ކްލަބް އީގަލްސްގެ މިޑްފީލްޑަރު އަދި ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑޭ) އަށް ގައުމީ ޓީމުން ފުރުސަތު ދިނީ އޭނާ ކުޅެމުން އަންނަ އީގަލްސްގެ ކޯޗު މުހައްމަދު ޝާޒްލީ (ޝާޒް)އާ މަޝްވަރާ ކުރުމަށް ފަހު ކަމަށް ގައުމީ ޓީމުގެ ކޯޗު އަލީ ސުޒޭން ބުނެފި އެވެ.
އަޑޭ، 34، ގައުމީ ޓީމަށް ނެގުމުން ގިނަ ބަޔަކު ސޯޝަލް މީޑިއާގައި އަންނަނީ އެ ނިންމުމަށް ފާޑުކިޔަމުންނެވެ. އެކަމާ ބެހޭގޮތުން މިއަދު ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގެ ތެރެއިން ސުޒޭން ބުނީ އަޑޭ ގައުމީ ސްކޮޑުގައި ހިމެނުން އެއީ ސޯޝަލް މީޑިއާގައި ވަރަށް ފާޑުކިޔާނެ ކަމެއް ކަމަށް ބެލެވުނު ކަމަށެވެ. އަދި ދެތިން ކުއްޖަކު އަޑޭ ޓީމުގައި ހުރުމުން ހިތްހަމަނުޖެހުން ފާޅުކޮށްފައި ހުރީ އެއީ އެ ކުދިންނަށް ކަންބޮޑުވުންތަކެއް ހުރި ކަމެއް ކަމަށް ވާތީ ކަމަށާއި އަސްލު އެކަން ކުރީ ކޯޗިން ޓީމާ މަޝްވަރާތަކެއް ކޮށްގެން ކަމަށް ސުޒޭން ވަނީ ބުނެފަ އެވެ.
"އަޑޭ އެންމެ ފަހުން ޓްރެއިން ކުރީ އީގަލްސްގައި ކަމަށްވެފައި އީގަލްސްގައި ހުރީ ޕްރޯ ކޯޗެއް. އީގަލްސްގެ ކޯޗާ (ޝާޒްއާ) މަޝްވަރާ ކުރުމަށް ފަހު އެ ކޯޗު ބުނީ އެ ޓީމުގައި އެންމެ ފިޓްނަސް ރަނގަޅަށް ވޯކްކުރި މީހަކީ އަޑޭ އޭ. އެހެންވީމަ އަޑޭ ހިމެނުމާ މެދު ޖެހިލުންވާންޖެހޭ އެއްވެސް ކަމެއް ނެތް ކަމަށް ހީކުރަނީ،" ސުޒޭން ބުންޏެވެ.
އޭޝިއަން ކަޕް ކޮލިފައިންގައި 2018 ވަނަ އަހަރުގެ މާޗް 27 ވަނަ ދުވަހުގެރޭ ބޫޓާނާ ދެކޮޅަށް ކުޅެން އޮތް މެޗު އޮއްވައި އަޑޭ ކުއްލިގޮތަކަށް ގައުމީ ޓީމުން ރިޓަޔާކުރިކަން އިއުލާނުކުރީ ޓްވީޓަކުންނެވެ. އޭނާ އޭރު ހުރީ ގައުމީ ޓީމުގެ ވައިސް ކެޕްޓަންގެ މަގާމުގަ އެވެ. އެ ފަހަރު އަޑޭ ކުއްލި ގޮތަކަށް ޓީމާ ވަކިވާން ނިންމީ އެ ވަގުތު ގައުމީ ކޯޗަކަށް ހުރި ޕީޓަ ސެގާޓާ މައްސަލަ ޖެހިގެންކަން އަޑުފެތުރުނެވެ.
