މާލޭ ސިޓީ ކައުންސިލްގެ އިހުތިސޯސްގެ ތެރޭގައި ގާނޫނުން ހުޅުމާލެ ހިމެނިފައިވީ ނަމަވެސް، އެތަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މިލްކިއްޔާތުގެ ދަށުގައި އޮންނާތީ، އުފެދިފައިވާ މައްސަލައަށް ވަރަށް އަވަހަށް ހައްލުތަކެއް ލިބިގެންދާނެ ކަމަށް ހުޅުމާލޭ ދާއިރާގެ މެމްބަރު އަލީ ނިޔާޒް މިއަދު ވިދާޅުވެއްޖެ އެވެ.
ގާނޫނުން ކައުންސިލުގެ މައްޗަށް މުނިސިޕަލް ހިދުމަތްތަކުގެ އިތުރުން ތަރައްގީގެ މަޝްރޫއުތައް ހިންގުމަށް ލާޒިމުކޮށްފައިވީ ނަމަވެސް، ހުޅުމާލޭގައި އެ ހިދުމަތްތަކާއި މަސައްކަތްތައް ކުރުމުގެ ފުރުސަތު ސަރުކާރުން ފަހިކޮށްދީފައިނުވާ ކަމުގެ ޝަކުވާ މާލޭ ސިޓީ ކައުންސިލުން ދަނީ ތަކުރާރުކޮށް ކުރަމުންނެވެ.
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނާއި އެ ގާނޫނުގެ މަގުސަދުތަކާ ތައާރަޒުވާ ގާނޫނުތައް އިސްލާހުކުރަން ސަރުކާރުން ފަށާފައިވާ މަސައްކަތުގެ ދަށުން، މަތިވެރި ދާއިރާގެ މެމްބަރު ހަސަން ޒަރީރު ބިމާބެހޭ ގާނޫނަށް ހުށަހަޅައިފައިވާ އިސްލާހުކުރުމުގެ ބިލުގެ އިބްތިދާއީ ބަހުސްގައި ވާހަކަ ދައްކަވަމުން އަލީ ނިޔާޒް ވިދާޅުވީ ހުޅުމާލޭ އިހުތިސޯސްގެ މައްސަލަ ހައްލުކުރަން ގާނޫނު ބަދަލުކޮށް ދިނުމަށް މޭޔަރު ޑރ. މުހައްމަދު މުއިއްޒު އެދިވަޑައިގެންފައިވާ ކަމަށެވެ.
ނަމަވެސް، ހުޅުމާލޭގައި މުނިސިޕަލް ހިދުމަތްތައް ދޭންޖެހޭނީ ސިޓީ ކައުންސިލުން ކަމަށް ގާނޫނުގައި ސާފުކޮށް ބަޔާންކޮށްފައިވާއިރު، އެކަމަށް ގާނޫނު އިސްލާހުކުރަންޖެހޭ ހިސާބަށް ގޮސްފައިވާކަމަށް ގަބޫލުނުކުރައްވާ ކަމަށެވެ.
އެގޮތުން، އެ މައްސަލައަށް އޭނާ ހުށަހެޅުއްވި ވަގުތީ ހައްލަކީ ރައްޔިތުންނަށް އެންމެ ކަމުދާ ހައްލު ނޫން ކަމުގައި ވިޔަސް، ސިޓީ ކައުންސިލުގައި ބަޖެޓު ނެތުމުން އެއީ މި ވަގުތަށް ނެރެވެން އޮތް ހައްލުކަމަށް އޭނާ ފާހަގަކުރެއްވި އެވެ.
"މުޅި މާލެ ސިޓީގައި މުނިސިޕަލް ހިދުމަތް ދިނުމަށް ސިޓީ ކައުންސިލުގެ ބަޖެޓުގައި އޮތީ 17 މިލިއަން ރުފިޔާ. އެކަމަކު ހަމައެކަނި ހުޅުމާލޭގައި އެ ހިދުމަތް ދިނުމަށް 70 މިލިއަން ރުފިޔާ އެބަ ބޭނުންވޭ،" އަލީ ނިޔާޒް ވިދާޅުވި އެވެ.
