ލާމަރުކަޒީ ގާނޫނަށް ގެނައި ބޮޑެތި އިސްލާހުތަކުގެ ތެރޭގައި ރަށު ފެންވަރުގައި ހަދަންޖެހޭ ތަރައްގީގެ ޕްލޭން ހަދަންޖެހޭ މުއްދަތު ސިއްހީ ކުއްލި ނުރައްކަލުގެ ހާލަތުގެ ދަށުން ފަސްކޮށްދެވިފައިވާވުމަކީ އުޒުރެއްގެ ގޮތުގައި ނުބަލަން ރައްޔިތުންގެ މަޖިލީހުގެ ލާމަރުކަޒީ ކޮމިޓީގެ މުގައްރިރު އަދި ހުޅުމާލެ ދާއިރާގެ މެމްބަރު އަލީ ނިޔާޒް ގޮވާލައްވައިފި އެވެ.
ބޮޑެތި ބާރުތަކާއެކު ލާމަރުކަޒީ ގާނޫނު އިސްލާހުކުރި ފަހުން އިންތިހާބުވި ކައުންސިލަރުން މަގާމާ ހަވާލުވީ މިދިޔަ މެއި މަހުގެ 17 ވަނަ ދުވަހެވެ.
އެހެންކަމުން، ތަރައްގީގެ ޕްލޭނާއި ލޭންޑް ޔޫސް ޕްލޭން އެކުލަވާލުމަށް ގާނޫނުގައި ބަޔާންކޮށްފައިވާ މުއްދަތު މިދިޔަ އަންގާރަ ދުވަހަށް ވަނީ ހަމަވެފަ އެވެ.
ނަމަވެސް، މިދިޔަ މަހާއި އޭގެ ކުރީ މަހު ހާއްސަކޮށް އަތޮޅު ތެރޭގައި ކޮވިޑުގެ ހާލަތު އިންތިހާއަށް ގޯސްވެ، ގިނަ ރަށްތަކެއް މޮނީޓަރިންއަށް ލުމާ ގުޅިގެން އެ މަސައްކަތަށް ރައްޔިތުންގެ ހިޔާލާއި މަޝްވަރާ ހޯދަން ދަތިވެފައިވާ ކަމުގެ ޝަކުވާ ކައުންސިލުތަކުން ވަނީ ލޯކަލް ގަވަމަންޓް އޮތޯރިޓީ (އެލްޖީއޭ)ގައި ކޮށްފަ އެވެ.
އަދި ގާނޫނުގައި ބުނާ މުއްދަތުގެ ކުރިން އެ ޕްލޭންތައް އެކުލަވާލައި ނުނިންމޭނެކަމަށް ގިނަ ކައުންސިލުތަކުން ވަނީ ބުނެފަ އެވެ.
އެއާއެކު އެލްޖީއޭއިން ވަނީ ގާނޫނުގައި ބަޔާންކޮށްފައިވާ ރަށްރަށުގެ ތަރައްގީގެ ޕްލޭން ހަދަންޖެހޭ މުއްދަތު ފަސްކޮށްދީފަ އެވެ.
"އާއްމު ސިއްހަތު ރައްކާތެރިކުރުމުގެ ގާނޫނުގެ 43 ވަނަ މާއްދާގައި ބަޔާންކުރާ ގޮތުން ގާނޫނުގައި ވަކި މުއްދަތެއް/ތާރީހެއް ކަނޑައަޅާފައިވާ މުއްދަތުތައް މަޑުޖެއްސުމަށް ވަނީ ކަނޑައަޅައިފަ އެވެ. އަދި އާއްމު ސިއްހަތު ރައްކާތެރި ކުރުމުގެ ގާނޫނު ނިމުމަކަށް އައުމުން ގާނޫނުތަކުން ދީފައިވާ ޑެޑްލައިންތައް ގުނަން ފެށޭނެ ކަމުގައި ވެސް ބަޔާންކޮށްފައި ވެ އެވެ،" ސިޓީ ކައުންސިލްތަކުގެ މޭޔަރުންނަށާއި ރަށު އަދި އަތޮޅު ކައުންސިލުގެ ރައީސުންނަށް އެލްޖީއޭއިން ފޮނުވި ސިޓީގައި ބުނެފައި ވެ އެވެ.
