ޕެރިސް (އޮގަސްޓް 21) - ފްރެންޗް ލީގުގައި ރޭ ޕީއެސްޖީން ކުޅުނު މެޗުން 4-2 އިން ބްރެސްޓް އަތުން މޮޅުވެއްޖެ އެވެ.
އެއްކޮށް ފިޓްނުވާތީ ލިއޮނަލް މެސީ އާއި ނޭމާ އަދިވެސް ޕީއެސްޖީގެ މެޗުތަކުގައި ބައިވެރިނުވެ އެވެ. އެއީ ރަނގަޅު ޕްރީ ސީޒަނެއް ހަދަން ދެ ކުޅުންތެރިންނަށް ވަގުތު ބޭނުންވާތީ އެވެ. ކޮޕަ އެމެރިކާ އަށް ފަހު މެސީ އާއި ނޭމާ ވެސް ވަނީ ދިގު ޗުއްޓީ އަކަށް ގޮސްފަ އެވެ.
ރިޕޯޓްތައް ބުނާގޮތުން މެސީ އާއި ނޭމާ ލައިގެން ޕީއެސްޖީން ކުޅޭ ފުރަތަމަ މެޗަކީ އަންނަ ހަފްތާގައި ރެއިމްސްއާ ދެކޮޅަށް ޕީއެސްޖީ ކުޅޭ މެޗެވެ. އެހެން ނޫންނަމަ ކުރިއަށް އޮތް އިންޓަނޭޝަނަލް މެޗުތަކަށް ފަހު ޕީއެސްޖީ ކުޅޭ މެޗުތަކުން ނޭމާ އާއި މެސީ ފެންނާނެ އެވެ.
މި ފަހަރުގެ ޓްރާންސްފާ މާކެޓްގައި ޕީއެސްޖީއާ ދެން ގުޅުނު ސާޖިއޯ ރާމޯސް އަނިޔާގައި ހުރިއިރު، ރޭގެ މެޗުގައި ޖިއަންލުއީޖީ ޑޮންނަރުންމާ އިނީ ބެންޗުގަ އެވެ. އެކަމަކު، އަޝްރަފް ހަކީމީ އާއި ޖިއޮޖީނިއޯ ވައިނަލްޑަމް ވަނީ ރޭގެ މެޗުގައި ކުޅެފަ އެވެ.
ރަށުންބޭރުގައި ކުޅުނު މެޗުގައި ޕީއެސްޖީ އަށް ލީޑުނަގައިދިނީ އެންޑަ ހެރޭރާ އެވެ. މެޗުގެ 23 ވަނަ މިނިޓްގައި ހެރާރާ ޕީއެސްޖީގެ ފުރަތަމަ ގޯލު ޖަހާފައިވަނިކޮށް އޭގެ 13 މިނިޓް ފަހުން ކީލިއަން އެމްބާޕޭ ވަނީ އެ ޓީމުގެ ލީޑުފުޅާކޮށްދީފަ އެވެ. ފުރަތަމަ ހާފު ނިމުމުގެ ކުރިން ބްރެސްޓްގެ ފްރޭންކް ހޮނޮރަޓް ވަނީ ގޯލެއް ޖަހައި އެ ޓީމަށް އުއްމީދެއް ހޯދައިދީފަ އެވެ.
ހެރޭރާ ދިން ބޯޅައަކުން މެޗުގެ 73 ވަަނަ މިނިޓްގައި އިންދްރީސާ ގާނާ ގޭއި ވަނީ ޕީއެސްޖީގެ ތިން ވަނަ ގޯލު ޖަހައިފަ އެވެ. މެޗުގެ ފަހު 10 މިނިޓް ތެރޭ ސްޓީވް މޫނިއޭ ބްރެސްޓްގެ ދެ ވަނަ ގޯލު ޖެހިއިރު، ބަދަލު ކުޅުންތެރިއެއްގެ ގޮތުގައި ކުޅެން އެރި އެންހެލް ޑި މާރިއާ ވަނީ އިތުރު ވަގުތު ޕީއެސްޖީގެ ހަތަރު ވަނަ ގޯލު ޖަހައިފަ އެވެ.
ލީގުގައި މިހާތަނަށް ކުޅުނު ތިން މެޗުން ވެސް ޕީއެސްޖީ ވަނީ މޮޅުވެފަ އެވެ. އެ ޓީމުގެ ކޯޗު މައުރީސިއޯ ޕޮޗެޓީނޯ ބުނީ ތަރިންތަކެއް ނުލައި ކުޅެން ޖެހުނަސް ޕީއެސްޖީގައި އޭނާގެ މަަސައްކަތަކީ މޮޅުވުމާއި ރަނގަޅު ޓީމެއް ބިނާކުރުން ކަމަށެވެ.
