މެންޗެސްޓާ (އޮގަސްޓް 14) - އިނގިރޭސި ޕްރިމިއާ ލީގުގެ އާ ސީޒަނުގައި މެންޗެސްޓާ ޔުނައިޓެޑް ކުޅުނު ފުރަތަމަ މެޗުގައި ބްރޫނޯ ފެނާންޑޭސްގެ ހެޓްރިކާ އެކު 5-1 އިން ލީޑްސް ޔުނައިޓެޑް އަތުން މޮޅުވެއްޖެ އެވެ.
މިދިޔަ އަހަރު ޖެނުއަރީ މަހު ޔުނައިޓެޑަށް ބަދަލުވުމަށް ފަހު ތަފާތު ފޯމެއްގައި ކުޅެމުން އަންނަ ފެނާންޑޭސް މިރޭ ހެޓްރިކެޓް ހެދިއިރު، އޭނާ އަކީ އިނގިރޭސި ޕްރިމިއާ ލީގެއްގެ އާ ސީޒަނެއްގެ ފުރަތަމަ މެޗުގައި ހެޓްރިކް ހެދި 10 ވަނަ ކުޅުންތެރިޔާ އެވެ. އެންމެ ފަހުން ހެޓްރިކެއް ހެދީ މިދިޔަ ސީޒަނުގައި ލިވަޕޫލްގެ މުހައްމަދު ސަލާހު އެވެ. އޭނާ ވެސް ހެޓްރިކް ހެދީ ލީޑްސް ކޮޅަށެވެ.
ފެނާންޑޭސް އަކީ 1977 ވަނަ އަހަރަށް ފަހު ލީގުގެ އާ ސީޒަނެއްގެ ފުރަތަމަ މެޗުގައި ހެޓްރިކް ހެދި ޔުނައިޓެޑަށް ނިސްބަތްވާ ފުރަތަމަ ކުޅުންތެރިޔާ އެވެ.
ލީޑްސް ކޮޅަށް މިރޭގެ މެޗުގައި ފެނާންޑޭސްގެ އިތުރުން ޔުނައިޓެޑްގެ އަނެއް ދެ ގޯލު ޖެހީ ފްރެޑް އާއި މޭސަން ގްރީންވުޑް އެވެ. ލީޑްސްގެ ހަމައެކަނި ގޯލު ޖެހީ ލޫކް އެއިލިން އެވެ.
ލަނޑު ޖެހުމަށް ފަހު ފެނާންޑޭސް (ވ) އާއި ޕޮގްބާ އުފާފާޅުކުރަނީ.-- ފޮޓޯ: އޭއެފްޕީ
ޔުނައިޓެޑުން ދެން މިރޭގެ މެޗުގައި ތަފާތު މޮޅު ކުޅުމެއް ދެއްކީ ޕައުލް ޕޮގްބާ އެވެ. މި ފަހަރު ޔުނައިޓެޑް ދޫކޮށްލަން އުޅޭ ކަމަށް މީޑިއާގައި ވާހަކަ ދެކެވުނު ޕޮގްބާ ވަނީ ޔުނައިޓެޑްގެ ފަސް ގޯލުގެ ތެރެއިން ހަތަރު ގޯލު ޖަހަން ފުރުސަތު ތަނަވަސްކޮށްދީފަ އެވެ. މިއީ ޕްރިމިއާ ލީގުގެ ތާރީހުގައި އެއް މެޗެއްގައި އެއް ކުޅުންތެރިއަކު ހަތަރު ގޯލު ޖަހަން ފުރުސަތު ތަނަވަސްކޮށްދިން ހަތް ވަނަ ފަހަރެވެ. ޕޮގްބާގެ ކުރިން ޔުނައިޓެޑްގެ ކުޅުންތެރިއަކަށް އެކަން ހާސިލް ނުކުރެވެ އެވެ.
މެޗަށް ފަހު ފެނާންޑޭސް ބުނީ ސަޕޯޓަރުން ފުރިފައި އޮތް ދަނޑެއްގައި ކުޅެލަން ލިބުނު މި ފަދަ މެޗެއްގައި ހެޓްރިކެއް ހެދުމުން ވަރަށް ހިތްހަމަޖެހޭ ކަމަށާއި އެންމެ ބޮޑު އުފަލަކީ ޓީމު މޮޅުކޮށްދެވުން ކަމަށެވެ. ފެނާންޑޭސް ވަނީ އެ ޓީމުގެ ޕޮގްބާ ދެއްކި ކުޅުމަށް ތައުރީފުކޮށްފަ އެވެ.
ސްޕޯޓިން ލިޒްބަން ދޫކޮށް ޔުނައިޓެޑަށް ބަދަލުވި ފަހުން ފެނާންޑޭސް ކުޅުނު 80 މެޗުގައި އޭނާ ވަނީ 40 ގޯލު ޖަހައި 25 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ޔުނައިޓެޑުން ވަނީ ލީޑްސްއާ ދެކޮޅަށް ދެ ވަނަ ހާފްގައި ޖޭޑަން ސަންޗޯ ކުޅެން އަރުވައިފަ އެވެ. ކުރިން މެންޗެސްޓާ ސިޓީން ފެނުނު ސަންޗޯ ޔުނައިޓެޑަށް ބަދަލުވީ މި ފަހަރުގެ ޓްރާންސްފާ މާކެޓްގައި ބޮރޫޝިއާ ޑޯޓްމަންޑް ދޫކޮށެވެ.
ޔުނައިޓެޑުން މިއަދު ވަނީ ރެއާލް މެޑްރިޑްގެ ފްރާންސް ޑިފެންޑަރު ރަަފައެލް ވަރާންގެ ޓްރާންސްފާ ކަންތައް ނިންމައިފަ އެވެ. ޔުނައިޓެޑުން ސަންޗޯ އާއި ވަރާން ގަންނަން ޖުމްލަ އެއްކޮށް 150 މިލިއަން ޑޮލަރު ހަރަދުކުރި އެވެ.
