ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާ ބިލުތަކުގެ މައުލޫމާތު ރައްޔިތުންނާ ހިއްސާކުރުމަށް އެމްޑީޕީގެ ޕާލިމަންޓަރީ ގުރޫޕުން އިސްނަގައިފި އެވެ.
މަޖިލީހުގެ އަޣުލަބިއްޔަތު އޮތް އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ސަރުކާރުގެ ފަރާތުންނާއި އަދި އެމްޑީޕީގެެ މަޖިލިސް މެންބަރުން ހުށަހަޅާ ބިލްތައް ބަހުސް ކުރަން ފެށުމުގެ ކުރިން ނުވަތަ ފުރަތަމަކިއުން އިއްވުމަށްފަހު، އެ ބިލަކާ ބެހޭ ގޮތުން އާމުންނަށް މައުލޫމާތު ދިނުމުގެ ގޮތުން ކްލަބްހައުސް މެދުވެރިކޮށް ޕްރޮގްރާމެއް ހިންގުމަށް ނިންމާފައިވާ ކަމަށެވެ.
"އެގޮތުން ބިލުހުށަހަޅާ މެމްބަރާއި، އެބިލަކާގުޅޭ ސަރުކާރުގެ ފަރާތަކާ ނުވަތަ ފަރާތްތަކަކާ އެކު. އަޖުމަ ބެލުމުގެ ގޮތުން މިރޭ އިލެކްޓްރޯނިކް މުއާމަލާތާބެހޭ ބިލް ގެ މައުލޫމާތު ދިނުން އެބަ ބާއްވަން،" އާޒިމް ވިދާޅުވި އެވެ.
މިރޭގެ ކްލަބްހައުސް ޕްރަގްރާމްގައި އާޒިމްގެ އިތުރުން، ބިލް ހުށަހެޅި މެމްބަރު އަބްދުﷲ ވަހީދާއި، އިކޮނޮމިކް މިނިސްޓްރީގެ ދެ ބޭފުޅަކާ، އެމްއެމްއޭ ގެ ބޭފުޅަކާއި، ޓެކްނޮލޮޖީ މިނިސްޓްރީގެ ބޭފުޅެއް ބައިވެރިވެވަޑައިގަންނަވާނެ ކަމަށް ވިދާޅުވި އެވެ.
އިލެކްޓްރޯނިކް މުއާމަލާތްތަކާ ބެހޭ ބިލުގެ ފުރަތަމަކިޔުން މިދިޔަ ބުރާސްފަތި ދުވަހު މަޖިލީހުގައި އިއްވާފައިވާއިރު، އެ ބިލުގެ މަގުސަދެއް ކަމަށް ބުނެފައިވަނީ އިލެކްޓްރޯނިކް މުއާމަލާތްތަކުގެ ސައްހަކަން ކަށަވަރުކުރެވޭނެ ނިޒާމެއް ގާއިމްކޮށް ޓްރަސްޓް ހިދުމަތްތަކުގެ އުސޫލުތައް ކަނޑައެޅުމެވެ.
އެ ބިލުގެ އިތުރުން މީޑިއާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލާ ބިލާ އެކު، ރައްޔިތުންގެ މަޖިލީހުގެ މި ހިނގާ ތިންވަނަ ދައުރަށް މުހިންމު ބިލުތަކެއް ހުށަހަޅަން ސަރުކާރުން ވަނީ ނިންމައިފަ އެވެ.
ބަންޑަރަނައިބުގެ އޮފީހުން ހާމަކޮށްފައިވާ މައުލޫމާތައް ބަލާއިރު، އިއްޔެ ފެށުނު މަޖިލީހުގެ ތިން ވަނަ ދައުރަށް އެކި ދާއިރާތަކުން ޖުމްލަ 32 ބިލެއް ހުށަހަޅަން ވަނީ ނިންމައިފަ އެވެ.
އޭގެ ތެރޭގައި، ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި، ދީނީ އަދި އިޖްތިމާއީ ދާއިރާއާގުޅޭ ބިލުތަކާއި، އިގުތިސޯދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެ އެވެ.
އެގޮތުން، މީޑިޔާ ކައުންސިލާއި ބްރޯޑްކާސްޓިން ކޮމިޝަން އެއްކޮށްލައިގެން އުފައްދައި މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ބިލު ފާހަގަކޮށްލެވެ އެވެ.
އޭގެ އިތުރުން، ހެއްކާބެހޭ ބިލާއި، އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައި ދިނުމާއި ގާނޫނީ އެހީތެރިކަން ފޯރުކޮށްދިނުމާއި ޑިޕްލޮމެޓިކް އިމްތިޔާޒްތަކާ ބިލު ވެސް މި ދައުރަށް ހުށަހަޅަން ވަނީ ނިންމައިފަ އެވެ.
ވިޔަފާރީގެ ދާއިރާއިން ބަލާއިރު، ފޮރިން އިންވެސްޓްމަންޓުގެ ބިލާއި، އިލެކްޓްރޯނިކް މުއާމަލާތްތަކާއި، ކުންފުނިތަކާއި ޓްރޭޑްމާކުގެ ބިލެއް ވެސް ފާހަގަކޮށްލެވެ އެވެ.
އޭޖީ އޮފީހުގެ ލިސްޓަށް ބަލާއިރު، މަދަނީ ވައިގެ ދަތުރުފަތުރުގެ ބިލެއްގެ އިތުރުން ކުނި މެނޭޖްކުރުމަށްވެސް ހާއްސަ ބިލެއް ހުށަހަޅަން ސަރުކާރުން ވަނީ ނިންމައިފަ އެވެ.
ދެން އެންމެ ބޮޑަށް ފާހަގަކޮށްލެވޭ އެއް ބިލަކީ އިންޑަސްޓްރިއަލް ރިލޭޝަންސްގެ ބިލެވެ. މިއީ މަސައްކަތްތެރިންގެ ހައްގުތައް ރައްކާތެރިކޮށްދިނުމަށް ހާއްސަކޮށްގެން ފަރުމާކުރާ ބިލެކެވެ.
