ޕޮޕްސިކަލްސް، އައިސް ޕޮޕްސް، ނުވަތަ ގަނޑުކުރި ޕޮޕްސް އަކީ ހޫނު ދުވަހެއްގައި ތުއްތު ކުއްޖަކަށް، ނުވަތަ ބޭބީ އަކަށް ފިނި ޓްރީޓެއް ދޭން ގަސްތުކުރާނަމަ އެކްސްޕެރިމެންޓް ކޮށްލަން ރަނގަޅު ކަމެކެވެ. އެކަމަކު ބޭބީ އަކަށް ފިނި އެއްޗެއް ދޭ ވާހަކަ ދައްކައިގެން، މި ވާހަކަ ބަހުސަކަށް ބަދަލުވުމުގެ ކުރިން ބުނެލަމެވެ. އަހަރު ނުފުރޭ ބޭބީސް އަށް ވެސް ޕޮޕްސިކަލްސް ދެވިދާނެ އެވެ. މިއީ ސިއްހީ ގޮތުން ވެސް ގޯސް ކަމެއް ނޫނެވެ.
އެކަމަކު ބޭބީ އަށް ޕޮޕްސިކަލް ތައްޔާރުކުރުމުގެ ކުރިން އެނގެންޖެހޭ ދެތިން ވާހަކަ އެއް ހިމަނާލާނަމެވެ.
ބޭބީސް އަށް ޕޮޕްސިކަލްސް ދެވިދާނެތަ؟
ކުޑަކުދިންނަށް ތައްޔާރުކުރާ ޕޮޕްސިކަލްސް ނުވަތަ އައިސް ޕޮޕްސް ހަދަނީ ގަނޑުކުރި މޭވާ އިން ނުވަތަ ފުރުޓް އެއްގެ ދިޔައިން ނުވަތަ މިކްސަރުން ގިރައިގެން ހަދާ ފުރުޓް ޕިއުރީ އިންނެވެ. އޭގައި އެއްވެސް ބާވަތެއްގެ ޕްރެޒަވެޓިވް އެއް ނުވަތަ ހަކުރެއް ނުހިމެނޭނެ އެވެ.
ޑަބްލިޔުއެޗްއޯ އާއި އާއި އެމެރިކަން އެކަޑެމީ އޮފް ޕިޑިއެޓްރިކްސް ގެ ލާފާ އަކީ ތުއްތު ކުއްޖާގެ ފުރަތަމަ ހަ މަހުގައި ހަމައެކަނި ގާތުން ދިނުމެވެ. ނުވަތަ ފޯމިއުލާ ދިނުމެވެ. މި ގައިޑްލައިން އަށް ބަލާފައި ހަ މަސް ވުމުގެ ކުރިން އެއްވެސް ބާވަތެއްގެ ހަރު ކާ އެއްޗެއް ނުވަތަ ޕޮޕްސިކަލްސް ފަދަ އެއްޗެއް ދިނުމަކީ ރަނގަޅު ގޮތެއް ނޫނެވެ. ހަ މަސް ވުމަށްފަހު ކާއެއްޗިއްސަށް ކުއްޖާ ފުދޭވަރަކަށް ހޭނުމުން، އާ އެއްޗެއް ދިނުމުގެ ގޮތުން ޕޮޕްސިކަލް ނުވަތަ އައިސް ޕޮޕްސް ޓްރައި ކޮށްލެވިދާނެ އެވެ. އެކަމަކު ގިނަ ނިއުޓްރިޝަނިސްޓުންގެ ނަޒަރުގައި އެންމެ ރަނގަޅު ގޮތަކީ އަހަރެއް ފުރުމުން ނުވަތަ އަހަރެއް ފުރުމާ ގާތްކޮށްފައި މިފަދަ އެއްޗެއް ޓްރައި ކުރުމެވެ.
ކުދިންނަށް ދޭން ތައްޔާރުކުރެވިދާނެ ޕޮޕްސިކަލްސް
ބައެއް އިންފެންޓް ސްޕެޝަލިސްޓުން ލަފާ ދޭގޮތުން މައިމީހާގެ ކިރުން އެކަނި ހަދާ ޕޮޕްސިކަލްސް ނުވަތަ "މޮމްސިކަލްސް" އާއި ފޯމިއުލާ ގަނޑުކޮށްގެން ހަދާ އައިސް ޕޮޕްސް އަކީ ދަތް ފަޅަމުން އަންނަ އިރު ތުއްތު ކުދިންގެ ހިރުގަނޑުގައި ހުންނަ ރިހުން ކުޑަކޮށްދީ އަރާމު ހޯދައިދޭނެ ކަމެކެވެ.
ގާތުން ދޭ ކިރުގައި ރިހުން ކުޑަކޮށްދިނުމަށް އެހީވެދޭ އެނަލްޖެސިކް މާއްދާތައް އެކުލެވެ އެވެ. އެހެންވީމަ މައިމީހާގެ ކިރުން ހަދާ ޕޮޕްސިކަލްސް އިން ދަތް ފަޅާއިރު ރިހުން ތަޖުރިބާ ކުރާ ތުއްތުކުދިންނަށް ފަރުވާ އަކަށް ވެދާނެ އެވެ.
ފުރުޓް ކަހަލަ އެއްޗެހިން ޕޮޕްސިކަލްސް ތައްޔާރުކުރާނަމަ ފުރުޓް އެކަނި މިކްސަރުން ގިރާލުމަށްފަހު އެހެން އެއްވެސް އެއްޗެއް އެއަށް އެއްކުރުން ރަނގަޅެއް ނޫނެވެ. ގިރާ އިރު ފެން ނުވަތަ ފޯމިއުލާ ބޭނުންކުރެވިދާނެ އެވެ. އެކަމަކު ހަކުރު ފަދަ މާއްދާތައް ކުދިންނަށް ދޭން ރަނގަޅެއް ނޫނެވެ.
