މޮސްކޯ، ރަޝިއާ (އޯގަސްޓު 19) - އިދިކޮޅު ލީޑަރު އެލެކްސީ ނަވަލްނީ ޖަލުގައި ހުންނެވި މައްސަލަ ބޭނުންކޮށްގެން ސެޕްޓެމްބަރު މަހު އޮންނަ ރަޝިއާގެ މަޖިލިސް އިންތިހާބަށް ނުފޫޒު ފޯރުވަން ހުޅަނގުން މަސައްކަތް ކުރާ ކަމަށް ތުހުމަތުކޮށްފި އެވެ.
ރަޝިއާ ފޮރިން މިނިސްޓްރީން ހުޅަނގުގެ ގައުމުތަކަށް ތުހުމަތު ކުރި ގޮތުގައި ނޫސްތަކުގެ އެޖެންޑާގައި ނަވަލްނީ ހިމަނައިގެން އުޅެނީ "އިންތިހާބުގެ ކެމްޕެއިން ހިމެނޭހެން ގައުމުގެ ދާހިލީ ކަންކަމަށް ނުފޫޒު ފޯރުވުމުގެ ނިޔަތުގަ" އެވެ.
ޖަރުމަނުގައި ހުންނެވުމަށް ފަހު ރަޝިއާ އަށް ވަޑައިގެންނެވުމާ އެކު މިދިޔަ ފެބްރުއަރީ މަހު ނަވަލްނީ ޖަލުގައި ބަންދު ކުރެއްވީ ކުރިން އިއްވާފައިވާ ސަސްޕެންޑެޑް ހުކުމެއްގެ ޝަރުތުތަކާ ހިލާފުވުމުންނެވެ.
ނަވަލްނީ އަވަހާރަކޮށްލުމަށް ޒަހަރު ދިނުމުން ޖަރުމަނުގައި ފަރުވާ ހޯއްދަވަމުން ދިޔައިރު ހުކުމުގެ ޝަރުތުގައިވާ ގޮތަށް ރަޝިއާގެ ކަމާ ބެހޭ އިދާރާތަކަށް ކޮންމެ ދުވަހު ރިޕޯޓު ކުރައްވާފައެއް ނުވެ އެވެ.
ނަވަލްނީ ތުހުމަތު ކުރައްވާ ގޮތުގައި ޒަހަރު ދިނީ ރަޝިއާ ސަރުކާރުންނެވެ. ނަމަވެސް ސަރުކާރުން އެކަން ދޮގުކުރެ އެވެ.
ރަޝިއާގެ ސައިބީރިއާގައި ހުންނަވަނިކޮށް ނަވަލްނީ އަށް އާލާސްކަންފުޅާ ދިމާވުމުން ޖަރުމަނަށް ގެންދިޔަ ދުވަހަށް އެއް އަހަރު ފުރުމާ ދިމާކޮށް ރަޝިއާއިން ނެރުނު ބަޔާނެއްގައި ހުޅަނގުގެ ގައުމުތަކަށް ފާޑުކިޔާފައި ވަނީ ޕްރޯ ޑިމޮކްރަސީ ލީޑަރެއްގެ ގޮތުގައި ނަވަލްނީ ދެއްކުމަށް މަސައްކަތް ކުރާ ކަމަށް ބުނެ އެވެ.
ބަޔާނުގައި ޖަރުމަނުގެ ލީޑަރު އެންޖެލާ މާކަލްގެ ނަން ވަކިން ފާހަގަކޮށްފައި ވެ އެވެ. އަންނަ ހުކުރު ދުވަހު މަޝްވަރާތަކަށް މާކަލް ރަޝިއާ އަށް ވަޑައިގަންނަވާނެ އެވެ. ބަޔާނުގައި މާކަލް އަށް ތުހުމަތު ކުރެއްވީ "ނަވަލްނީ ވަށައިގެންވާ ހާލަތުގެ ބޭނުން ހިފައި އަޅުގަނޑުމެންނަށް ހަމަލާ ދޭން އުޅުނު" ކަމަށެވެ.
ރަޝިއާ އާއި ޖަރުމަނުގެ ގުޅުން މިހާރު ވަނީ ވަރަށް ބޮޑަށް ގޯސްވެފަ އެވެ. ދެ ގައުމުގެ މެދުގައި ޖެހިފައިވާ މައްސަލަތަކުގެ ތެރޭގައި ނަވަލްނީ އަށް ޒަހަރު ދިނުމާއި، ޖާސޫސް ކުރުމުގެ މައްސަލަތަކާއި، ޔޫކްރެއިން ބޯޑަރު ކައިރިއަށް ރަޝިއާ ސިފައިން ފޮނުވާ މައްސަލަ ހިމެނެ އެވެ.
ސެޕްޓެމްބަރު މަހު އޮންނަ މަޖިލިސް އިންތިހާބުގައި ރައީސް ލެޑިމިއަ ޕޫޓިންގެ ޔުނައިޓެޑް ރަޝިއާ ޕާޓީ އަށް ބޮޑު ވާދަވެރިކަމާ ކުރިމަތިލާން ޖެހޭނެ ކަމަށް ބެލެވެ އެވެ.
ރަޝިއާގެ އެކި އިދާރާތަކުން ވަނީ އިންތިހާބުގެ ކެމްޕެއިނާ ދިމާކޮށް އިދިކޮޅު ލީޑަރު ނަވަލްނީގެ ސިޔާސީ ހަރަކާތްތައް ހުއްޓުވުމަށް މަސައްކަތް ފަށާފަ އެވެ. އެގޮތުން ނަވަލްނީއާ ގުޅިފައިވާ ގްރޫޕުތަކަކީ "ހަރުކަށި" ބައެއް ކަމަށް ލޭބަލްކޮށްފައި ވަނީ ހުޅަނގާ ގުޅިގެން އިންގިލާބެއް ގެންނަން އުޅޭކަމުގެ ތުހުމަތުގަ އެވެ.
