ޕެރިސް (އޮގަސްޓް 13) - ފްރާންސްގެ ތަރި ކީލިއަން އެމްބާޕޭ ޕީއެސްޖީ ދޫކޮށްލައިފިނަމަ އަންނަ ސީޒަނަށް އެ ޓީމުން އަމާޒުހިފާނީ ޔުވެންޓަސްގެ ކްރިސްޓިއާނޯ ރޮނާލްޑޯ ގެންނަން ކަމަށް މީޑިއާ ރިޕޯޓްތައް ބުނެފި އެވެ.
މީގެ ކުރިން ޕީއެސްޖީން ވަނީ ރޮނާލްޑޯ ހޯދަން މަސައްކަތް ކޮށްފަ އެވެ. އެކަމަކު، އޭރު ބޮޑު ޓްރާންސްފާ ފީ އެއް ދައްކާފައި ރޮނާލްޑޯ ގަންނަން ޕީއެސްޖީން ބޭނުމެއް ނުވި އެވެ. އަންނަ އަހަރުގެ ޖޫން މަހުގެ ނިޔަލަށް ޕީއެސްޖީގައި އެމްބާޕޭގެ ކޮންޓްރެކްޓާއި ޔުވެންޓަސްގައި ރޮނާލްޑޯގެ އެއްބަސްވުން ހަމަވާނެ އެވެ. އެމްބާޕޭ ހިލޭ ޓްރާންސްފާއެއްގައި ޕީއެސްޖީ ދޫކޮށްލައިފިނަމަ އެ ޓީމުން ހިލޭ ޓްރާންސްފާއެއްގައި ރޮނާލްޑޯ ގެންނަން ވަރަށް ބޮޑަށް މަސައްކަތް ކުރާނެ ކަމަށް މީޑިއާ ރިޕޯޓްތައް ބުނެ އެވެ.
ރޮނާލްޑޯ، 36، އަންނަ އަހަރު ޕީއެސްޖީ އަށް ބަދަލުވެއްޖެނަމަ އޭނާއާ އެންމެ ވާދަވެރި ކުޅުންތެރިޔާ ލިއޮނަލް މެސީއާ އެއް ޓީމުން ފެންނާނެ އެވެ. މެސީ ވަނީ ދާދި ފަހުން ހިލޭ އެއްބަސްވުމެއްގެ ދަށުން ދެ އަހަރުގެ ކޮންޓްރެކްޓެއްގައި ޕީއެސްޖީއާ އެކު ސޮއިކޮށްފަ އެވެ.
ޕީއެސްޖީން ރޮނާލްޑޯ ހޯދަން މަސައްކަތް ކުރުމުގެ ކަންކަން ބަރޯސާވަނީ އެމްބާޕޭ އޭނާގެ މުސްތަގުބަލާ މެދު ނިންމާ ނިންމުމަކަށެވެ. އެމްބާޕޭ ޕީއެސްޖީގައި މަޑުކުރަން ނިންމައިފިނަމަ ޕީއެސްޖީން ރޮނާލްޑޯ ހޯދަން މަސައްކަތް ނުކުރާނެ ކަމަށް ފްރާންސްގެ ނޫސްތަކުން ވަނީ ރިޕޯޓްކޮށްފަ އެވެ.
މީގެ ކުރިން ރޮނާލްޑޯ ވަނީ ޔުވެންޓަސްއާ އެކު އޭނާ ހަދާފައިވާ ކޮންޓްރެކްޓަށް އިހުތިރާމް ކުރާނެ ކަމަށް ބުނެފަ އެވެ. އެކަމަކު އެ ޓީމާ އެކު އާ އެއްބަސްވުމެއް ހަދަން ރޮނާލްޑޯ ބޭނުމެއް ނުވެ އެވެ. އެ ވާހަކަ ނުސީދާ ގޮތަކަށް ޔުވެންޓަސްގެ ވައިސް ޗެއާމަން ޕަވެލް ނެޑްވެޑް ވެސް ވަނީ މީޑިއާގައި ހިއްސާކޮށްފަ އެވެ.
މި ފަހަރުގެ ޓްރާންސްފާ މާކެޓް ނިމުމުގެ ކުރިން އެމްބާޕޭ ޕީއެސްޖީ ދޫކޮށްލަން އުޅޭ ކަމަށް ސްޕެއިނުގެ މީޑިއާތަކުން ރިޕޯޓްކުރި ނަމަވެސް ޕީއެސްޖީގެ ރައީސް ނާސިރު އެލް-ހެއްލާފީ ވަނީ އެ ވާހަަކަތައް ދޮގުކުރައްވައިފަ އެވެ. ހެއްލާފީ ވިދާޅުވީ އެމްބާޕޭ ދޫކޮށްލުމުގެ ވިސްނުމެއް ނެތް ކަމަށް ވިދާޅުވެފަ އެވެ.
މީގެ ކުރިން ރޮނާލްޑޯ ވަނީ ފުޓްބޯޅަ ކެރިއަރު ނިމުމުގެ ކުރިން ފްރާންސްގައި ކުޅެލުމުގެ ޝައުގުވެރިކަން ހުރިކަމަށް ބުނެފަ އެވެ. ރޮނާލްޑޯއާ އެކު 2016 ވަަނަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކުރި ޑިފެންޑަރު ހޯސޭ ފޮންޓް ވަނީ ފްރެންޗް ލީގަށް ކުޅެން ރޮނާލްޑޯ އަށް ދައުވަތު ދޭނެ ކަމަށް ބުނެފަ އެވެ. އޭނާ ކުޅެމުން އަންނަނީ ފްރާންސްގެ އެންމެ ފަހުގެ ޗެމްޕިއަން ލިލް އަށެވެ.
