ލަންޑަން (އޮގަސްޓް 22) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑް ކުޅުނު މެޗުން 1-1 އިން ސައުތެމްޓަނާ އެއްވަރުވިއިރު، ރޮމެލޫ ލުކާކޫގެ ގޯލާ އެކު ޗެލްސީން 2-0 އިން އާސެނަލް ބަލިކޮށްފި އެވެ.
މިއީ ޗެލްސީ އަށް ދެ ވަނަ ފަހަރަށް ސޮއިކުރުމަށް ފަހު ލުކާކޫ އެ ޓީމަށް ކުޅެދިން ފުރަތަމަ މެޗެވެ. ޗެލްސީން މި ފަހަރު ލުކާކޫގެ ސޮއި ހޯދީ އެ ކްލަބްގެ އެންމެ އަގުބޮޑު ކުޅުންތެރިޔާގެ ގޮތުގައި އިންޓަ މިލާނަށް 98 މިލިއަން ޕައުންޑް (135 މިލިއަން ޑޮލަރު)ގެ ޓްރާންސްފާ ފީއެއް ދެއްކުމަށް ފަހު އެވެ. ޗެލްސީ އަށް ފުރަތަމަ ކުޅުނުއިރު ލުކާކޫ އެ ޓީމަށް ގޯލެއް ނުޖަހަ އެވެ. އެކަމަކު އެނބުރި އައި ފުރަތަމަ މެޗުގައި މި ވަނީ ގޯލު ޖަހައިފަ އެވެ.
އާސެނަލުން މި ފަހަރު ލީގުގައި ކުޅުނު ފުރަތަމަ މެޗުގައި އަލަށް ޕްރޮމޯޓްވި ބްރެންޓްފޯޑް އަތުން ބަލިވުމުން މިރޭގެ މެޗަށް ނުކުމެ ރަނގަޅު ކުޅުމެއް ދައްކާނެ ކަމަށް ބެލެވުނު ނަމަވެސް އެ ޓީމުގެ ޑިފެންސް ދަށް ވުމުގެ ފައިދާ ޗެލްސީން ވަނި ނަގައިފަ އެވެ. މެޗުގެ 15 ވަނަ މިނިޓްގައި ލުކާކޫ ޗެލްސީ އަށް ލީޑުނަގައިދިނީ ރީސް ޖޭމްސް މުޅިން ހުސްކޮށްލާފައި ދިން ބޯޅައަކުންނެވެ. މެޗުގެ 35 ވަނަ މިނިޓްގައި މޭސަން މައުންޓް ދިން ބޯޅައަކުން ޖޭމްސް ވަނީ ޗެލްސީގެ ލީޑުފުޅާކޮށްދީފަ އެވެ.
ދެ ވަނަ ހާފްގައި އާސެނަލަށް ލަނޑެއް ޖަހައިދޭން ރޮބް ހޯލްޑިން ބޮލުން ޖެހި ބޯޅަ ގޯލާ ސީދާވާ ގޮތެއްނުވި އެވެ. ބަދަލު ކުޅުންތެރިއެއްގެ ގޮތުގައި މި ހާފްގައި އާސެނަލްގެ ކެޕްޓަން ޕިއޭ އެމެރިކް އޮބާމަޔަން ވަނީ ކުޅެން އަރައިފަ އެވެ. މިދިޔަ ހަފްތާގައި ކޮވިޑް-19 އަށް ޕޮޒިޓިވްވެފައިވާތީ ނުކުޅެވުނު އޮބާމަޔަން މިރޭ ކުޅެން އެރިތާ އިރުކޮޅެއް ފަހުން ޖެހި ބޯޅަ އަމާޒުވީ ޗެލްސީ ކީޕަރު އެޑޮއާޑް މެންޑީ އަތަށެވެ.
ޗެލްސީ އަށް ތިން ވަނަ ގޯލެއް ޖަަހައިދޭން މެޗުގެ 74 ވަނަ މިނިޓްގައި ލުކާކޫ ބޮލުން ފޮނުވާލި ބޯޅަ އާސެނަލް ކީޕަރު ބާން ލެނޯ ވަނީ މަތަކޮށްފަ އެވެ. އޭގެ ފަހުން ލުކާކޫ ދިން ބޯޅައަކުން ކައި ހަވާޓްޒް ޖެހި ޝޮޓް ވެސް ލެނޯ ވަނީ ހުއްޓުވައިފަ އެެވެ.
