ހިޔާ މަޝްރޫއުގެ ދަށުން ހުޅުމާލޭގައި އިމާރާތްކޮށްފައިވާ ޓަވަރުތަކަށް ދާއިމީ ކަރަންޓު ދޭން ސްޓެލްކޯއިން މިއަދު ފަށައިފި އެވެ.
މި ފްލެޓްތަކަށް ކަރަންޓު ގުޅާލުމުގެ މަސައްކަތް މިދިޔަ ޖޫން މަހުގެ ތެރޭގަ ވަނީ ނިންމާލާފަ އެވެ. ނަމަވެސް ވަކިވަކި ޔުނިޓްތަކަށް ކަރަންޓު ގުޅާލުމަށް ކުރަން ޖެހޭ މަސައްކަތްތައް ނުނިމޭތީ މިހާތަނަށް އެއްވެސް ފްލެޓްތަކަށް ދާއިމީ ކަރަންޓު ދީފައެއް ނުވެ އެވެ.
ޓަވަރުތަކަށް ކަރަންޓު ދޭން ފެށުމާ ގުޅިގެން ސްޓެލްކޯއިން ބުނި ގޮތުގައި ކަރަންޓު ދޭނީ ދުވާލަކު ދެ ޓަވަރަށެވެ. އެގޮތުން އެންމެ ފުރަތަމަ ކަރަންޓު ދެނީ 15 އަދި 16 ވަނަ ޓަވަރަށެވެ.
ސްޓެލްކޯއިން އިތުރަށް ބުނީ، ކަރަންޓު ދިނުމުގެ މަސައްކަތް ކުރިޔަށް ދާނީ ކޮންމެ ދުވަހެއްގެ ހެނދުނު 9:00 އިން ހަވީރު 5:00 އަށް ކަމަށެވެ. އަދި މިކަން އަންގަން އެ ކުންފުނިން ފްލެޓުގެ ވެރިފަރާތުން އެޗްޑީސީއަށް ދީފައިވާ ނަމްބަރަށް އެސްއެމްއެސްއެއް ފޮނުވާނެ ކަމަށެވެ.
މި އެސްއެމްއެސް ލިބުމުން، ޓަވަރު ކައިރިއަށް ދާން ޖެހެނީ ކަރަންޓުލުމަށްޓަކައި ސްޓެލްކޯއާ އެކު ސޮއެކޮށްފައިވާ މީހާއަށް ދޫކޮށްފައިވާ ސްލިޕް ހިފައިގެންނެވެ. މި ސްލިޕް ހިފައިގެން ދިޔުމުން ކަރަންޓު ދެވޭނެ ކަމަށް ސްޓެލްކޯއިން ބުންޏެވެ.
ކަނޑައެޅިފައިވާ ދުވަހު ކަރަންޓު ލާން ނާންނަ މީހުންނާ ގުޅިގެން ސްޓެލްކޯއިން ބުނީ، އެސްއެމްއެސް ލިބުމަށް ފަހު ހާޒިރު ނުވެއްޖެ ނަމަ ދެން ފުރުސަތު ލިބޭނީ ހުރިހާ ޓަވަރަކަށް ކަރަންޓު ގުޅައި ނިމުމުން ކަމަށެވެ. އަދި މިކަމަށް ސަމާލުވެ، ފްލެޓްތަކުގެ ވެރިފަރާތުން އެ ދުވަހު އަންނަން ސްޓެލްކޯއިން އިލްތިމާސްކުރެ އެވެ.
ސްޓެލްކޯއިން ބުނީ ޖެހިގެން އަންނަ ދުވަހު ކަރަންޓު ދޫކުރާ ދެ ޓަވަރުގެ މައުލޫމާތު އެކުންފުނީގެ ސޯޝަލް މީޑިއާގެ ވަސީލަތްތައް މެދުވެރިކޮށް ކަސްޓަމަރުންނާއި ހިއްސާކުރަމުން ގެންދާނެ ކަމަށެވެ.
އެޗްޑީސީން ވަނީ މިހާރު މި ފްލެޓް ލިބުނު މީހުންގެ ތެރެއިން ގިނަ މީހުންނާ އެކު އެއްބަސްވުންތަކުގައި ސޮއިކޮށް ނިންމުމަށް ފަހު ތަޅުދަނޑި ހަވާލުކޮށްފަ އެވެ. އަދި މި ފްލެޓްތަކަށް ކަރަންޓު ލިބުމުން، މިހާރު ފްލެޓް ލިބިފައިވާ މީހުންނަށް ފިނިޝިން މަސައްކަތް ފަށަން ފުރުސަތު ލިބޭނެ އެވެ.
އެޗްޑީސީން ވަނީ މި ފްލެޓްތަކަށް ކަރަންޓު ގުޅައި ނިމުމުން ފިނިޝިން މަސައްކަތް ފަށަން ހުއްދަ ދޭން ނިންމާފަ އެވެ. މިހާރު ފިނިޝިން މަސައްކަތް ނިންމަން ހަތަރު މަސް ގިނަ މީހުންނަށް ލިބޭނެ އެވެ. މި ފްލެޓްތަކުން ކުލި ނަގަން ފަށާނީ އަންނަ ޖެނުއަރީ މަހުން ފެށިގެންނެވެ.