އެއާއެކު ލާމަރުކަޒީ ގާނޫނުގައި ބަޔާންކޮށްފައިވާ ތާރީހުތަކާ ގުޅޭގޮތުން ރައްޔިތުންގެ މަޖިލީހުގެ ލާމަރުކަޒީ ކޮމިޓީ އާއި އެ އޮތޯރިޓީގެ މަޝްވަރާގެ މަތިން އެ ގާނޫނުގައި ކައުންސިލްތަކުން ވަކި ތާރީހުތަކަކަށް ނިންމުމަށް ކަނޑައަޅާފައިވާ ކަންތައްތަކަށް އިތުރު މުއްދަތުތަކެއް ކަނޑައަޅަން ނިންމާފައިވާ ކަމަށެވެ.
އެހެންކަމުން، ތަރައްގީގެ ޕްލޭނު އެކުލަވާލައި ހުށަހަޅަންޖެހޭ މުއްދަތު ވެސް އިތުރު ކޮށްފައިވާ ކަމަށް އެ ސިޓީގައި އަންގާފައި ވެ އެވެ.
އެގޮތުން، އެ މުއްދަތު އިތުރުކޮށްދީފައިވަނީ އަންނަ ނޮވެމްބަރު މަހުގެ ނިޔަލަށެވެ.
ލާމަރުކަޒީ ގާނޫނާ ތައާރުޒުވާތީ ސަރުކާރުގެ ފަރާތުން ދާންދޫ ދާއިރާގެ މެމްބަރު ޔައުގޫބް އަބްދުﷲ ދައުލަތުގެ މާލިއްޔަތު ގާނޫނަށް ހުށަހަޅުއްވާފައިވާ އިސްލާހަށް މިދިޔަ ބުރާސްފަތި ދުވަހު ބޭއްވި ޖަލްސާގައި ކުރިއަށްދިޔަ އިބްތިދާއީ ބަހުސްގައި ވާހަކަ ދައްކަވަމުން އަލީ ނިޔާޒް ވިދާޅުވީ މިފަދަ ގާނޫނުތައް އިސްލާހުކޮށްގެން މެނުވީ ކައުންސިލުތަކުން ހަދާ ޕްލޭންތަކަށް އެޅިފައިވާ ހުރަސްތައް ނައްތާނުލެވޭނެ ކަމަށެވެ.
އެގޮތުން، މަޖިލީހުގެ ތެރެއިން ވެސް މަސައްކަތްކޮށްގެން އެ ގާނޫނުތައް އިސްލާހުކޮށްގެން، ހާގީގީ މާނައިގައި ލާމަރުކަޒީ ބާރުތައް ކައުންސިލުތަކަށް ދޭނެކަމަށް އޭނާ ވިދާޅުވި އެވެ.
އަލީ ނިޔާޒް އިތުރަށް ވިދާޅުވި ގޮތުގައި ތަރައްގީގެ ޕްލޭން ހެދުމަށް ކައުންސިލުތަކަށް ދިމާވި ދަތިތަކަށް ވަނީ ހައްލު ގެނެވިފަ އެވެ.
އެގޮތުން، ސިއްހީ ކުއްލި ނުރައްކާތެރި ހާލަތު ދެމިއޮތް ހިނދެއްގައި އެ ޕްލޭން ހެދުން ފަސްކޮށްދެވިފައިވާކަން އޭނާ ފާހަގަކުރެއްވި އެވެ.
"އަޅުގަނޑު ކައުންސިލުތަކުގައި އެދެން އެއީ އުޒުރެއް ކަމުގައި ނުބައްލަވައި، ވީހާވެސް އަވަހަކަށް، އަޅުގަނޑުމެންނަށް އެނގޭ މިދިޔަ ޖޫން މަސް، ޖުލައި މަހުގެ ތެރޭގައި ރަށްތައް މޮނީޓަރިންނަށް ދިޔަކަން. އަދި ބަންދުކުރެވިފައިވެސް އޮތް ކަން. އެއް ތަނުން އަނެއް ތަނަށް ނުދެވޭކަންވެސް އެނގޭ،" އަލީ ނިޔާޒް ވިދާޅުވި އެވެ.
ނަމަވެސް، މިހާރު ކޮވިޑުގެ ހާލަތު ރަނގަޅުވެ، ގިނަ ފިޔަވަޅުތައް އުވާލެވިފައިވާއިރު، އެކަމުގެ ބޭނުން ހިފައިގެން ވީހާވެސް އަވަހަކަށް ޕްލޭންތައް ހަދައި، ރަށު ފެންވަރުގައި ކުރަންހުރި މަސައްކަތްތައް އަވަސް ކުރަން އޭނާ ގޮވާލެއްވި އެވެ.