މިދިޔަ ސީޒަނުގައި އާސެނަލްގެ ކޯޗު މިކޭލް އާޓެޓާ ވަނީ ދެ ފަހަރު ވެސް ޗެލްސީ ބަލިކޮށްފަ އެވެ. ޑިސެމްބަރު މަހު އާސެނަލް ދަނޑުގައި އެ ޓީމު މޮޅުވިއިރު، ޗެލްސީ ކޯޗަކަށް ހުރީ ފްރޭންކް ލަމްޕާޑް އެވެ. އަދި މެއި މަހު ޗެލްސީ ދަނޑުގައި އާސެނަލް މޮޅުވިއިރު، ޗެލްސީގެ ކޯޗަކަށް ހުރީ މިހާރު ވެސް އެ މަގާމުގައި ހުރި ތޯމަސް ޓުޗެލް އެވެ. އެކަމަކު، މިރޭ ބަލިވުމުން އާޓެޓާ އަށް އާސެނަލްގެ ކޯޗުގެ މަގާމުގައި ދެމިހުރުމަށް އޮތް ޕްރެޝަރު ވަނީ ބޮޑުވެފަ އެވެ.
ސައުތެމްޓަން ހަތަރު ކުޅުންތެރިން ކައިރިން ޔުނައިޓެޑްގެ ޕޮގްބާ (މ) ބޯޅަ ހިފައިގެންދަނީ.-- ފޮޓޯ: އޭއެފްޕީ
ސައުތެމްޓަން ދަނޑުގައި ކުޅުނު މެޗުގައި އެ ޓީމުން ޔުނައިޓެޑް ކައިރިން ލީޑުނެގީ 30 ވަނަ މިނިޓްގަ އެވެ. މިއީ ޗޭ އެޑަމްސް ޖެހި ބޯޅައެއް ޔުނައިޓެޑްގެ ފްރެޑް ފައިގައި ޖެހިފައި ބައިކޮޅަށް ވަން ގޯލެކެވެ. ދެ ވަނަ ހާފުގައި ޔުނައިޓެޑަށް އެއްވަރުކޮށްދިނީ ޕައުލް ޕޮގްބާ ދިން ބޯޅައަކުން މޭސަން ގްރީންވުޑް އެވެ. ޔުނައިޓެޑް މޮޅުކޮށްދޭން ގްރީންވުޑް ބޮލުން ޖެހި ބޯޅަ ގޯލާ ސީދާނުވި އެވެ.
މެޗުން މޮޅުވާން އެންމެ ހުސް ފުރުސަތުތަކެއް ލިބުނީ ސައުތެމްޓަން އަށެވެ. އެޑަމް އާމްސްޓްރޯންގަށް ލިބުނު ހުސް ފުރުސަތުން އޭނާ ޖެހި ބޯޅަ ޔުނައިޓެޑްގެ ކީޕަރު ޑޭވިޑް ޑެެހެއާ ވަނީ މަތަކޮށްފަ އެވެ.
ޓޮޓެންހަމްގެ ކޯޗު ނޫނޯ އެސްޕިރީޓޯ ސަންޓޯ ވަނީ އޭނާގެ ކުރީގެ ކްލަބް ވުލްވްސްގެ ދަނޑުގައި ޓޮޓެންހަމަށް މޮޅެއް ހޯދައިދީފަ އެވެ. ޑެލެ އަލީ ފުރަތަަމަ ހާފުގައި ޖެހި ޕެނަލްޓީން ވުލްވްސް މޮޅުވީ 1-0 އިންނެވެ. މި މެޗުގެ ދެ ވަނަ ހާފްގައި ޓޮޓެންހަމް އިން ވަނީ ހެރީ ކޭން ކުޅެން އަރުވައިފަ އެވެ. މިއީ ކްލަބް ދޫކޮށްލަން ބޭނުންވާކަން އިއުލާނުކުރި ފަހުން ކޭން އެ ޓީމަށް ކުޅެދިން ފުރަތަމަ މެޗެވެ. ކޭން ހޯދަން އެންމެ ބޮޑަށް މަސައްކަތްކުރަނީ މެންޗެސްޓާ ސިޓީންނެވެ.
އިނގިރޭސި ޕްރިމިއާ ލީގުގެ ފުރަތަމަ ދެ ހަފްތާގެ ކުޅުން ނިމުނުއިރު، ދެ މެޗުން ވެސް މޮޅުވެފައި އޮތީ ހަތަރު ޓީމެކެވެ. އެއީ ޗެލްސީ އާއި ލިވަޕޫލްގެ އިތުރުން ބްރައިޓަން އާއި ޓޮޓެންހަމް އެވެ. އަންނަ ހަފްތާގައި ޗެލްސީ ކުޅޭނީ ލިވަޕޫލާ ދެކޮޅަށެވެ.
