މެޑްރިޑް (އޮގަސްޓް 13) - މަޝްހޫރު އިންވެސްޓްމަންޓް ކުންފުނި ސީވީސީ ކެޕިޓަލް އިން ސްޕެނިޝް ލީގު (ލަލީގާ)ގެ 10 ޕަސެންޓް ހިއްސާ ތިން ބިލިއަން ޑޮލަރަށް ގަންނަން އެއްބަސްވި ޑީލަށް ސްޕެއިނުގެ އެއް ވަނަ އަދި ދެ ވަނަ ޑިވިޝަނުގެ ކްލަބްތަކުގެ މެދުގައި ނެގި ވޯޓުން މެޖޯރިޓީގެ ތާއީދު ލިބިއްޖެ އެވެ.
ސްޕެއިނުގެ އެއް ވަނަ އަދި ދެ ވަނަ ޑިވިޝަނުގެ ޖުމްލަ 42 ކްލަބްގެ ތެރެއިން މި ވޯޓުގައި ޑީލާ ދެކޮޅު ހެދީ ރެއާލާއި ބާސެލޯނާ އަދި އެތުލެޓިކް ބިލްބާއޯގެ އިތުރުން ނަން ހާމަކުރަން ބޭނުންނުވާ ކްލަބެކެވެ. އެއްބަަސްވުން ފާސްކުރަން ބޭނުންވަނީ ކްލަބްތަކުގެ ތެރެއިން ތިން ބައި ކުޅަ ދެ ބައިގެ ތާއީދެވެ.
ރެއާލް ވަނީ މި ޑީލާ ދެކޮޅަށް ކޯޓަށް ދާން ޖެހިއްޖެނަމަ އެކަން ކުރާނެ ކަމަށް ބުނެފަ އެވެ. ރެއާލާއި ބާސެލޯނާގެ އެންމެ ބޮޑު ކަންބޮޑުވުމަކީ ކުރިއަށް އޮތްތަނުގައި ވާނެ ގޮތެއް ނޭނގި 50 އަހަރަށް ލީގުގެ އިތުރުން ކްލަބަށް އާމްދަނީ ވަންނާނެ ގޮތަކަށް އޮތް ދޮރެއް ހިއްސާއެއްގެ ގޮތުގައި ބޭރުގެ އިންވެސްޓަރުންގެ އަތް މައްޗަށް ދާތީ އެވެ.
ސްޕެއިނުގެ ފުޓްބޯޅަ ފެޑެރޭޝަނުން ވެސް ވަނީ ސީވީސީ އާއި ލަލީގާގެ މި ޑީލް ތެރޭގައި ގާނޫނާ ހިލާފު ކަންތައްތަކެއް ހުރިކަން ފާހަގަކޮށްފަ އެވެ.
ލަލީގާގެ ރައީސް ހަވިއޭ ޓެބާސް ވިދާޅުވީ ރެއާލް މެޑްރިޑާއި ބާސެލޯނާއާ ދެކޮޅަށް ވެސް މި ޑީލް ނިންމޭނެ ކަމުގެ އުއްމީދު އެބައޮތް ކަމަށެވެ.
"ވަރަށް ބަލައިގަންނަން އުނދަގޫ ތުހުމަތުތަކެއް ވެސް އެބަހުރި ރެއާލުން ކޮށްފައި. ދެން ވާ ގޮތެއް އަހަރެމެން ބަލަން ތިބެންވީ. އަހަރެމެންނަށް މި އޮތީ މި ޑީލަށް މެޖޯރިޓީ ކްލަބްތަކުގެ ތާއީދު ލިބިފައި. ރެއާލުން އުޅެނީ އަހަރެމެންނަށް ޕްރެޝަރު ކޮށްގެން ވިޔަސް ބިރު ދައްކައިގެން ވިޔަސް މި ޑީލް ހުއްޓުވަން. އަހަރެން މި ހުރީ މިކަން ކުރިއަށް ގެންދަން،" ޓެބާސް ވިދާޅުވި އެވެ.
ސީވީސީ ޑީލުން ކްލަބްތަކަށް އޮތް އެންމެ ބޮޑު ވަގުތީ އުފަލަކީ އެ ކޮންޓްރެކްޓައިވާ ގޮތުން ގޮތުން ފުރަތަމަ ދޭ ތިން ބިލިއަން ޑޮލަރުގެ 90 ޕަސެންޓް ކްލަބްތަކަށް (ސްޕެއިނުގެ ފުރަތަމަ ޑިވިޝަނާއި ދެ ވަަނަ ޑިވިޝަންގެ ޓީމުތަކަށް) ބަހާން ހަމަޖެހިފައި އޮތުމުންނެވެ. މިއީ ކޮވިޑާ ހެދި މާލީ ގޮތުން އަޑިގަނޑެއްގެ ތެރޭގައި އޮތް ކްލަބްތަކަށް ހިތްދެމިލަން ފުރުސަތަކަށް ވާނެ އެވެ.
