ސްޓެލްކޯގެ ޖަނަރޭޓަރުތަކުގެ ސަބަބުން ގެއްލުންވަމުންދާ އާއިލާތަކަށް ހައްލެއް ހޯދައިދިނުމުގެ ގޮތުން މާލެ އިން ނުވަތަ ހުޅުމާލެ އިން ގޯތި ދޫކުރަން މާލޭ ސިޓީ ކައުންސިލުން މިއަދު ނިންމައިފި އެވެ.
ސިޓީ ކައުންސިލުން އެގޮތަށް ނިންމާފައި މި ވަނީ މިއަދު އެ ކައުންސިލުން ބޭއްވި ބައްދަލުވުމަކަށްފަހު އެވެ. އަދި އެކަން ވަނީ މިހާރު ކުރިއަށްދާ ނޫސްވެރިންގެ ބައްދަލުވުމެއްގައި އިއުލާން ކޮށްފަ އެވެ.
ސްޓެލްކޯގެ ޖަނަރޭޓަރުތަކުން ގެއްލުން ވަނީ އެ ޖަނަރޭޓަރުތަކާ އެންމެ ކައިރި އަށް ހުންނަ ގ. ފެހިހިރި އާއި ގ. ރަސްރޯނު ހިމެނޭ ގޮތަށް ހުންނަ ފަސް ގެއަށެވެ.
ސްޓެލްކޯ ސަރަހައްދުގައި ދިރިއުޅޭ ރައްޔިތުންނަށް ބަދަލުގައި އެހެން ސަރަހައްދަކުން ގޯތި ދޭން ނިންމުމުން އެ ގެތަކުގެ މީހުން އިންސާފު ހޯދުމަށް އަހަރުތަކެއް ވަންދެން ކުރަމުންދިޔަ މަސައްކަތް ގާތްގަނޑަކަށް ނިމުމަށް އައީ އެވެ.
ކައުންސިލްގެ ނިންމުން އައިސްފައި މި ވަނީ ސްޓެލްކޯ ޖަނަރޭޓަރުތަކުން ނިކުންނަ އަޑާއި ވަހާއި ދުމުގެ ސަބަބުން އެ ސަރަހައްދުގައި ދިރިއުޅޭ މީހުންގެ އިންސާނީ ހައްގުތައް ގެއްލިފައިވާ ކަމަށް ހިއުމަން ރައިޓްސް ކޮމިޝަނުން ކަނޑައަޅައިފަ އޮއްވަ އެވެ.
ބަދަލުގައި އެހެން ސަރަހައްދަކުން ގޯތި ދޭން ނިންމާފައި މި ވަނީ އެ ސަރަހައްދުގައި ދިރިއުޅޭ ރައްޔިތުނަށް ހައްލެއް ހޯދައިދިނުމަށް އެ މައްސަލަ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވަނީ ހުށަހަޅުއްވާފައިވާ މައްސަލައިގެ މަސައްކަތް މަޖިލީހުގައި ކުރިއަށްދަނިކޮށެވެ.
ބަދަލުގައި ގޯތި ދޭން ނިންމި ފަސް ގެއަކީ ތީމުގޭ ބިއްދޮށުން މިހާރު ހައި ކޯޓު ކުރިމަތީގައި އޮންނަ ޕާކިން ލޮޓެވެ. ކުރިން އެ ގެއަށް ކިޔަނީ މ. ޝަބްނަމްގެ އެވެ. ފަހުން ސްޓެލްކޯ ސަރަހައްދަށް ގެ ބަދަލު ކުރުމަށްފަހު ގޯތި ފަސް ބަޔަށް ބައި ކުރީ އެވެ.
ޝަބްނަމްގެއިން އެ އާއިލާ ނިކުންނަން ޖެހުނީ ނޮވެމްބަރު ތިނެއްގެ ޓެރަރިސްޓު ހަމަލާއަށްފަހު ރައީސުލްޖުމްހޫރިއްޔާގެ ސަލާމަތީ ކަންކަން ވަރުގަދަކޮށް އެކަށީގެންވާ ސެކިއުރިޓީއަކާއެކު ތީމުގެ އެޅުމުގެ މަސައްކަތް ކުރަން ފެށުމުންނެވެ.
ތީމުގެ އިމާރާތް ކުރަން ފެށުމުން ދެ ބުރިއަށް ނަގާފައި ހުރި މ. ޝަބްނަމްގެ އަރި އަޅައިލި އެވެ. އަލުން އިމާރާތް ކުރަން އުޅުމުން ސަރުކާރުން ދިން ހިޔާލަކީ ގެ ރިލޮކޭޓް ކުރުމެވެ. ސްޓެލްކޯ ސަރަހައްދަށް އެ އާއިލާ ބަދަލު ކުރީ 1998 ވަނަ އަހަރެވެ.
