ޖަޕާނު ސަރުކާރުން ހަދިޔާކުރި ވެކްސިންގެ 112،000 ޑޯޒު ރާއްޖެ މިއަދު ގެނެސްފި އެވެ.
ޖަޕާނުން ކޮވެކްސް ފެސިލިޓީއަށް ހަދިޔާކުރާ 11މިލިއަން ވެކްސިން ޑޯޒް ދޭން ހަމަޖެހިފައިވާ 10 ގައުމުގެ ތެރޭގައި ރާއްޖެ ހިމެނެ އެވެ.
ފޮރިން މިނިސްޓްރީގައި ބޭއްވި ރަސްމިއްޔާތެއްގައި އެ ވެކްސިންއާ ހަވާލުވެވަޑައިގަތީ ފޮރިން މިނިސްޓަރު އަހްމަދު ނަސީމެވެ. ރާއްޖެއަށް ޖަޕާނުން ވެކްސިން މި ހަދިޔާކުރީ ވެކްސިން ޖެހޭ އާބާދީގެ އެންމެންނަށް ސަރުކާރުން ވެކްސިން ހޯދާފައި ވަނިކޮށެވެ.
ރާއްޖޭގައި ވެކްސިނޭޝަން ޕްރޮގްރާމް މިދިޔަ ފެބުރުއަރީ މަހުގެ ތެރޭގައި ފެށީ އިންޑިއާ އިން ހަދިޔާކުރި 100،000 ޑޯޒުންނެވެ. ޗައިނާ އާއި ހެޔޮއެދޭ އެހެން ގައުމުތަކުން ވެސް ވެކްސިން ހަދިޔާކުރި އެވެ.
ރާއްޖޭގައި ވެކްސިން ޖެހޭ އާބާދީގެ އެންމެންނަށް ވެކްސިން ހޯދައި ސަރުކާރުން ވަނީ ވެކްސިންގެ ބޮޑު ކެމްޕޭނެއް ފަށައިފަ އެވެ. ސަރުކާރުގެ އަމާޒަކީ އަންނަ މަސް ފެށުމުގެ ކުރިން ރާއްޖޭގެ ވެކްސިން ޖެހޭ އާބާދީގެ އެންމެންނަށް ވެކްސިން ޖަހާ ނިންމުމެވެ.
އެ ކެމްޕޭނާ އެކު ސްކޫލު ކުދިންނަށް ހާއްސަކޮށް، އުމުރުން 12 އަހަރާއި 17 އަހަރާ ދެމެދުގެ ކުދިންނަށް ވެކްސިން ޖެހުމުގެ ޕްރޮގްރާމެއް ވެސް ވަނީ ފަށައިފަ އެވެ. ގާތްގަނޑަކަށް 35ހާސް ކުދިން ވެކްސިން ޖަހަން ޝަރުތު ހަމަވާ ކަމަށް އެޑިއުކޭޝަން މިނިސްޓްރީން ވެސް ވަނީ ބުނެފަ އެވެ.
ރާއްޖޭގައި މިހާތަނަށް ކޮވިޑް ވެކްސިންގެ ފުރަތަމަ ޑޯޒް، މުޅި އާބާދީގެ 80 އިންސައްތަ މީހުންނަށް ވަނީ ޖަހައިފަ އެވެ. އަދި އާބާދީގެ 69 އިންސައްތަ މީހުން ވަނީ ވެކްސިންގެ ދެވަނަ ޑޯޒް ވެސް ޖަހައިފަ އެވެ.