ޓެބާސް ވިދާޅުވީ ސީވީސީ ޑީލާ ގުޅޭ ކަންތައްތަކުގައި 10 މަސް ދުވަސް ވަންދެން ކެނޑިނޭޅި ކުރި މަސައްކަތުގެ ނަތީޖާ ރަނގަޅު ކަމަށެވެ. އަދި މި ޑީލް އެއްކޮށް ހިނގައިގަނެ މި ވަގުތު މިކަމާ ދެކޮޅަށް އޮތް ކްލަބްތައް ކަމަށްވާ ރެއާލާއި ބާސެލޯނާ އަދި ބިލްބާއޯ ބޭނުންވެއްޖެނަމަ އަލުން އެއްވެސް ޖޫރިމަނާއެއް ދެއްކުމެއް ނެތި ތިން އަހަރުގެ ތެރޭގައި ޑީލްގައި ބައިވެރިވެވޭނެ ކަމަށް ޓެބާސް ވިދާޅުވި އެވެ.
"ސީވީސީ އިން އެ އޮތީ ބުނެފައި އެ ކްލަބްތަކަށް ވެސް ތިން އަހަރު ތެރޭ މީގެ ބައިވެރިވެވޭނެ ކަމަށް. މީގެ ހަގީގަތުގައި މި ވަގުތު ބައިވެރިވުން ވަރަށް މުހިއްމު. އެއީ ރެެއާލްގެ ބޮޑު އެއް ޓްރާންސްފާ (އެމްބާޕޭ ގެންނަން) ކުރަން އެ މީހުންނަށް ފައިސާ ބޭނުންވޭ. ބާސެލޯނާ އިން ގެނައި ހުރިހާ ކުޅުންތެރިން އަދި ރަޖިސްޓްރީއެއް ނުކުރެވޭ. އެހެންވީމަ އެބަޖެހޭ މި ވަގުތު ހުރި މައްސަލަތަކަށް ހައްލެއް ހޯދަން ވެސް މީގެއާ ގުޅެން،" ޓެބާސް ވިދާޅުވި އެވެ.
ބާސެލޯނާ އިން ހިލޭ ޓްރާންސްފާއެއްގައި ގެނައި މެމްފިސް ޑިޕާއި އަދި ސާޖިއޯ އަގުއޭރޯގެ ރަޖިސްޓްރޭޝަން އަދި އެއްކޮށް ނުނިމެ އެވެ.
މީގެ ކުރިން ސީވީސީ ކެޕިޓަލް އިން ވަނީ އިޓާލިއަން ލީގުގެ ހިއްސާއެއް ގަންނަން ވެސް މަސައްކަތް ކޮށްފަ އެވެ. އެކަމަކު، ކުޑަ ވަގުތު ކޮޅެއްގެ މާލީ މަންފާ އަށް ބަލައި ދުރުރާސްތާ ވިސްނުމެއް ނެތި ލީގުގެ ހިއްސާއެއް ވިއްކާލުމުގެ ގޯސް އަސަރުތަކެއް ކޮށްފައިވާނެތީ މަޝްހޫރު ކްލަބްތަކުން ވެސް އެ ޑީލަށް ނޫނެކޭ ބުނުމުން ސީވީސީ އަށް އެ ޑީލް ކުރިއަށް ނުގެންދެވުނެވެ.
އިޓަލީގެ ބޮޑެތި ކްލަބްތަކުން ސީވީސީއާ އެކު އެއްބަސްވި ޑީލަށް ވޯޓު ނުދިން އަނެއް ސަބަބަކީ މުޅި ލީގުގެ ހައިބަތަށް ބަލާއިރު ސީވީސީން ހުށަހެޅި ތިން ބިލިއަން ޑޮލަރަކީ ކުޑަ އަގެއް ކަމަށް ފެންނާތީ އެވެ. ސީވީސީން ޖަރުމަނު ލީގުގެ ހިއްސާއެއް ގަންނަންކުރި މަސައްކަތް ވެސް ކާމިޔާބެއްނުވި އެެވެ.
