ޕެރިސް، ފްރާންސް (އޯގަސްޓު 29) - ކޮވިޑާ ގުޅިގެން ފްރާންސްގައި ތަންފީޒު ކުރަމުންދާ "ހެލްތު ޕާސް" ނިޒާމާ މެދު ހިތްހަމަނުޖެހޭ 160،000 އަށް ވުރެ ގިނަ މީހުން މުޒާހަރާކޮށްފި އެވެ.
އިންޓީރިއާ މިނިސްޓްރީން ބުނީ މުޅި ފްރާންސްގައި ވަކިވަކިން 222 އެއްވުމެއް ބޭއްވި ކަމަށެވެ. ވެރިރަށް ޕެރިސްގައި އޮތް އެއްވުމަށް 14،500 މީހުން ޖަމާވި އެވެ.
ފުލުހުން ބުނީ އެއްވުންތަކުގައި ހަމަނުޖެހުން އުފެއްދި 16 މީހަކު ހައްޔަރު ކުރި ކަމަށެވެ. ހަމަނުޖެހުން ހިނގުމުން އަނިޔާވި ތިން ފުލުހަކަށެވެ.
މުޒާހަރާގެ ބައެއް ބައިވެރިންނަކީ ވެކްސިނާ ދެކޮޅު މީހުންނެވެ. އެގޮތުން ސްކޫލު ފެށުމުގެ ކުރިން ދަރިވަރުންނަށް ވެކްސިން ދޭން މަޖުބޫރު ވާތީ އެކަމާ ދެކޮޅަށް ހިޔާލު ފާޅުކުރި އެވެ.
މިދިޔަ ޖުލައި މަހުން ފެށިގެން އަމަލު ކުރަމުން އަންނަ "ކޮވިޑް ޕާސް" ނިޒާމުގެ ދަށުން ވެކްސިން ނުޖަހާ މީހުންނަށް ފްރާންސްގައި އާއްމު ދިރިއުޅުން ކުރިއަށް ގެންދަން ގިނަ ހުރަސްތަކާ ކުރިމަތިވެ އެވެ.
އެގޮތުން ރެސްޓޯރެންޓާއި ތިއޭޓަރު އަދި ސިނަމާ އަށް ވަނުމަށާއި، ރޭލުގައި ދަތުރު ކުރުމަށާއި ބޮޑެތި ޝޮޕިން ސެންޓަރުތަކަށް ވަނުމަށް ވެސް ވެކްސިން ޖެހިކަމުގެ ހެކި ނުވަތަ ކޮވިޑަށް ނެގެޓިވް ނަތީޖާއެއް ބޭނުންވެ އެވެ.
ސަރުކާރުން ބުނެފައި ވަނީ ހަތަރު ވަނަ ލޮކްޑައުނަކަށް ނުގޮސް ކޮވިޑް ކޮންޓްރޯލް ކުރެވޭނީ ވެކްސިން ޖަހަން މީހުންނަށް ބާރު އަޅައިގެން ކަމަށެވެ. މި ވަގުތު ކޮވިޑް ޖެހިގެން ހޮސްޕިޓަލުގައި އެޑްމިޓުކޮށްފައި ތިބި ގިނަ މީހުންނަކީ ވެކްސިން ނުޖަހާ މީހުންނެވެ.
ފާއިތުވި ހަތް ހަފްތާ ބަންދުގައި ވެސް މުޒާހަރާތައް ބާއްވާފައި ވާއިރު، ބައެއް އެއްވުންތަކުގައި 200،000 އަށް ވުރެ ގިނަ މީހުން ބައިވެރިވި އެވެ.
