އެމްޑީޕީގެ އެތެރޭގެ އިންތިހާބުގައި ޔޫތު މިނިސްޓަރު އަހްމަދު މަހްލޫފަށް ފުރުސަތު ނުދޭން ނިންމާފައިވާ މައްސަލަ އިލެކްޝަންސް ކޮމިޝަނަށް އޭނާ މިއަދު ހުށަހަޅުއްވައިފި އެވެ.
އެމްޑީޕީގެ ދާއިރާތަކުގެ އިންތިހާބަށް ކުރިމަތިލީ ކެންޑިޑޭޓުންގެ ތެރެއިން ގައުމީ ހިންގާ ކޮމިޓީގެ ނިންމުމާ އެއްގޮތަށް ޝަރުތު ހަމަވާ މީހުންގެ ލިސްޓު އާއްމުކުރީ މަހްލޫފާއި ސްޓޭޓް މިނިސްޓަރު އަކްރަމް ކަމާލުއްދީންގެ ނަން އުނިކޮށްފަ އެވެ. އެކަމަކު ޝަކުވާ ކޮމިޓީއަށް ހުށަހެޅި މައްސަލަ ބަލައި އަކްރަމަށް ވަނީ ފުރުސަތު ދީފަ އެވެ.
މަހްލޫފް ވާދަކުރައްވަން ހުށަހެޅުއްވީ ކ، އއ. އދ. ވ ހިމެނޭ މެދު އުތުރު ޕްރޮވިންސަށެވެ. މަހުލޫފްގެ ނަން ލިސްޓުން އުނިކުރިއިރު ބޮޑެތި ކުށްތަކުގައި ތުހުމަތުވާ މީހުންނަށް، އެތެރޭގެ އިންތިހާބުގައި ވާދަ ނުކުރެވޭނެ ކަމަށް އެ ޕާޓީގެ ގައުމީ ހިންގާ ކޮމިޓީން އޮތީ ފާސްކޮށްފަ އެވެ.
އޭގެ ތެރޭގައި ރައީސް އިބްރާހިމް މުހައްމަދު ސޯލިހް އެކުލަވާލައްވާފައިވާ ކޮރަޕްޝަން އެންޑް އެސެޓް ރިކަވަރީ ކޮމިޝަނާއި މަރު ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިވާ ކަމަށް ތުހުމަތުކުރެވޭ ފަރާތްތަކަށް ވެސް އިންތިހާބުގައި ބައިވެރިއެއް ނުވެވޭނެ އެވެ.
އެގޮތުގެ މަތިން މަހުލޫފަށް ވާދަނުކުރެވޭނެ ކަމަށް އެމްޑީޕީން ނިންމިިއިރު، މަހުލޫފްގެ މައްޗަށް އެމްއެމްޕީއާރްސީގެ ކޮރަޕްޝަނާ ގުޅޭ މައްސަލައެއްގައި ދައުވާ ކުރުމަށް އެދި އެންޓި ކޮރަޕްޝަން ކޮމިޝަނުން ވަނީ ޕްރޮސިކިއުޓާ ޖެނަރަލްގެ އޮފީހަށް ފޮނުވާފަ އެވެ. އެ މައްސަލާގައި މަހުލޫފު ހުންނެވީ ވެސް ސަސްޕެންޑްކޮށްފަ އެވެ.
ނަމަވެސް، އެމްޑީޕީގެ ނިންމުން ބަލައެއްނުގަނެވެ. އެހެންވެ، އެ މައްސަލަ ރިވިއުކޮށްދޭން އެމްޑީޕީގެ ޝަކުވާ ކޮމިޓީއަށް ހުށަހަޅުއްވައިފަ އެވެ. މަހުލޫފު ދެކަވަޑައިގަންނަވާ ގޮތުގައި އެމްޑީޕީގެ ނިންމުމަކީ ޑިމޮކްރެޓިކް މުޖުތަމައުގައި އަމަލުކުރާ އުސޫލުތަކާ ހިލާފު ނިންމުމެކެވެ.
އެހެންވެ، އެކަމުގައި ހައްލެއް ހޯދައިދިނުމަށް އިލެކްޝަން ކޮމިޝަނަށް ވެސް އޭނާ ޝަކުވާ ހުށަހެޅުއްވީ އެވެ.
މަހްލޫފް ވިދާޅުވީ އޭނާ ހުށަހެޅި މައްސަލައަށް އެމްޑީޕީން ޖަވާބު ނުދޭއިރު އިންތިހާބަށް ވަގުތު ކުޑަތަންވެފައިވާ ކަމަށެވެ. އިލެކްޝަންސް ކޮމިޝަނަށް ޝަކުވާ ހުށަހެޅީ އެހެންވެ ކަމަށް ވިދާޅުވި އެވެ.
މަހުލޫފް ވިދާޅުވި ގޮތުގައި ސިޔާސީ ޕާޓީ އުފައްދައި، ހިންގައި، ޕާޓީތަކުގެ ހަރަކާތްތަކުގައި ބައިވެރިވުމުގެ ހައްގަކީ ދިވެހި ކޮންމެ ރައްޔިތަކަށްމެ ލިބިގެންވާ އަސާސީ ހައްގަކަށްވާއިރު، ޕާޓީތަކުގެ ހަރަކާތްތަކުގައި ބައިވެރިވުން ހަނިކުރެވެންވާނީ ސިޔާސީ ޕާޓީތަކުގެ ގާނުނުގައި ނުވަތަ އެ ޕާޓިއެއްގެ އަސާސީ ގަވާއިދުގައި ކަނޑައަޅާފައިވާ އުސޫލުތަކާއި ހަމަތަކުގެ ތެރެއިންނެވެ.