ސުޒޭން ބުނީ އަޑޭ އަލުން ޓީމަށް ނެގިއިރު އޭނާގެ ރިޓަޔާމެންޓްގެ ކަންކަމާ މަޝްވަރާ ނުކުރެވޭ ކަމަށާއި ބެލީ މި ވަގުތު ތިބި ކްލަބްތަކުގެ ކޯޗުންނާ މަޝްވަރާ ކޮށްގެން އެންމެ ރަނގަޅު ޓީމެއް އެކުލަވާލެވޭތޯ ކަމަށެވެ.
"ކުރިން އަޅުގަނޑު ވެސް އަޑުއެހިން އަޑޭ ރިޓަޔާކުރި ވާހަކަ. އެކަމަކު މި ވަގުތު އަޅުގަނޑުމެން މި އޮތީ ގައުމީ މަސައްކަތެއްގައި. އެ އަށް ދާއިރުގައި އިންޑިވިޖުއަލް ކުޅުންތެރިން ނޫނީ ކޮންމެ ދިވެހި ކޯޗެއް ނޫނީ އޮފިޝަލެއްގެ ފަރާތުން އެއްބައިވަންތަކަން ދޭން އެދެނީ. އެ ގޮތަށް އަޑޭ ވެސް މީގެ ބައިވެރިކުރީ މަޝްވަރާ ކޮށްގެން،" ސުޒޭން ބުންޏެވެ.
ކްލަބް ގްރީން ސްޓްރީޓްސް އަށް 2018 ވަނަ އަހަރު ކުޅުމަށް ފަހު ސީރިއަސް އަނިޔާއެއްގައި ހުރި އަޑޭ އެ އަނިޔާއިން ރަނގަޅުވެ އީގަލްސްއާ ގުޅުނީ މިދިޔަ މާޗް މަހުގަ އެވެ. އެއީ އޭއެފްސީ ކަޕާ ދިމާކޮށެވެ. އޭނާ ކުޅުމަށް އެނބުރި އައީ ދޮޅު އަހަރެއްހާ ދުވަހު ކުޅުމާ ދުރުގައި ހުރެފަ އެވެ. މިދިޔަ އަހަރުގެ އޭއެފްސީ ކަޕާ ދިމާކޮށް އަޑޭ މާޒިޔާ އަށް ބަދަލުވާން އުޅޭ ކަމަށް ވެސް އަޑުފެތުރުނެވެ.
އީގަލްސް އަށް ބަދަލުވުމަށް ފަހު އަޑޭ ވަނީ މިދިޔަ ސީޒަނުގެ ދިވެހި ޕްރިމިއާ ލީގުގެ މެޗުތަކުގެ އިތުރުން އޭއެފްސީ ކަޕްގެ ކޮލިފައިންގައި އީގަލްސް އިން ބޫޓާންގެ ތިމްޕޫ ބަލިކުރި މެޗާއި ދާދި ފަހުން އީގަލްސް އިން އޭއެފްސީ ކަޕްގެ ޕްލޭއޮފްގައި ބެންގަލޫރު އަތުން ބަލިވި މެޗުގައި ކުޅެފަ އެވެ.
ގައުމީ ޓީމުން 2007 ވަނަ އަހަރު ޖާގަ ހޯދި އަޑޭ ވަނީ އެންމެ ފަހުން ގައުމީ ޖޯޒީގައި ކުޅުނު މެޗުގައި 2018 ވަނަ އަހަރު މާޗް މަހު ސިންގަޕޫރާ ދެކޮޅަށް ރާއްޖެ ކުޅުނު މެޗުގައި ކެޕްޓަންކަން ކޮށްފަ އެވެ.
ގައުމީ ޓީމުގެ ޕްރެކްޓިސް ފަށަން ނިންމާފައިވަނީ މިރޭ އެވެ. އޮކްޓޫބަރު މަހު ބާއްވާ ސާފް ޗެމްޕިއަންޝިޕްގެ ކުރިން ގައުމީ ޓީމުން އަންނަ މަހު 10 އިން 28 އަށް ގަތަރުގައި ޓްރެއިނިން ކޭމްޕެއް ފުރިހަމަކުރާނެ އެވެ.
