ސްޓެލްކޯގެ އިންޖީނުގެތަކުން ބޮޑެތި ގެއްލުންތަކެއް ލިބެމުންދާތީ އެ ސަރަހައްދުގައި ދިރިއުޅޭ ރައްޔިތުން އެހެން ސަރަހައްދަކަށް ބަދަލުވުމަށް މާލޭ ސިޓީ ކައުންސިލްގެ ފަރާތުން ފުރިހަމަ އެއްބާރުލުން ދޭނެ ކަމަށް އެ ކައުންސިލްގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓާޕްރައިސަސް (އެސްއޯއީ) ކޮމެޓީގައި މުއިއްޒު މިއަދު ވިދާޅުވީ ސްޓެލްކޯ ސަރަހައްދުގެ ރައްޔިތުން އެހެން ސަރަހައްދަކަށް ބަދަލު ކުރުމަކީ ކުރެވޭނެ މަސައްކަތެއް ކަމަށެވެ. އަދި އެކަން ކުރުމުގައި އެ ގެތަކުގެ ރައްޔިތުންނަށް ކައުންސިލުން އެހީވާނެ ކަމަށް އޭނާ ވިދާޅުވި އެވެ.
"އާދެ، ޝައްކެއް ނެތް. އެކަން ކުރެވޭނެ. އެކަމަކު ހުޅުމާލެއަށް ބަދަލު ކުރަންޏާ އޭގައި އިތުރު ކޮމްޕްލިކޭޝަނެއް އަތުވެދާނެ،" މުއިއްޒު ވިދާޅުވި އެވެ. "އަޅުގަނޑުމެން އެބޭފުޅުންގެ ހައްގުގައި، ސަރުކާރުގައި، ޕްލޭނިން މިނިސްޓްރީއަށް ނޫނީ ރައީސް އޮފީހަށް މިކަމުގައި ދިޔުމުގައި އަޅުގަނޑުމެންގެ ފުރިހަމަ އެއްބާރުލުން ލިބޭނެ."
އެ ގެތަކުގެ ރައްޔިތުންނަށް ފަސޭހަކޮށްދިނުމަށްޓަކައި، ޖަނަރޭޓަރު ބެހެއްޓުމަށް ސްޓެލްކޯ އިން ބަންދުކޮށްފައިވާ މަގުތައް އަލުން ހުޅުވުމަށް އެދުމުން އެކަން ކުރެވެން ނެތް ކަމަށް އަންގާފައިވާ ކަމަށް ވެސް މުއިއްޒު ވިދާޅުވި އެވެ.
"ސްޓެލްކޯއިން ޖަވާބު ދީފައި އެބަ އޮތް ތިމަންނަމެނަކަށް ތި އެދިލެއްވި ގޮތަކަށް ނެތޭ އެ ގޯޅިތައް ހުޅުވޭކަށް، ސިޓީއިން ޖަވާބު ދީފައި އެބަ އޮތް. އެއީ އެހެން ހަދައިފިއްޔާ މާލެއަށް ކަރަންޓު ދިނުމަށް ހުރަސްތަކެއް އެޅޭނެއޭ. އެހެންވެ އެކަން ކޮށްދެވެން ނެތް ވާހަކަ ދަންނަވަމޭ،" އޭނާ ވިދާޅުވި އެވެ.
އެކަމަކު މުއިއްޒު ގަބޫލު ކުރައްވަނީ އިންޖީނުތަކުން ރައްޔިތުންނަށް ގެއްލުންވުން ދާއިމީކޮށް ހުއްޓުވޭނީ ސްޓެލްކޯ މާލެއިން ބޭރަށް ބަދަލުކޮށްގެން ކަމަށެވެ.
"ތޮއްޖެހިފައި އޮތް މާލޭ ތެރޭގައި މިހާ ބޮޑު ބިމެއްގައި އެހާ މީހުންނަށް ސިއްހީ ގޮތުންނާއި ނަފްސާނީ ގޮތުން އުނދަގޫވާ ތަނެއް ހުރުމަށްވުރެ، މާލެއިން ބޭރަށް ތިލަފުއްޓަށް ނޫނީ އެހެން ތަނަކަށް ނަމަވެސް ބަދަލުވުމަކީ ލޯންގް ޓާމްގައި ހަގީގަތުގައި ޓެކްނިކަލީ އެންމެ ރަނގަޅު ގޮތް ކަމަށްވާނީ ސްޓެލްކޯ ރިލޮކޭޓްވުން،" މޭޔަރު ވިދާޅުވި އެވެ.
ނަމަވެސް މިހާރުން މިހާރަށް ވެސް ސްޓެލްކޯ ސަރަހައްދުގައި ދިރިއުޅޭ ރައްޔިތުން އެހެން ސަރަހައްދަކަށް ބަދަލު ކުރަންޖެހޭ ކަމަށް ވެސް މުއިއްޒު ވިދާޅުވި އެވެ.
"އެހެން ނޫނީ މި ވާ ގޮތަކީ ސްޓެލްކޯ އެކްސްޕޭންޑްވާ ވާންވީ ދެން ކައިރީގައި ހުރި ގެތައްވީ ރިލޮކޭޓް ވާން. ސްޓެލްކޯ މޫވްނުކޮށް ގެތައް ރިލޮކޭޓްވާންވިޔަސް ރައްޔިތުންނަށް އެބަޖެހޭ އެބޭފުޅުންގެ ދިރިއުޅުމުގެ އަސާސީ ހައްގު ކަށަވަރުވާން،" އޭނާ ވިދާޅުވި އެވެ.
ސްޓެލްކޯ ޖަނަރޭޓަރުތަކުގެ އަޑާއި، ދުމާއި ވަހުގެ ސަބަބުން ސިއްހީ، ނަފްސާނީ އަދި ޖިސްމާނީ ގެއްލުންވަމުންދާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ވެސް ވަނީ ބުނެފަ އެވެ. އަދި އެމީހުންގެ އަސާސީ ހައްގުތަކެއް ވެސް ގެއްލިފައިވާ ކަމަށް ކޮމިޝަނުން ބުނެ އެވެ.