ނަމަވެސް، ޕާޓީގެ މަގާމަކަށް ވާދަކުރުމުގެ ހައްގު އޭނާގެ ކިބައިން ނިގުޅައިގެންފައި މިވަނީ ކަނޑައެޅިގެން ގާނޫނީ އުސޫލުތަކާ ހިލާފަށް ކަމަށް މަހުލޫފް ވިދާޅުވި އެވެ.
މަހުލޫފް ވިދާޅުވި ގޮތުގައި އެމްޑީޕީގެ އިންތިހާބުތަކާބެހޭ ގަވާއިދުގެ ބަލާއިރު އިންތިހާބަށް ކުރިމަތިލުމަށް އެދޭ މީހުންގެ ފުރިހަމަވާންޖެހޭ ޝަރުތުތައް އިންތިހާބެއް ބާއްވާކަން އެންގުމަށް ކުރާ އިއުލާނުގައި ހިމަނަންޖެެހެ އެވެ. ނަމަވެސް، އެމްޑީޕީގެ ދާއިރާތަކުގެ އިންތިހާބުގައި ވާދަކުރައްވާ ކެންޑިޑޭޓުން ކުރިމަތުލުމުގެ ފުރުސަތު ހުޅުވާލިކަން އެންގުމަށް ނެރުނު އިއުލާނުގައި ހިމަނާފައިނުވާ ޝަރުތުތަކެއް އިންތިހާބަށް އިއުލާންކުރި ފަހުން ނެރުނު އިއުލާނުގައި ވަނީ ހިމަނާފަ އެވެ.
"މިއީ, ކަނޑައެޅިގެން އެމްޑީޕީގެ އިންތިހާބުތަކާބެހޭ ގަވާއިދުގެ 11 ވަނަ މާއްދާއާ ހިލާފަށް ކޮށްފައިވާ ކަމެއް," މަހުލޫފް ރިވިއު ކުރަން އެދި ފޮނުވި ސިޓީގައި ވިދާޅުވެފައިވެ އެވެ.
އަދި ފަހުން އާ ޝަރުތުތަކަކާއެކު ނެރުނު އިއުލާނަކީ ގާނޫނީ ހަމަތަކާ އުސޫލުތަކާ ހިލާފު އިއުލާނެއް ކަމަށް ސިޓީގައިވެ އެވެ. އެއީ، އެމްޑީޕީގެ އިންތިހާބުތަކާބެހޭ ގަވާއިދުގައިވާ ގޮތުން އެތެރޭގެ އިންތިހާބުތަކުގައި ވާދަކުރުމަށް ކުރިމަތިލާ ފަރާތްތަކުގެ ޝަރުތު ކަނޑައެޅުމުގައި ބަލަންޖެހެނީ ގާނޫނު އަސާސީ އާއި ގާނޫނެއްގައި އެ މަގާމުތަކަށް ޝަރުތު ކަނޑައަޅާފައިވާނަމަ، އެޝަރުތަކަށް ކަމަށްވާތީ ކަމަށެވެ.
މަހުލޫފް ވިދާޅުވި ގޮތުގައި މަގާމުތަކަށް ޝަރުތު ކަނޑައާޅާނަމަ، އެމްޑީޕީގެ އަސާސީ ގަވާއިދުގައިވާ އިޖުރާއަތްތަކާ އެއްގޮތަށް އިންތިހާބުތަކާބެހޭ ގަވާއިދު އިސްލާހުކޮށް އެފަދަ ޝަރުތުތަށް އިންތިހާބަށް އިއުލާންކުރުމުގެ ކުރިން ކަނޑައަޅުމަކީ ޑިމޮކްރެޓިކް މުޖުތަމައުގައި އަމަލުކުރާ އުސޫލުތަކާ އެއްގޮތަށް އަމަލުކުރާނަމަ ކުރަންޖެހޭ ގޮތެވެ.
އަދި އެފަދަ ހާލަތެއްގައިވެސް ވަކި ބަޔަކު އިންތިހާބަށް ވާދަކުރުން މަހްރޫމު ކުރުމުގެ ނިޔަތުގައި ޝަރުތު ކަނޑައެޅުމަކީ ޑިމޮކްރަސީއާ ބީރައްޓެހިކަމެއް ކަމަށެވެ.
އަކްރަމްގެ މައްސަލަ ރިވިއު ކުރުމަށް އޭނާއަށް ވާދަކުރުމުގެ ފުރުސަތު ދޭން އެމްޑީޕީން ނިންމިއިރު އޭނާއަކީ މިހާރު ވެސް ގައުމީ މަޖިލީހުގައި މާލޭ ދާއިރާ ތަމްސީލުކުރާ މެންބަރެވެ. އެ ދާއިރާއަށް ދެން ވާދަ ކުރައްވަނީ މާލޭ ސިޓީގެ ކުރީގެ މޭޔަރު ޝިފާ މުހައްމަދެވެ.
