެލޯނާ ދޫކޮށް ޕީއެސްޖީއާ ގުޅުނު މެސީ ކުޅެން އެރީ ދެ ވަނަ ހާފްގައި ބަދަލު ކުޅުންތެރިއެއްގެ ގޮތުގަ އެވެ. މިއީ ސީނިއާ ކްލަބް ކެރިއަރުގައި ބާސެލޯނާ ނޫން ކްލަބެއްގެ ޖޯޒީގައި މެސީ މެޗެއްގެ ތެރެއިން ފެނުނު ފުރަތަމަ ފަހަރެވެ.
މި މެޗަކީ އެމްބާޕޭ، ޕީއެސްޖީ އަށް ކުޅުނު ފަހު މެޗަށް ވުމުގެ ފުރުސަތު އެބައޮތެވެ. އަންގާރަ ދުވަހު ޓްރާންސްފާ މާކެޓް ބަންދުވުމުގެ ކުރިން ރެއާލް މެޑްރިޑުން އަންނަނީ އެމްބާޕޭގެ ސޮއި ހޯދަން މަސައްކަތް ކުރަމުންނެވެ.
ރެއިމްސް ދަނޑުގައި ކުޅުނު މިރޭގެ މެޗު ފަށައިގެން 16 ވަނަ މިނިޓްގައި ޕީއެސްޖީން ލީޑުނެގި އެވެ. އެންހެލް ޑި މާރިއާ ނަގައިިދިން ހުރަހަކުން ޕީއެސްޖީގެ ގޯލު ޖެހީ އެމްބާޕޭ ބޮލުންނެވެ. އެ ބޯޅަ ހުއްޓުވަން ރެއިމްސްގެ ކީޕަރު ޕެޑްރަގް ރަޖްކޮވިޗަށް މާ ބޮޑު ކަމެއް ނުކުރެވުނެވެ.
ލަނޑު ޖެހުމަށް ފަހު އެމްބާޕޭ އާއި ހަކީމީ އުފާފާޅުކުރަނީ.-- ފޮޓޯ: އޭއެފްޕީ
ދެ ވަނަ ހާފްގެ ކުޅުން ފެށިގެން ހަ މިނިޓް ތެރޭ ރެއިމްސްގެ މާޝަލް މުނެޓްސީ ވަނީ ގޯލެއް ޖަހައި އެ ޓީމަށް އެއްވަރުކޮށްދީފަ އެވެ. އެކަމަކު ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު އެއީ ގޯލެއް ނޫން ކަމަށް ވަނީ ނިންމައިފަ އެވެ.
އެމްބާޕޭ، ޕީއެސްޖީގެ ދެ ވަނަ ގޯލު ޖެހީ މެޗުގެ 63 ވަނަ މިނިޓްގަ އެވެ. މިއީ އިދްރީސާ ގާނާ ގޭއި ކައުންޓައެޓޭކެއްގައި އަޝްރަފް ހަކީމީ އަށް ދިން ބޯޅައެއް ހިފައިގެން ގޮސް އޭނާ މުޅިން ހުސްކޮށްލާފައި ދިން ބޯޅަ އަކުން އެމްބާޕޭ ޖެހި ގޯލެކެވެ.
ޕީއެސްޖީން ދެ ގޯލުގެ ލީޑެއްނެގިތާ ދެ މިނިޓް ފަހުން ނޭމާގެ ބަދަލުގައި މެސީ ވަނީ ކުޅެން އަރުވައިފަ އެވެ. މެސީ ކުޅެން އެރި ފަހުން އޭނާ އަށް ފައުލުތަކެއް ކުރިއިރު، އޭނާ ވަނީ އެމްބާޕޭއާ ގުޅިގެން އެޓޭކްތަކެއް ކުރަން މަސައްކަތްކޮށްފަ އެވެ. އެކަމަކު، ޕީއެސްޖީ ޖޯޒީގައި ކުޅުނު ފުރަތަމަ މެޗުގައި ލަނޑެއް ޖެހޭތޯ ކުރި މަސައްކަތް މެސީ އަށް ކާމިޔާބެއްނުވި އެވެ.
މެޗަށް ފަހު ރެއިމްސްގެ ކުޅުންތެރިންނާއި އޮފިޝަލުންގެ އިތުރުން އެ ކްލަބްގެ އޮފިޝަލުންގެ އާއިލާ މެމްބަރުން ވަނީ ދަނޑުމަތީގައި މެސީއާ އެކު ފޮޓޯ ނަގައިފަ އެވެ.
މި ހަފްތާގެ މެޗުތަކަށް ފަހު ކްލަބް ފުޓްބޯޅަ މެދުކަނޑާލާނެ އެވެ. އެއީ ވޯލްޑް ކަޕް ކޮލިފައިން މެޗުތައް ކުޅޭށެވެ. ބްރޭކަށް ދާއިރު ޕީއެސްޖީ އެއް ވަނައިގައި އޮތީ ކުޅުނު ހަތަރު މެޗުން ވެސް މޮޅުވެ 12 ޕޮއިންޓާ އެކު އެވެ. ދެ ވަނައިގައި އޮތް އެންޖާސް އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ.