ބޭބީސް އަށް ޕޮޕްސިކަލްސް ދިނުމާއި ރިސްކު
ޕޮޕްސިކަލްސް ވިޔަސް އައިސް ޕޮޕްސް ވިޔަސް މި ދައްކަނީ ހުސް ފިނިކުރި ނުވަތަ ގަނޑުކުރި ލޮލީގެ ވާހަކަ އެވެ. ގަނޑުކުރި ލޮލީ ދިނުމުގައި އޮތް ރިސްކަކީ ބައެއް ފަހަރު މާ ފިނި އެއްޗެއް ދިނުމުން އެ އެއްޗެއް ދޭތާ 6-72 ގަޑި އިރާ ދޭތެރޭގައި ބައެއް ކުދިންނަށް ކޮލާއި އަނގަ ކައިރި ރަތް ވެފައި ނުވަތަ ދުޅަވެފައި ހުންނަ ކަހަލަ ގޮތެއް ވާން މެދުވެރިވެދާނެ އެވެ. އެގޮތް ވާ ކުއްޖެއް ނަމަ މަދުން ދޭތެރެއަކުން މިކަހަލަ އެއްޗެއް ދޭން ރަނގަޅުވާނެ އެވެ.
މާ ކުޑަ ކުދިންނަށް ހަފާ ނުލައި ދޫ ލައިގެން އެކަނި ލޮލީ ކާން ނުވެސް އެނގިދާނެ އެވެ. ކުއްޖާގެ އޯރަލް މޮޓޯ ސްކިލްސް އަށް ބެލުމަށްފަހު ސުޕަވައިޒްކޮށް މިކަހަލަ ލޮލީ ކާން ދޭން މަސައްކަތް ކުރެވިދާނެ އެވެ.
އެންމެ ފުރަތަމަ ފިނި އެއްޗެއް ދޭ އިރު ކޮންމެވެސް ވަރަކަށް ކެއްސުމަކީ އެކަށީގެންވާ ކަމެކެވެ. މިއީ އެކަމަކު މާ ބޮޑު މައްސަލައެއް ނޫނެވެ. ބޮޑު ސެންސޮރީ ބަދަލެއް އަންނަ އިރު ހަށިގަނޑު އެއަށް ރިއެކްޓު ކުރާނެ އެވެ.
މީގައި އެންމެ ސަމާލުވާން ޖެހެނީ ބޭބީއަށް ކޮންމެހެން ޕޮޕްސިކަލް ދޭނަމަ، ފިހާރަތަކުން ނުވަތަ ބޭރުން ގެންނަ މިފަދަ ތަކެތި ނުދިނުމަށެވެ. ގޭގައި ޕޮޕްސިކަލް ތައްޔާރުކުރުމަކީ އުނދަގޫ ކަމެއް ނޫނެވެ. ތާޒާ މޭވާއިން ނުވަތަ ތަރުކާރީ ޕިއުރީ އިން ތައްޔާރުކުރާށެވެ.
ބޭބީ އަށް ޕޮޕްސިކަލްސް ދިނުމުގެ ފައިދާ އަކީ ކޮބާ؟
ތަފާތު ތަޖުރިބާތަކުން ތަފާތު ކަންކަން ކުދިން ދަސްކުރާނެ އެވެ. ފިނި ޕޮޕްސިކަލް އެއް ކާލުމަކީ ތަފާތު ހިއްސު ދެނެގަންނަން ކުޑަ ކުއްޖާ އަށް އެހީވެދޭ ކަމެކެވެ. ބައެއް ފަހަރު ކާން ދިނުމުގައި ތެރަޕީ އެއްގެ ގޮތުގައި ވެސް ބައެއް މަންމައިން ޕޮޕްސިކަލް ބޭނުންކުރެ އެވެ. ކާންދޭން އުނދަގޫ ކުދިންނަށް ވެސް ޕޮޕްސިކަލް އަކުން ކެއުމުގައި ކުޑަ ޓުވިސްޓެއް ގެނެސްދެވިދާނެ އެވެ.
ހޯމް މޭޑް ޕޮޕްސިކަލް އަކީ ކެއުމުގެ އެކި ރަހަ ތުއްތު ކުދިންނަށް އަލަށް ތައާރަފްކުރަން ވެސް ޝައުގުވެރި ގޮތެކެވެ. ބައެއް ކަހަލަ ހާބްސް ކުއްޖާ އަށް އިންޓްރޮޑިއުސް ކުރަން ވެސް ޕޮޕްސިކަލްސް ތައްޔާރުކޮށްލެވިދާނެ އެވެ. މިސާލަކަށް، އަނބު، ކިއުކަމްބާ، ކެރެޓް ފަދަ އެއްޗެހި ހިމެނެ އެވެ.
އެހެންވީމަ ސެންސޮރީ ޑިވޮލޮޕްމެންޓާއި އަނގައިގެ މޮޓޯ ސްކިލް ފައިދާ ތަކަށް ބަލާއިރު ތުއްތު ކުއްޖަކަށް ޕޮޕްސިކަލް އެއް ދޭން ނުވާ ސަބަބެއް ނެތެވެ. ދަރިފުޅަށް ނުވަ މަސް ވާއިރު ރަހަތަކަށް އާދަ ވެއްޖެ ނަމަ ހަމަ ހޫނު ދުވަހެއްގައި ފިނި ކޮށްލަން ވެސް ޕޮޕްސިކަލް އަކުން ހަމަޖައްސާލެވިދާނެ އެވެ.
titledesc
