ދޯހާ، ގަތަރު (އޯގަސްޓު 14) - އަފްގާނިސްތާނުގެ ފުރިހަމަ ކޮންޓްރޯލް ހޯދަން ތާލިބާނުން ކުރާ ހަނގުރާމައިގައި ވެރިރަށް ކާބުލް ވަށާލާފައިވާ މި ދަނޑިވަޅުގައި ހަމަލާތައް ހުއްޓާލަން ގަތަރުން ގޮވާލައިފި އެވެ.
އަފްގާނިސްތާނުގެ ސަރުކާރާއި ތާލިބާނުންނާ ދެމެދު ބާއްވާ ސުލްހައިގެ މަޝްވަރާތަކުގައި މެދުވެރިއެއްގެ ދައުރު އަދާކުރަނީ ގަތަރު ސަރުކާރެވެ. އެކި މަރުހަލާތަކަށް ބަހާލައިގެން މަޝްވަރާކުރި ނަމަވެސް އެއްވެސް ކުރިއެރުމެއް މިހާތަނަށް ފެނިފައެއް ނުވެ އެވެ.
"ފޮރިން މިނިސްޓަރާއި ތާލިބާނުންނާ ދެމެދު ބޭއްވި ބައްދަލުވުމުގައި މިނިސްޓަރު ގޮވާލެއްވީ ހާލަތު ކޮންޓްރޯލް ކުރުމަށް ހަމަލާތައް ހުއްޓާލުމަށް. އޭގެ ސަބަބުން ސިޔާސީ ހައްލެއް ލިބި އަފްގާނިސްތާނުގެ ރައްޔިތުންނަށް އުޖާލާ ކުރިމަގަކަށް މަގުފަހިވާނެ،" ގަތަރު ފޮރިން މިނިސްޓްރީން ނެރުނު ބަޔާނެއްގައި ބުންޏެވެ.
މިއީ ތާލިބާނުންގެ ހަމަލާތައް ހުއްޓާލުމަށް ގަތަރު މިހާ ހާމަކަން ބޮޑުކޮށް ގޮވާލި ފުރަތަމަ ފަހަރެވެ. ތާލިބާން ހަނގުރާމަވެރި ޖަމާއަތުގެ ސިޔާސީ އޮފީސް ހިންގަނީ ގަތަރުގަ އެވެ.
ގަތަރުގެ ފޮރިން މިނިސްޓްރީން އެފަދަ ބަޔާނެއް ނެރުނީ މިނިސްޓަރު ޝެއިހް މުހައްމަދު ބިން އަބްދުލް ރަހްމާން އަލް ސާނީ އާއި ތާލިބާނުންގެ ސިޔާސީ އޮފީހުގެ ވެރިޔާ މުއްލާ އަބްދުލް ގަނީ ބަރާދަރު އާ ދެމެދު ބޭއްވި ބައްދަލުވުމަށް ފަހު އެވެ.
އަފްގާނިސްތާނުގެ ދެ ވަނަ އަށް އަދި ތިން ވަނަ އަށް އެންމެ ބޮޑު ކަންދަހާރް އާއި ހިރާތް ސިޓީގެ ކޮންޓްރޯލް މިހާރު އޮތީ ތާލިބާނުންގެ އަތު ގަ އެވެ. ހުކުރު ދުވަހުން ފެށިގެން ހަނގުރާމަވެރިން އަންނަނީ ވެރިރަށް ކާބުލްއާ ކައިރިވަމުންނެވެ.
