ކުރީގެ އިސްލާމިކް މިނިސްޓަރު ޑރ. އަހުމަދު ޒިޔާދުގެ މައްޗަށް އުފުލާފައިވާ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާގެ ޝަރީއަތް ކުރިއަށް އޮތް ދެ މަސް ތެރޭ ނިންމުމަށް އަމާޒު ހިފައިފި އެވެ.
މި މައްސަލައަކީ މިދިޔަ އަހަރުގެ ސެޕްޓެމްބަރު މަހުގެ ތެރޭ ކުރިމިނަލް ކޯޓަށް ހުށަހެޅި މައްސަލައެކެވެ. ނަމަވެސް، މިހާތަނަށް ޝަރީއަތުގެ މަރުހަލާ ވެސް ފެށިފައިނުވެ އެވެ. އަދި، މައްސަލަ ބެއްލެވުމާ މިހާތަނަށް ތިން ގާޒީއަކު ވަނީ ހަވާލުވެވަޑައިގެންފަ އެވެ.
އެންމެ ފުރަތަމަ މައްސަލަ ބެއްލެވުމާ ހަވާލުވެވަޑައިގެންނެވީ ގާޒީ އަލީ އާދަމެވެ. އޭނާއަށްފަހު ޒިޔާދުގެ މައްސަލަ ބެއްލެވުމާ ގާޒީ މުހައްމަދު ސަމީރު ހަވާލުވެވަޑައިގެންނެވި އެވެ. ނަމަވެސް، ގާޒީ ސަމީރު ވަނީ އަމިއްލައަށް އެދިވަޑައިގެން ޑްރަގު ކޯޓަށް ބަދަލުވެވަޑައިގެންފަ އެވެ.
މިހާރު މައްސަލަ ބެއްލެވުމާ ހަވާލުވެވަޑައިގެންފައިވަނީ ގާޒީ މުހައްމަދު މިސްބާހެވެ. އެގޮތުން، މައްސަލާގައި ގާޒީ މިސްބާހު މިއަދު ވަނީ ފުރަތަމަ އަޑުއެހުން ބާއްވާފަ އެވެ. އަޑުއެހުންތައް ފެއްޓެވީ ކުރިން ގޮސްފައިވާ ހިސާބުންނެވެ. ގާޒީ މިސްބާހު ވަނީ ޒިޔާދުގެ މައްސަލައަކީ މައުޟޫއީ ގޮތެއްގައި ކުރިއަށް ގެންދެވޭނެ މައްސަލައެއް ކަމަށް ކަނޑައަޅުއްވާފަ އެވެ.
އެހެންވެ، ދެން މި މައްސަލާގައި އޮންނާނީ ޝަރީއަތުގެ މަރުހަލާ އެވެ.
ޒިކުރާ މިސްކިތުގެ މައްސަލާގައި ޒިޔާދަށް ކުރާ ދައުވާ ސާބިތުކުރުމަށް ހުށަހަޅާފައިވަނީ ފަސް ޝަފަވީ ހެއްކާއި ކިތާބީ ހެކިތަކެވެ. އެހެންކަމުން އެ މައްސަލާގެ ޝަރީއަތަކީ އަވަހަށް ހިންގާ ނިންމަލެވޭނެ ޝަރީއަތެއްކަން ޒިޔާދުގެ ވަކީލް ވަނީ ފާހަގަ ކުރައްވާފަ އެވެ.
ވަކީލް ނޫރުއްސަލާމް އަބޫބަކުރު ވަނީ ދައުވާއާ މެދު ގޮތެއް ނުނިމި، ކުށުގެ ވެށީގައި ނުހިމެނޭ ބަޔަކު އަދުލުގެ ނިޒާމްގެ ތެރެއަށް ވައްދައިގެން ދިގުދަންމަމުންދާތީ ކަންބޮޑުވުން ފާޅު ކުރައްވާފަ އެވެ. އޭނާ ވިދާޅުވި ގޮތުގައި އެކަމަކީ ޒިޔާދަށް ވެސް އޭގެ ސަބަބުން ގެއްލުންތަކެއްވަމުންދާ ކަމެއް ކަމަށާއި އޭނާގެ އަބުރަށް ވެސް އަސަރު ކުރާ ކަމަށެވެ. އަދި، މުޖުތަމައުގައި އޭނާގެ މަގާމަށް ވެސް އުނިކަން ލިބިމުންދާ ކަމަށެވެ.
