ހެއްކާ ބެހޭ ބިލް ރައްޔިތުންގެ މަޖިލީހަށް މި ހަފުތާގައި ފޮނުވަން، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ހުށަހަޅާނެ ކަމަށް ސަރުކާރުގެ ތަރުޖަމާނު މަބްރޫކް އަޒީޒް ވިދާޅުވެއްޖެ އެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި މަބްރޫކް ވިދާޅުވީ ހެއްކާ ބެހޭ ބިލުގެ މުހިންމުކަން ވަރަށް ބޮޑު ކަމަށާއި އޭގެ ސަބަބުން ޖިނާއީ އަދަލުގެ ނިޒާމަށް އިންގިލާބެއް އަންނާނެ ކަމަށެވެ.
"ހަގީގަތުގައި ޖިނާއީ އިޖުރާއަތުގެ ގާނޫނާއި ގާނޫނުލް އުގޫބާތް ފުރިހަމަ ވަނީ މި ބިލާ އެކީގައި. މީގެ ސަބަބުން ހެކި ހޯދާ ގޮތާއި ބޭނުންކުރާ ގޮތާއި ބާޑަން އޮފް ޕްރޫފް ސާފުކޮށް ކަނޑައެޅިގެން ބަޔާންކޮށްދޭނެ ބިލެއް،" އޭނާ ވިދާޅުވި އެވެ.
އެ ބިލު ވުޖޫދަށް އައުމުން ހެކި ހޯދުމާ ގުޅޭ ހުރިހާ ކަމެއް އެއް ގާނޫނަކުން ފެންނާނެ ކަމަށް މަބްރޫކް ވިދާޅުވި އެވެ.
"ރާއްޖޭގައި މިހާތަނަށް އައިއިރު ހެކި ހޯދުމާއި ހެކި ބޭނުން ކުރާ ގޮތާއި ހެކި ބޭނުންކޮށްގެން [ކުށް] ސާބިތުކޮށްދޭ ގޮތް އެއް ގާނޫނެއްގެ ދަށަށް ގެނެވިފައެއް ނެތް. އެކި އެކި ގާނޫނުގެ އެކި މާއްދާތައް ބޭނުންކޮށްގެން އެ މަސައްކަތް ކުރެވިގެން އަންނަނީ،" އޭނާ ވިދާޅުވި އެވެ.
ހެއްކާ ބެހޭ އާ ގާނޫނު ހިނގާނެ ދާއިރާ
- އެންމެހައި ކޯޓުތަކުގައި ހިނގާ މަދަނީ އަދި ޖިނާއީ މައްސަލަތަކުގެ މައްޗަށް
- އެންމެހައި ޓްރައިބިއުނަލްތަކުގައި ހިނގާ މައްސަލަތަކުގެ މައްޗަށް
- ކަމާގުޅޭ ނިސްބަތަށް، ކަމެއް ތަހުގީގުކޮށް ފިޔަވަޅު އެޅުމުގެ ބާރު ލިބިގެންވާ ދައުލަތުގެ އިދާރާތަކުން
- ތަހުގީގުކުރާ ނުވަތަ ފިޔަވަޅު އަޅާ މައްސަލަތަކުގެ މައްޗަށް
- ކަމާގުޅޭ ނިސްބަތަށް، ދައުލަތުގެ އިދާރާއަކުން ތައުދީބީ ފިޔަވަޅު އެޅުމުގެ ބާރު އޮވެގެން ބަލާ މައްސަލަތަކުގެ މައްޗަށް
ބިލްގައި ހެކީގެ ތިން ބާވަތެއް ވެސް ކަނޑައަޅާފައިވެ އެވެ. އެއީ، ޝަފަހީ ހެކި, ކިތާބީ ހެކި އަދި މާއްދީ ގޮތުން ގުޅުން ހެއްކެވެ.
ހެއްކާ ބެހޭ ބިލްގެ އިތުރުން މަބްރޫކް ވަނީ މިހާރު ވެސް ސަރުކާރުން މަޖިލީހަށް ހުށަހަޅާފައިވާ ބައެއް ބިލްތަކުގެ ވާހަކަ ދައްކަވައިފަ އެވެ. އެގޮތުން ފަޅުރަށްތަކާ ބެހޭ ބިލަކީ ލާމަރުކަޒީކޮށް ގައުމު ހިންގަން ލިބޭނެ ވަރަށް ބޮޑު ބާރެއްގެ ގޮތުގައި އޭނާ ފާހަގަ ކުރެއްވި އެވެ.
"މިއީ މުހިންމު އެއް ބިލް މި ދައުރުގައި ހުށަހެޅޭ. ތިބޭފުޅުންނަށް އެނގިވަޑައިގަންނަވާނެ ޒަމާނުއްސުރެ މާލޭގައި މިނިސްޓްރީތަކުގައި އޮންނަ ބާރުވެރިކަމުގެ އިތުރުން ރަށްރަށުގެ ކައުންސިލްތަކަށް ވެސް އިހުތިސާސްގައި ހިމެނޭ މި ފަޅުރަށްތައް ބޭނުން ކުރުމުގެ އޮނިގަނޑުތައް ކަނޑައަޅައިދޭ ބިލެއް މި ބިލަކީ،" މަބްރޫކް ވިދާޅުވި އެވެ.
"މި ބިލުގެ ސަބަބުން އެ ބޭފުޅުންނަށް އެ ބާރުތައް ލިބި، ލާމަރުކަޒީ ރާއްޖެއެއް ހިންގުމަށް އަޅުގަނޑުމެން މި ކުރާ މަސައްކަތަށް އިތުރު ފުރިހަމަކަމެއް މި ބިލުގެ ސަބަބުން ގެނެސްދޭނެ."
ހެއްކާ ބެހޭ ގާނޫނެއް ވުޖޫދަށް ގެނައުމަށް މީގެ ކުރިން ވެސް އެކި ސަރުކާރުތަކުން ވަރަށް ބޮޑަށް މަސައްކަތް ކުރި އެވެ. މިހާރު މި އަމަލު ކުރަމުންދާ ފެހި ގާނޫނު އަސާސީއަށް އަމަލު ކުރަން ފެށުމާއެކު ފުލުސް އޮފިސަރުންގެ ހެކި ބަހުން ނުވަތަ އިއުތިރާފް ބަޔާނުން ކުށް ސާބިތު ކުރުން ނިމުމަކަށް އައުމުން ހެއްކާ ބެހޭ ގާނޫނެއްގެ މުހިންމުކަން އޮތީ އިންތިހާއަށް ބޮޑުވެފަ އެވެ.
