ވޮޝިންޓަން، އެމެރިކާ (އޯގަސްޓު 14) - މިދިޔަ ޖުލައި މަހަކީ ދުނިޔޭގައި މިހާތަނަށް ރިކޯޑު ކުރި އެންމެ ހޫނުގަދަ މަސް ކަމަށް އެމެރިކާ ސައިންޓިފިކް އެޖެންސީއަކުން ބުނެފި އެވެ.
ޖުލައި މަހަކީ އާއްމު ގޮތެއްގައި ކޮންމެ އަހަރަކު ވެސް އެންމެ ހޫނުގަދަ މަހެވެ. ނަމަވެސް 2021 ވަނަ އަހަރުގެ ޖުލައި މަހަކީ މިހާތަނަށް އެންމެ ހޫނުގަދަވި މަސް ކަމަށް ނޭޝަނަލް އޯޝެނިކް އެންޑް އެޓްމޮސްފެރިކް އެޑްމިނިސްޓްރޭޝަން (އެންއޯއޭއޭ) އިން ބުނެ އެވެ.
އެންއޯއޭއޭގެ އެޑްމިނިސްޓްރޭޓަރު ރިކް ސްޕިންރެޑް ވިދާޅުވީ މޫސުމީ ބަދަލުގެ ސަބަބުން ދުނިޔެއަށް އަންނާނެ ކަމަށް ލަފާކުރެވޭ ބަދަލުތަކުގެ ތެރޭގައި އާދަޔާ ހިލާފަށް ހޫނުގަދަވުން ހިމެނޭ ކަމަށެވެ.
އެންއޯއޭއޭގެ ހޯދުން ބިނާކޮށްފައި ވަނީ ނޭޝަނަލް ސެންޓާޒް ފޯ އެންވާރަމެންޓަލް އިންފޮމޭޝަން (އެންސީއީއައި) ގެ ޑޭޓާ އަށެވެ. އޭގައި ބުނާ ގޮތުގައި ބިމާއި ކަނޑުގެ ލޮނުގަނޑުގެ ފަށަލައިގެ ހޫނުމިން މިދިޔަ ޖުލައި މަހު ހުރީ 20 ވަނަ ގަރުނުގައި އެވްރެޖުކޮށް ހުރި 15.7 ޑިގްރީ ސެލްސިއަސް އަށް ވުރެ 0.93 ޑިގްރީ ސެލްސި މަތީގަ އެވެ. އެހެންކަމުން އެއީ މީގެ 142 އަހަރު ކުރިން ރިކޯޑު ބަލަހައްޓަން ފެށި ފަހުން މިހާތަނަށް އައި އެންމެ ހޫނު ގަދަ ޖުލައި މަހެވެ.
އޭގެ ކުރިން އެންމެ ހޫނުގަދަ ކަމަށް ރިކޯޑް ކޮށްފައި ވަނީ ޖުލައި 2016، 2019 އަދި 2020 ގަ އެވެ.
ނަމަވެސް ޔޫރަޕިއަން ޔޫނިއަންގެ ކޮޕޭނިކަސް ކްލައިމެޓް ޗޭންޖް ސާވިސްގެ ޑޭޓާއިން ދައްކާ ގޮތުގައި މިދިޔަ މަހަކީ ދުނިޔޭގައި މިހާތަނަށް ރިކޯޑު ކުރި ތިން ވަނަ އަށް އެންމެ ހޫނުގަދަ ޖުލައި މަހެވެ.
ބްރޭކްތްރޫ އިންސްޓިޓިއުޓުގެ ކްލައިމެޓް ސައިންޓިސްޓު ޒެކޭ ހޯސްފާދާ ވިދާޅުވީ އެޖެންސީތަކުގެ ތަފާސްހިސާބުގައި ކުޑަ ފަރަގެއް ހުރުމަކީ ބައެއް ފަހަރަ ދިމާވާ ކަމެއް ކަމަށެވެ. އެކަމަކު އޭނާ ވިދާޅުވީ ތަފާސްހިސާބުގައި ފަރަގު ހުއްޓަސް މޫސުމީ ބަދަލުގެ ސަބަބުން ދުނިޔެ ހޫނުވަމުން ދާ ކަމީ ހަގީގަތެއް ކަމަށާއި އޭގެ ގެއްލުން ވެސް ބޮޑުވަމުންދާ ކަމަށެވެ.
އެގޮތުން އާދަޔާ ހިލާފަށް ހޫނުގަދަވެ "ހީޓްވޭވްތަކާ" ކުރިމަތިވުމާއި، ޖަންގަލިތަކުގައި ގިނަ އަލިފާންގަނޑުތައް ރޯވުން ފަދަ ކަންކަން މި ވަގުތު ދިމާވެގެން އުޅެނީ އެހެންވެ ކަމަށް އޭނާ ފާހަގަކުރެއްވި އެވެ.
މިދިޔަ ހަފްތާގައި އދ. ގެ އިންޓަގަވަމެންޓަލް ޕެނެލް އޮން ކްލައިމެޓް ޗޭންޖްގެ ވޯކިން ގްރޫޕުން ނެރުނު ރިޕޯޓުގައި ބުނީ ކުރިން ހީކުރި ވަރަށް ވުރެ އަވަހަށް ދުނިޔެ ހޫނުވަމުންދާ ކަމަށާއި އޭގެ ސަބަބުން މި ގަރުނު ނިމޭއިރު ކަނޑުގެ ލޮނުގަނޑު އުފުލޭނެ ކަމަށެވެ. އަދި ކުރިން ކޮންމެ 100 އަހަރަކުން ދިމާވާ ތިމާވެށީގެ ކާރިސާތައް އަހަރަކު އެއް ފަހަރު ދިމާވެދާނެ ކަމަށް ވެސް ބުނެފައިވެ އެވެ.
ރިޕޯޓުގައި ބުނެފައިވާ ގޮތުން ދުނިޔޭގެ ހޫނުމިން 1.5 ޑިގްރީ ސެލްސިއަސް އަށް އަރާނެ ކަމަށް ބެލެވެނީ 2030 ގަ އެވެ. އެއީ މީގެ ތިން އަހަރު ކުރިން އަންދާޒާ ކުރި ވަރަށް ވުރެ 10 އަހަރު އަވަހެވެ.
ރިޕޯޓުގައި ބުނެފައި ވަނީ އެ މިންވަރަށް ދުނިޔެ ހޫނުވުމުން އިންސާނުންނަށް ނުރައްކާ އެބަ އޮތް ކަމަށެވެ. އެގޮތުން އާދަޔާ ހިލާފު މޫސުމީ ކާރިސާތައް ދިމާވުން އިތުރުވާނެ ކަމަށާއި ގުދުރަތީ ގޮތުން އަލިފާން ރޯވުމާއި، ތޫފާންތަކާއި، ވާރޭނުވެހުން އަދި ފެންބޮޑުވުން ފަދަ ކަންކަން ގިނަ ވާނެ ކަމުގެ އިންޒާރު ދީފައި ވެ އެވެ.
