ނިއުޔޯކް، ޔުނައިޓެޑް ސްޓޭޓްސް (އޮގަސްޓް 24) - ދުނިޔޭގައި ބާއްވާ އެންމެ ވަރުގަދަ ހަތަރު ޓެނިސް މުބާރާތުގެ ތެރެއިން އެއް މުބާރާތް ކަމަށްވާ ޔޫއެސް އޯޕަން ޓެނިސް މުބާރާތުގެ ފައިސާގެ އިނާމް 57 މިލިއަން ޑޮލަރަށް އިތުރުކޮށްފި އެވެ.
އެކަމަކު, މި ފަހަރުގެ މުބާރާުތުގެ އަންހެން ސިންގަލްސް އަދި ފިިރިހެން ސިންގަލްސް ޗެމްޕިއަނަށް ލިބޭނީ ކުރިން ލިބޭ ވަރަށް ވުރެ މަދު އަދަދެކެވެ. ސަބަބަކީ ގިނަ ކުޅުންތެރިންނަށް ފައިސާގެ އިނާމް ލިބޭ ގޮތަށް އޮނިގަނޑަށް ގެނައި ބަދަލެވެ.
ކުރިން ޔޫއެސް އޯޕަންގެ ސިންގަލްސްގެ ކޮންމެ ކެޓަގަރީއެއްގެ ޗެމްޕިއަނުންނަށް ތިން މިލިއަން ޑޮލަރު ދެމުން އައި ނަމަވެސް މި ފަހަރު ދޭނީ ކެޓަގަރީ އަކަށް 2.5 މިލިއަން ޑޮލަރެވެ. އަދި ރަނަރަޕަށް 1.25 މިލިއަން ޑޮލަރު ދޭނެ އެވެ.
ޔޫއެސް އޯޕަން އަކީ ޓެނިހުގެ ބޮޑު މުބާރާތްތަކުގެ ތެެރެއިން އަންހެން އަދި ފިރިހެން ކެޓަގަރީ އަށް ހަމަހަމަކޮށް ފައިސާ ބަހާ މުބާރާތެކެވެ. މިއީ 2012 ވަނަ އަހަރަށް ފަހު ޔޫއެސް އޯޕަންގެ ޗެމްޕިއަނުންނަށް އެންމެ މަދުން ފައިސާ ލިބޭ ފަހަރެވެ. އެ ފަހަރު ސިންގަލްސް ކޮންމެ ޗެމްޕިއަނަކަށް 1.9 މިލިއަން ޑޮލަރު ލިބުނެވެ.
އެހެން އަހަރުތަކާ ހިލާފަށް މި ފަހަރުގެ ކޮލިފައިން ބުރަށް އެކަނި ވެސް އިނާމް ފައިސާގެ ގޮތުގައި ހަ މިލިއަން ޑޮލަރު ބަހާނެ އެވެ. މިއީ 2019 ވަނަ އަހަރުގެ މުބާރާތާ އަޅާކިޔާއިރު 66 ޕަސެންޓްގެ އިތުރުވުމެކެވެ. މިދިޔަ އަހަރު ކޮވިޑް-19 ތެރޭގައި ޔޫއެސް އޯޕަން ބޭއްވީ ކޮލިފައިން ބުރެއް ނުލައި މެއިން ޑްރޯއިން ފަށައިގެންނެވެ. އެއީ ހުއްދަ ލިބިފައި އޮތީ ވީހާވެސް މަދު ކުޅުންތެރިންތަކެއް ލައިގެން ކުރިއަށްދިއުމަށް ކަމަށްވާތީ އެވެ.
ކޮލިފައިން ނިމުމަށް ފަހު މުބާރާތުގެ ފުރަތަމަ ބުރުން މޮޅުވާ ކޮންމެ ކުޅުންތެރިއަކަށް އިނާމް ފައިސާގެ ގޮތުގައި 75000 ޑޮލަރު ލިބޭނެ އެވެ. މިއީ އެހެން އަހަރުތަކާ ބަލާއިރު 23 ޕަސެންޓްގެ އިތުރުވުމެކެވެ.
ޔޫއެސް އޯޕަންގެ ކޮލިފައިން މެޗުތައް މިއަދު ފަށާއިރު، މި ފަހަރުގެ މުބާރާތުގެ އެންމެ ބޮޑު ފޯކަސް އަކީ ފިރިހެން ސިންގަލްސް އެވެ.
ދުނިޔޭގެ ރޭންކިންގެ އެއް ވަނައިގައި އޮތް ނޮވަކް ޖޮކޮވިޗް މި ފަހަރުގެ ޔޫއެސް އޯޕަން ކާމިޔާބުކޮށްފިނަމަ ހާއްސަ ރެކޯޑްތަކެއް ހެދޭނެ އެވެ. އެ ގޮތުން ޓެނިހުގެ ގްރޭންޑް ސްލޭމް މުބާރާތްތަކުގެ ރެކޯޑް މުގުރާލުމުގެ ފުރުސަތު ޖޮކޮވިޗަށް އޮތްއިރު، މުޅި އަހަރުގެ ހުރިހާ ގްރޭންޑްސްލޭމް ތަށްޓެއް ހޯދަން ވެސް އޭނާ ހުރީ އަމާޒުހިފައިގެންނެވެ. ފިރިހެން ކުޅުންތެރިންގެ ތެރެއިން ޓެނިހުގެ ސީޒަނެއްގެ ހަތަރު ގްރޭންޑް ސްލޭމް އެންމެ ފަހުން ކާމިޔާބުކުރީ 1969 ވަނަ އަހަރު އޮސްޓްރޭލިއާގެ ކުރީގެ ކުޅުންތެރިޔާ ރޮޑް ލޭވާ އެވެ.
އަނިޔާގެ ސަބަބުން ރަފައެލް ނަޑާލާއި ރޮޖާ ފެޑެރާ މި ފަހަރުގެ ޔޫއެސް އޯޕަންގައި ނުކުޅޭނެ އެވެ.
