ރަށްރަށުގައި ހިންގާ މަޝްރޫއުތައް ބައްލަވައި ރައްޔިތުންނާ ގާތުން ކަންކަން ހައްލުކުރައްވަން ރައީސް އިބްރާހިމް މުހައްމަދު ސޯލިހް އަތޮޅުތަކަށް ސިލްސިލާ ދަތުރުތަކެއް ކުރައްވަން ނިންމަވާފައިވާ ކަމަށް ރައީސް އޮފީހުން މިއަދު ބުނެފި އެވެ.
ކޮވިޑާ އެކު އަހަރަކަށް ވުރެން ގިނަ ދުވަސް ރާއްޖެ "ބަންދުވެފައި" އޮތުމަށް ފަހު ހުޅުވާލުމުން ރައީސް ވަނީ އީދު ބަންދުގެ ކުރިން ހދ. އަތޮޅަށް ވަޑައިގެންފަ އެވެ. އަދި މިދިޔަ ހަފުތާގައި ތ. އަތޮޅުގެ ހަތް ރަށަކަށް ވަޑައިގަތެވެ.
ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް މިއަދު "އަދަދު" އަށް ވިދާޅުވީ އަތޮޅުތަކަށް ރައީސް ފެއްޓެވީ ސިލްސިލާ ދަތުރުތަކެއް ކަމަށާއި ވަގުތު ލިބިވަޑައިގަންނަވާ ވަރަކުން ގިނަ ރަށްތަކަކަށް ވަޑައިގަންނަވާނެ ކަމަށެެވެ.
"މި ދަތުރުފުޅުތަކުގައި އިސްކަން ދެއްވާނެ ޕްރޮޖެކްޓްތައް މޮނީޓާ ކުރެއްވުމަށާއި ރަނގަޅު ކުރަން ހުރި ކަންކަން ނޯޓް ކުރެއްވުމަށް. ލާމަރުކަޒީ ނިޒާމު ރަނގަޅަށް މަސައްކަތް ކުރުމުގައި ސަރުކާރުގެ އެއްބާރުލުން ދިނުމަކީ ރައީސްގެ މުހިންމު ޕްރިއޯރިޓީއެއް،" މަބްރޫކް ވިދާޅުވި އެވެ.
އޭނާ ވިދާޅުވި ގޮތުގައި ރައީސްގެ ދަތުރުފުޅުތަކުގައި ބޮޑު އިސްކަމެއް ދެއްވާނީ މިހާތަނަށް ވަޑައިނުގެންނެވޭ ރަށްރަށަށް ވަޑައިގަތުމާއި ގިނަ ޕްރޮޖެކްޓްތަކެއް ހިންގާ ރަށްތަކަށް ވަޑައިގަތުމަށެވެ.
ރައީސްގެ މި ދަތުރުފުޅުތަކުގައި އެމްޑީޕީގެ މެމްބަރުންނާއި ޕާޓީގެ އެންމެ އިސް ލީޑަރުގެ ހައިސިއްޔަތުން ވެސް ވަކިން ބައްދަލު ކުރައްވަ އެވެ. ސެޕްޓެމްބަރު މަހު އެމްޑީޕީގެ އެތެރޭގެ އިންތިހާބު ބާއްވަން ނިންމާފައިވާ އިރު، މިދުވަސްވަރު ބަރުލަމާނީ ނިޒާމުގެ މައްސަލަ ހޫނުވެ އެމްޑީޕީގެ ތެރޭގައި ހިޔާލު ތަފާތުވުން ވަނީ އުފެދިފަ އެވެ. އަދި އެމްޑީޕީގެ ރައީސް މުހައްމަދު ނަޝީދު ވަނީ ރައީސްއާ އެކު ސިޔާސީ މަސައްކަތް ނުކުރައްވާނެ ކަމަށް ވެސް ވިދާޅުވެފަ އެވެ.
ރައީސް ސޯލިހްގެ ދަތުރުގައި އެކި ރަށްތަކަށް ވަޑައިގެން އެމްޑީޕީގެ ކުރިއެރުމަށް ހިޔާލާއި މަޝްވަރާ ހޯއްދަވައި ޕާޓީ ހަލާކުވިޔަ ނުދެއްވާނެ ކަމުގެ ޔަގީންކަން ވެސް ގެންދަވަނީ ދެއްވަމުންނެވެ.