އެހެންވެ، މައްސަލާގައި ޝަރީއަތް އަވަސްކޮށް، އަޑުއެހުންތައް ކުރިއަށް ގެންދާނެ ގޮތުގެ ތާވަލެއް އެކުލަވާލެއްވުމަށް ވަކީލް ނޫރުއްސަލާމް އެދިވަޑައިގެންނެވި އެވެ. ވަކީލް ވިދާޅުވި ގޮތުގައި އިތުރު ތިން އަޑުއެހުމުން ބާއްވައިގެން މައްސަލަ ނިންމޭނެ އެވެ. އެހެންވެ، މި މަސް ނިމުމުގެ ކުރިން ވެސް އަޑުއެހުމެއް ބާއްވައިދިނުމަށް އެދިވަޑައިގެންނެވި އެވެ.
ދައުލަތުގެ ވަކީލް ވެސް ވަނީ މައްސަލާގެ ޝަރީއަތް ކުރިއަށް ގެންދާނެ ގޮތުގެ ތާވަލެއް އެކުލަވާލުމަށް އެދިފަ އެވެ.
ގާޒީ މިސްބާހު ވިދާޅުވީ ޝަރީއަތުން ވެސް ބޭނުން ވަނީ މައްސަލަ އަވަހަށް ކުރިއަށް ގެންދަން ކަމަށާއި ހަތަރު އަޑުއެހުމެއް ބާއްވައިގެން މައްސަލަ ނިންމާލެވޭނެ ކަމަށް ގަބޫލު ކުރައްވާ ކަމަށެވެ. އެހެންކަމުން ކުރިއަށް އޮތް ދެ މަސް ދުވަހުގެ ތެރޭ މައްސަލާގެ ޝަރީއަތް ނިމެނޭ ގޮތަށް އަޑުއެހުންތަކުގެ ތާވަލެއް ހެދުމަށްފަހު ހިއްސާ ކުރައްވާނެ ކަމަށް ގާޒީ ވިދާޅުވި އެވެ.
އެއަށްފަހު މިއަދުގެ އަޑުއެހުން ގާޒީ ނިންމާލެއްވި އެވެ.
ޒިޔާދުގެ މައްޗަށް ދައުވާ ކުރަނީ އިސްލާމިކް މިނިސްޓަރުގެ މަގާމުގައި ޒިޔާދު ހުންނެވި އިރު ޒިކުރާ މިސްކިތް ހުރި ބިމުގައި 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން އިން ހުށަހެޅި ޕްރޮޕޯސަލްއާ ހިލާފަށް ދައުލަތަށް ގެއްލުން ވާގޮތަށް އެއްބަސްވުން ގާއިމުކޮށްފައިވާ ކަމަށް ބުނެ އެވެ.
އެ އެއްބަސްވުމުގައި ސޮއިކުރުމުގެ ސަބަބުން އެސްޖޭ ކޮންސްޓްރަކްޝަންއަށް އީކުއިޓީގެ ގޮތުގައި 30 މިލިއަން ރުފިޔާ ދައްކާފައިވެ އެވެ. އެހެން ނަމަވެސް، އެކަމުން އެއްވެސް ފައިދާއެއް ދައުލަތަށް ލިބިފައި ނުވާ ކަމަށާއި އެސްޖޭ ކޮންސްޓްރަކްޝަންއަށް ނާޖާއިޒު ފައިދާއެއް ހޯދާދީފައިވާ ކަމަށް ދައުލަތުން ތުހުމަތު ކުރެ އެވެ.
