ލަންޑަން (އޮގަސްޓް 24) - ފީފާ ވޯލްޑް ކަޕް ކޮލިފައިން މެޗުތައް އަންނަ މަހުގައި ކުޅެން ނިންމާފައިވާއިރު، އިނގިރޭސިވިލާތުން ދަތުރުފަތުރު ކުރުމުގައި ސަމާލުވާން ކަނޑައަޅާފައިވާ ރެޑް ލިސްޓުގައި އޮތް ގައުމުތަކަށް ކުޅޭ ކުޅުންތެރިން ރިލީސްނުކުރަން އިނގިރޭސި ޕްރިމިއާ ލީގުގެ ކްލަބްތަކުން ނިންމައިފި އެވެ.
ރެޑް ލިސްޓުގެ ގައުމުތަކަށް ކުޅުންތެރިން ދޫނުކުރަން ކްލަބްތަކުން ނިންމި އެންމެ ބޮޑު ސަބަބަކީ އެނބުރި އައިސް އެ ކުޅުންތެރިންނަށް ކްލަބްތަކާ ގުޅެވޭނީ 10 ދުވަހުގެ ކަރަންޓީނު މުއްދަތެއް ފުރިހަމަކުރުމަށް ފަހު ކަމަށްވާތީ އެވެ. ކޮވިޑް-19 ގެ ސަބަބުން ގައުމުތަކުގައި އަޅާފައިވާ އެކި ފިޔަވަޅުތަކަށް ދޫދޭން އެކި ގައުމުތަކުން ނިންމި ނަމަވެސް ކަރަންޓީނުވާން ޖެހޭ އުސޫލަށް ލުއިދެނީ ހަރުކަށި އުސޫލުތަކެއްގެ ތެރެއިންނެވެ.
އެ ގޮތުން ވޯލްޑް ކަޕް ކޮލިފައިން އަށް ދާ ކުޅުންތެރިންނަށް ކަރަންޓީނު އުސޫލުން ލުޔެއްދޭން އެއްބަސްނުވާތީ އެންމެ ފަހުން ޕްރިމިއާ ލިގުން ނިންމީ ކުޅުންތެރިން ރެޑް ލިސްޓްގެ ގައުމަކަށް ދޫނުކުރުމަށެވެ.
"ސަރުކާރާއި ފުޓްބޯޅަ އެސޯސިއޭޝަން އަދި ލީގު ބޯޑުން ބައްދަލުވެގެން ކުރި މަޝްވަރާތަކުގައި ކަރަންޓީނުގެ އުސޫލުތަކަށް ލުޔެއް ލިބޭގޮތެއް ނުވި. އެހެންވެ، ޕްރިމިއާ ލީގުގެ ހުރިހާ ކްލަބަކުން އިއްތިފާގުވެ ނިންމީ ރެޑް ލިސްޓްގެ ގައުމުތަކަށް ކުޅުންތެރިން ދޫނުކުރަން،" ޕްރިމިއާ ލީގުގެ އޮފިޝަލަކު ސްކައިސްޕޯޓްސް އަށް ބުންޏެވެ.
މިދިޔަ އަހަރު ފީފާ އިން ކަނޑައެޅި ވަގުތީ އުސޫލެއްގައިވަނީ ކޮވިޑްގެ ކަންކަން އޮތްގޮތުން އޭރުގެ ހާލަތަށް ބަަލައި ކްލަބްތަކުން ބޭނުންނުވާ ނަމަ ގައުމީ ޓީމަށް ކުޅުންތެރިން ރިލީސް ނުކުރުމުގެ އިހުތިޔާރު ދީފަ އެވެ. އެހެން ނަމަވެސް މިހާރު އެ އުސޫލަށް އަމަލުކުރުން ހުއްޓާލާން ނިންމާފައިވާއިރު، ކުރިއަށް އޮތް ގައުމީ ޓީމުތަކުގެ މެޗުތައް ކުޅެން ގައުމީ ޓީމަށް ކުޅުންތެރިން ދޫކުރަން ފީފާ އުސޫލުގެ ދަށުން ކްލަބްތަކަށް މަޖުބޫރުވާނެ އެވެ.
އިނގިރޭސިވިލާތުން ކަނޑައަޅާފައިވާ ރެޑް ލިސްޓުގައި އޮތް ގައުމުތަކުގެ ތެރެއިން ޕްރިިމިއާ ލީގުން އެންމެ ގިނަ ކުޅުންތެރިން ދާން އޮތް އެ ގައުމަކީ ބްރެޒިލް އެވެ. އަންނަ މަހު ދެކުނު އެމެރިކާގެ ކޮލިފައިންގައި ބްރެޒިލުން ތިން މެޗެއް ކުޅެން ޖެހޭނެ އެވެ. އެކަމަކު، މިހާރު އޮތްގޮތުން ބްރެޒިލުން އެ މެޗުތަކުގައި ކުޅޭނީ އިނގިރޭސި ޕްރިމިއާ ލީގުގެ ކްލަބްތަކަށް ކުޅޭ ކުޅުންތެރިން ނުލަ އެވެ.
ދެން ރެޑް ލިސްޓްގައި އެންމެ ގިނައީ އެފްރިކާ އާއި ދެކުނު އެމެރިކާގެ ގައުުމުތަކެވެ. އެފްރިކާގެ ގައުމުތަކުގެ ތެރޭގައި މިސްރު ހިމެނެ އެވެ.
