ޕެރިސް (އޮގަސްޓް 14) - ދާދި ފަހުން ހިލޭ ޓްރާންސްފާއެއްގައި ޕީއެސްޖީއާ ގުޅުނު ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ލިއޮނަލް މެސީ އަވަސްއަރުވާލައިގެން މެޗުތަކުގައި ބޭނުން ނުކުރާނެ ކަމަށް ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނެފި އެވެ.
ޕީއެސްޖީ އަށް ބަދަލުވި ފަހުން މެސީ މިހާތަނަށް ފުރިހަމަ ކޮށްފައިވަނީ މަދު ޕްރެކްޓިސް ސެޝަނެކެވެ. ފްރެންޗް ލީގުގައި މިރޭ ސްޓްރާސްބާގާ ދެކޮޅަށް ޕީއެސްޖީ ކުޅޭ މެޗުގައި މެސީ ފެނިދާނެތޯ ނޫސްވެރިއަކު ކުރި ސުވާލަށް ޕޮޗެޓީނޯ ބުނީ މެސީ ދަނޑުމަތިން ފެންނަން އަދި ދުވަސްކޮޅެއް ނަގާނެ ކަމަށެވެ.
"ކޮޕަ އެމެރިކާ ފައިނަލަށް ފަހު އަދި މިވީ މަހެއްހާ ދުވަސް ފަހުން މެސީ އެ ކުރީ މަދު ޕްރެކްޓިހެއް. އަހަރެމެން ބޭނުމީ ފިޔަަވަޅަކަށް ފަހު ފިޔަވަޅެއް ދާން. މެޗު ފިޓްނަސްއާ ހުރިހާ ކަމަކަށް ބަލާފައި މެސީ އެއްކޮށް ފިޓްވީމަ މެޗުތަކުގައި ބޭނުންކުރާނީ،" ޕޮޗެޓީނޯ ބުންޏެވެ.
ކޮންމެ ކޯޗެކޭ އެއްގޮތަށް އޭނާ ވެސް ޓީމުގެ އެންމެ މުހިއްމު އަދި މޮޅެތި ކުޅުންތެރިން ލައިގެން މެޗުތައް ކުޅެން ބޭނުންވާ ކަމަށާއި އެކަމަކު މީގެ ކުޅުންތެރިޔާގެ ރައްކާތެރިކަން ކަށަވަރުކުރުން ވެސް އެއީ މުހިއްމު ކަމެއް ކަމަށް ޕޮޗެޓީނޯ ވަނީ ބުނެފަ އެވެ.
ޕީއެސްޖީ ޓްރެއިނިން ސެޝަނެއްގެ ތެރެއިން މެސީ.-- ފޮޓޯ: އޭއެފްޕީ
މި ފަހަރުގެ ޓްރާންސްފާ މާކެޓްގައި ޕީއެސްޖީން ވަނީ ރެއާލް މެޑްރިޑްގެ ކެޕްޓަން ސާޖިއޯ ރާމޯސް ވެސް ގެނެސްފަ އެވެ. ރާމޯސްގެ ފަޔަށް ލިބިފައިވާ އަނިޔާއިން ރަނގަޅުވެ، އޭނާ އަށް ޕީއެސްޖީގެ މެޗުތަކުގައި ކުޅެވޭނީ އަންނަ މަހު އެވެ.
ރާމޯސް އާއި މެސީ އަކީ ރެއާލާއި ބާސެލޯނާ އަށް ކުޅުނުއިރު ގިނަ ދެބަސްވުންތަކެއް ދަނޑުމަތީގައި ހިނގި ދެ ކުޅުންތެރިންނެވެ. އެލްކްލަސިކޯ މެޗުތަކުގައި މެސީ އަށް ކުރި ނުރައްކާތެރި ފައުލުތަކަކަށް ރާމޯސް އަށް ގިނަ ފަަހަރުތަކެއްގައި ވަނީ ކާޑު ވެސް ދައްކައިފަ އެވެ. ޕޮޗެޓީނޯ ބުނީ އެ ކަންތައްތައް އެއީ މިހާރު މާޒީ ކަމަށެވެ.
"ދެން އެ މީހުން (ރާމޯސް އާއި މެސީ) ޕީއެސްޖީގައި ފެންނާނީ ކޮއްކޮ އާއި ބޭބެ ގޮތަށް،" ޕޮޗެޓީނޯ ބުންޏެވެ.
ފެންވަރު ރަނގަޅު ކުޅުންތެރިންތަކެއް ލައިގެން ނަތީޖާ ނުނެރެވިއްޖެނަމަ ވަޒީފާ ގެއްލުމުގެ ޕްރެޝަރު އެބައޮތްތޯ ސުވާލުކުރުމުން ޕޮޗެޓީނޯ ބުނީ ދިރިއުޅުުމުގެ ކޮންމެ ކަމެއް ވެސް ގުޅިފައި އޮންނަނީ ކޮންމެވެސް ޕްރެޝަރަކާ ކަމަށާއި އެއީ އަބަދުވެސް އޮންނާނެ އެއްޗެއް ކަމަށެވެ.
ސްޓްރާސްބާގާއި ޕީއެސްޖީ ކުޅޭ މެޗު ފަށާނީ ރާއްޖެ ގަޑިން މިރޭ 12 ޖަހާއިރު އެވެ.
