ކުރީގެ ރައީސް މުހައްމަދު ނަޝީދު އަވަހަރާކޮށްލަން ބޮން ގޮއްވި މައްސަލައިގައި ދައުވާ ލިބޭ އަލީ ހައިޝަމް ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން މިއަދު އަމުރުކޮށްފި އެވެ.
ޝަރީއަތް ނިމެންދެން ހައިޝަމް ބަންދު ކުރަން އަމުރު ކުރުމުގެ އިތުރުން އެ މައްސަލައިގައި ދެން ދައުވާ ލިބޭ އަހުމަދު އަދުހަމާއި މުޖާޒް އަހްމަދާއި އަދި ތަހުމީން އަހްމަދު ޝަރީއަތް ނިމެންދެން ބަންދުގައި ބަހައްޓަން ކުރިން ނިންމާފައިވާ ނިންމުމަށް ބަދަލެއް ގެންނަން ނުފެންނަ ކަމަށް ވެސް ކޯޓުން ކަނޑައެޅި އެވެ.
ހައިޝަމަކީ، ނަޝީދަށް ހަމަލާދޭން ހެދި ބޮން ސައިކަލުގައި ހަރު ކުރި ކަމަށް ފުލުހުން ތުހުމަތު ކުރާ މީހާ އެވެ. ބޮން ހަރުކޮށްފައި ވަނީ ހުޅުމާލޭ ފްލެޓެއްގެ ކުރިމަތީގައި މަގުމަތީގައި ވެސް ފުލުހުން ބުނެފައިވެ އެވެ.
ހައިޝަމަށް ޖުމްލަ ތިން ދައުވާއެއް ޕްރޮސެކިއުޓާ ޖެނެރަލް ހުސެއިން ޝަމީމް ކުރައްވަ އެވެ. އެއީ ޓެރަރިޒަމްގެ އަމަލެއް ކުރަން ރޭވުމުގެ ދައުވާ އާއި ގޮވާތަކެތި އެހެން ތަނަކަށް ގެންދިޔުމަށް އެހީތެރިވެދިނުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ އެވެ.
ދައުވާ ލިބޭ މީހުންގެ ތެރެއިން އަދުހަމަކީ ފާރަލުމަށްފަހު ރިމޯޓް ބޭނުންކޮށްގެން ބޮން ގޮއްވާލި މީހާ އެވެ. މުޖާޒްއަކީ އޭނާ ފިލުވުމަށް އެހީތެރިވެދިން މީހާ އެވެ. އަދި ތަހުމީނަކީ ބޮން ހަރުކޮށްފައި ހުރި ސައިކަލުގެ ވެރި މީހާ އެވެ.
އޭގެ އިތުރުން އެ މައްސަލައިގައި ހައްޔަރުކޮށްފައި ވަނީ މ. ކުދެހިގޭ، އިސްހާގާއި ގއ. ވިލިނގިލީ، ހުދުރުމާގޭ، ފަހުމީ އަލީ އާއި އއ. މާޅޮސް، އަސަރީގޭ މުހައްމަދު ނާޒިމާއި ހއ. ހޯރަފުށީ އަލަނާސިގޭ މުހައްމަދު ތަސްލީމް އަދި ހއ. މޮޅަދޫ، ބަހާރުގޭ އަބްދުﷲ އަލިމަނިކެވެ.
އޭގެ ތެރެއިން ތަސްލީމަކީ 2017 ވަނަ އަހަރު މާލޭގެ އޮފީހެއްގެ ތެރޭގައި ބޮމެއް ހެދި މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ މީހެކެވެ. މި މައްސަލައިގައި އޭނާ ހައްޔަރު ކުރި އިރު ހުރީ ބަންދުން ދޫކޮށްލައިފަ އެވެ.
ނަޝީދު އަވަހާރަކޮށްލަން ބޮން ގޮއްވާލާފައި ވަނީ ގެކޮޅުން ނިކުމެވަޑައިގެން ކާރުކޮޅަށް ހަމައަށް ވަޑައިގެންނެވި ތަނުންނެވެ. ބޮން ގޮއްވާލާފައި ވަނީ އެ ހަރުކޮށްފައި އިން ސައިކަލާ ނަޝީދު އެންމެ ކައިރިވި ވަގުތު ބެލުމަށްފަހު ރިމޯޓެއް ބޭނުންކޮށްގެނެވެ.
ބޮން ގޮވުމާއެކު، އެއަށް އަޅާފައި ހުރި ބެއަރިން ބޯޅައިގެ 10 ފުށް ނަޝީދުގެ ހަށިކޮޅު ފޫއަޅުވާލި އެވެ. އަދި ބޮން ހަރުކޮށްފައި އިން ވޭވް ސައިކަލުގެ ޕްލާސްޓިކް ކޮޅެއް ވެސް އެމަނިކުފާނުގެ ހަށިގަނޑަށް ވަނެވެ. ނަޝީދުގެ ފުރާނަ ސަލާމަތްވީ މެދުނުކެނޑި 16 ގަޑިއިރު ވަންދެން އެމަނިކުފާނުގެ ހަށިކޮޅުގައި އޭޑީކޭ ހޮސްޕިޓަލުގެ ޑޮކްޓަރުންގެ ޓީމަކުން ކުރެއްވި ސާޖަރީތަކަކަށްފަހު އެވެ.
ބޮމުގެ ބައިތައް ނަޝީދުގެ ފުއްޕާމޭ، ބޯ، ބަނޑު، އަތް، އަދި ފަޔަށް ވެސް އަމާޒުވެފައި ހުރިއިރު އެމަނިކުފާނުގެ ހިތާ އެންމެ ސެންޓިމީޓަރެއް ދުރުން ވެސް ބެއަރިން ބޯޅައެއް ހަށިގަނޑަށް ވަދެފައިވެ އެވެ. އެމަނިކުފާނު މިވަގުތު ހުންނެވީ ޖަރުމަނަށް ބޭސް ފަރުވާއަށް ވަޑައިގެންނެވުމަށްފަހު، ފަސޭހަވަންދެން އިނގިރޭސި ވިލާތުގަ އެވެ.
