ޓިއުރިން (އޮގަސްޓް 29) - އިޓާލިއަން ލީގުގައި ރޭ ޔުވެންޓަސް ކުޅުނު މެޗުން އަމިއްލަ ދަނޑުގައި އެމްޕޮލީ އަތުން 1-0 އިން ބަލިވެ، ލީގުގެ ފުރަތަމަ މޮޅު ހޯދަން ކުރަން ޖެހޭ އިންތިޒާރު ދިގުވެއްޖެ އެވެ.
މިދިޔަ ހަފްތާގައި އިޓާލިއަން ލީގު ފެށިއިރު، ޔުވެންޓަސް ކުޅުނު ފުރަތަމަ މެޗުން ވަނީ ރަށުންބޭރުގައި އުދިނޭޒީއާ 2-2 އިން އެއްވަރުވެފަ އެވެ. އެ މެޗަށް ފަހު ކްރިސްޓިއާނޯ ރޮނާލްޑޯ މިހާރު ވަނީ ޔުވެންޓަސް ދޫކޮށްލައިފަ އެވެ. ރޮނާލްޑޯ ދިޔަ ފަހުން ޔުވެންޓަސް ކުޅުނު ފުރަތަމަ މެޗުން ރޭ ބަލިވިއިރު، ލަނޑު ޖަހާނެ ފުރުސަތުތަކެއް ލިބި ބޭނުމެއް ނުކުރެވުނެވެ.
ޔުވެންޓަސް ދަނޑުގައި ރޭ ކުޅުނު މެޗުގައި އެމްޕޮލީގެ ގޯލު ޖެހީ 21 ވަނަ މިނިޓްގައި ލެއޮނާޑޯ މަންކޫސޯ އެވެ. އޭނާ އަކީ 18 މަސް ދުވަހު ޔުވެންޓަސްގައި ހުރި ނަމަވެސް ރަސްމީ މެޗެއް ކުޅުމުގެ ފުރުސަތު ނުލިބުނު ކުޅުންތެރިއެކެވެ. އޭނާ މި ގޯލު ޖެހީ ވޮލީ އަކުންނެވެ. މެޗުގައި ޔުވެންޓަސް އަށް ގޯލެއް ޖަހައިދޭން ފެޑެރީކޯ ކިއޭސާ، މެނުއަލް ލޮކަޓެލީ، ޕައޮލޯ ޑިބާލާ އަދި އަލްވާރޯ މޮރާޓޯ ކުރި މަސައްކަތްތައް ކާމިޔާބުވާ ގޮތެއް ނުވި އެވެ.
ރޭގެ މެޗަށް ފަހު ބޭއްވި ނޫސްވެރިންގެ ބައްދަލުވުމުގައި ޔުވެންޓަސްގެ ކޯޗު މެސިމޯ އަލެގްރީ އަށް ގިނަ ސުވާލުތައް އަމާޒުވީ ރޮނާލްޑޯއާ ބެހޭގޮތުންނެވެ. އަލެގްރީ ބުނީ ޓީމުގައި ނެތް ކުޅުންތެރިއެއްގެ ވާހަކަ ދެއްކުމުގެ މާނައެއް ނެތް ކަމަށެވެ.
"ރޮނާލްޑޯ ޔުވެންޓަސްގައި ތިން އަހަރު ހޭދަކުރި. އަހަންނާ އެކު އެއް އަހަރު މަސައްކަތްކުރި. އޭނާ އަކީ ވަރަށް މޮޅު ކުޅުންތެރިއެއް. ވަރަށް މުހިއްމު ގޯލުތަކެއް ވެސް ޖެހި ކުޅުންތެރިއެއް. އެކަމަކު، މިހާރު މި އޮތް ހާލަތުގައި ރޮނާލްޑޯގެ ވާހަކަ ދެއްކުން ރަނގަޅެއް ނޫން. އޭނާ މި ޓީމުގައެއް ނެތް،" އަލެގްރީ ބުންޏެވެ.
ލީގުގައި ރޭ ލާޒިއޯ އިން ފަހަތުން އަރައި 6-1 އިން ސްޕެޒިއާ ބަލިކޮށް ވަނީ އެއް ވަނަ އަށް އަރައިފަ އެވެ. އެއް ވަނައިގައި އޮތް ލާޒިއޯ އާއި ދެ ވަނައިގައި އޮތް އެންމެ ފަހުގެ ޗެމްޕިއަން އިންޓަ އަށް ވަނީ ދެ މެޗުން ހަ ޕޮއިންޓް ލިބިފަ އެވެ. ލާޒިއޯ ކުރީގައި އޮތީ ލަނޑުގެ ތަފާތުންނެވެ.
ރޭގެ މެޗުގައި ލާޒިއޯގެ ފޯވާޑް ޗީރޯ އިމޯބިލޭ ވަނީ ހެޓްރިކެއް ހަދައިފަ އެވެ. ދެން އެ ޓީމުގެ ގޯލުތައް ޖެހީ ފިލީޕޭ އެންޑަސަން، އެލްސެއިދް ހީސާ އަދި ލުއިޒް އަލްބާޓޯ އެވެ.