ބަޖެޓުގެ މައްސަލަ ހައްލުކުރަން، ސިޓީ ކައުންސިލުން އެދިފައިވަނީ މުނިސިޕަލް ހިދުމަތަށް އެޗްޑީސީގެ ބަޖެޓުގައި އޮތް ފައިސާ ދިނުމަށް ކަމަށް ވިޔަސް، އެކަމަށް އެކަށީގެންވާ ކުރިއެރުމެއް ލިބިފައިނުވާކަން އޭނާ ފާހަގަކުރެއްވި އެވެ.
އެހެންކަމުން، މި ވަގުތަށް އޮތް ހައްލަކީ، މިއަހަރުގެ ބާކީ އޮތް ތަނުގައި މުނިސިޕަލް ހިދުމަތްތައް ދިނުމަށް އެޗްޑީސީ އާއި ސިޓީ ކައުންސިލާ ދެމެދު އެއްބަސްވުމަކަށް ދިއުން ކަމަށް ވިދާޅުވި އެވެ.
"އެކަމަކު އެއީ ދާއިމީ ހައްލެއް ނޫން. ދާއިމީ ހައްލަކީ ދައުލަތުގެ ބަޖެޓުގައި ސިޓީ ކައުންސިލަށް ހުޅުމާލޭގައި މުނިސިޕަލް ހިދުމަތްތަކަށް ބަޖެޓު ޖެހުން. އަދި އެކަމަށް އަޅުގަނޑު މަސައްކަތްކޮށްދޭނަން،" އަލީ ނިޔާޒް ވިދާޅުވި އެވެ.
ހުޅުމާލޭ ދާއިރާގެ މެމްބަރު އަލީ ނިޔާޒް މަޖިލީހުގެ ޖަލްސާއެއްގައި ވާހަކަ ދައްކަވަނީ. -ފޮޓޯ: މަޖިލިސް
އޭނާ ވިދާޅުވި ގޮތުގައި، ސަރުކާރުގެ ވިސްނުމަކީ ވެސް ހުޅުމާލޭގައި އެ ހިދުމަތް ސިޓީ ކައުންސިލާ ހަވާލުކުރުން ކަމަށާއި، ނަމަވެސް، އެކަމަށް ބަޖެޓު ދިނުމުގެ މާނައަކީ އެޗްޑީސީގެ ވަސީލަތްތަކާއި މުވައްޒަފުން ކައުންސިލުން ބޭނުންކުރުމެއް ނޫނެވެ.
ހުޅުމާލޭގައި ދެމުންދާ މުނިސިޕަލް ހިދުމަތްތަކުގެ ޝަކުވާ މިހާރު ވެސް ރައްޔިތުން ކުރަމުންދިޔަ ނަމަވެސް، މިހާރަށް ވުރެ ފެންވަރު ދަށް ހިދުމަތެއް މުސްތަގުބަލުގައި ބޭނުންނުވާނެ ކަން ފާހަގަކުރައްވަމުން އަލީ ނިޔާޒް ވަނީ އެކަމަށް ތައްޔާރުވުމަށް ސިޓީ ކައުންސިލުގެ ކިބައިން އެދިވަޑައިގެންފަ އެވެ.
ހުޅުމާލޭގެ އިހުތިސޯސްގެ މައްސަލަ ހައްލުކުރަން ސަރުކާރާއެކު މިހާރު ވެސް މަޝްވަރާތައް ކުރެވެމުންދާ ކަމަށާއި، މި ހަފްތާގެ ތެރޭގައި އެކަމަށް ހައްލެއް ލިބިގެންދާނެކަން އަލީ ނިޔާޒް މިއަދު ހާމަކުރެއްވި އެވެ.
