ހުޅުމާލެ ގޮނޑުދޮށް ސަރަހައްދު ބޭނުން ކުރާނެ ގޮތުގެ ހިޔާލު ހޯދުމަށް ކްލަބް ހައުސް މެދުވެރިކޮށް ހުޅުމާލެ ޑެވެލޮޕްމެންޓް ކޯޕަރޭޝަންގެ ފަރާތުން ކްލަބް ހައުސްގައި ބައްދަލުވުމެއް ބޭއްވުމުން މާލޭ ސިޓީ ކައުންސިލުން އެކަން ކުށްވެރިކޮށްފި އެވެ.
ސިޓީ ކައުންސިލުން މިއަދު ނެރުނު ނޫސް ބަޔާނެއްގައި ބުނެފައި ވަނީ މާލެ ތަރައްގީކޮށް ހިންގާނެ ގޮތުގެ ޕްލޭނަށް ހިޔާލު ހޯދުމަކީ ގާނޫނުގެ ދަށުން އެ ކައުންސިލަށް މަތިކޮށްފައި އޮތް ޒިންމާއެއް ކަމަށެވެ. އެހެންވެ، ގޮނޑުދޮށް ބޭނުން ކުރާނެ ގޮތުގެ ހިޔާލު ހޯދުމަށް އެޗްޑީސީން ބުދަ ދުވަހުގެ ރޭ ސޯޝަލް މީޑިޔާގައި ބޭއްވި ބައްދަލުވުމަކީ "ލާމަރުކަޒީ ގާނޫނަށް ގޮންޖައްސަވާ" ބޭއްވި ބައްދަލުވުމެއް ކަމަށް ކައުންސިލުން ބުނެފައިވެ އެވެ.
"ހުޅުމާލޭ ރައްޔިތުންގެ ހިޔާލު ހޯދުމަށް ބޭއްވި ބައްދަލުވުމަކީ މި ކައުންސިލުން ބަލައިގަންނާނެ ބައްދަލުވުމެއް ނޫން ކަމަށާއި އެފަދަ ބައްދަލުވުންތައް އެއްވެސް ހައިސިއްޔަތެއް ނެތް ފަރާތްތަކުން ބާއްވާކަމަކީ މި ކައުންސިލުން ނުހަނު ކަންބޮޑުވާ ކަމެއް ކަމުގައި ދަންނަވަން،" އެ ބަޔާނުގައިވެ އެވެ.
އޭގެ އިތުރުން އެ ބަޔާނުގައި ބުނެފައި ވަނީ މާލެ ސިޓީގެ ތަރައްގީގެ ޕްލޭން އެކުލަވާލުމަށް ހުރިހާ އަވަށެއްގެ ރައްޔިތުންގެ ވެސް ހިޔާލު ހޯދަމުން އަންނަ ކަމަށެވެ. ހުޅުމާލެ ރައްޔިތުންގެ ހިޔާލު ހޯދަން ތާވަލްކޮށްފައިވާ ކަމަށް ވެސް އެ ބަޔާނުގައި ބުނެފައިވެ އެވެ.
"ހުޅުމާލޭ ރައްޔިތުންނާ ވެސް ބައްދަލު ކުރުމަށް ތާވަލްކޮށްފައި އޮތް ދަނޑިވަޅެއްގައި މިފަދަ ބައްދަލުވުމެއް ބޭއްވުމުގެ ސަބަބުން ރައްޔިތުންގެ މެދުގައި ނުތަނަވަސްކަމެއް އުފެދިފައިވާތީ މިފަދަ ބައްދަލުވުންތައް ހައުސިން ޑިވެލޮޕްމަންޓް ކޯޕަރޭޝަންގެ ފަރާތުން ނުބޭއްވުމަށް މި ކައުންސިލުން ގޮވާލަން،" އެ ބަޔާނުގައި ލިޔެފައިވެ އެވެ.
ހުޅުމާލެ ގޮނޑުދޮށް ސަރަހައްދު ވިޔަފާރިތަކުން ކުރިން ބޭނުން ކުރަމުންދިޔަ މައްސަލަ އޮތީ ވަރަށް ބޮޑުވެފަ އެވެ. އެކަން މަނާކޮށްފައި ވަނީ އެކި ފަހަރުމަތިން މަސައްކަތްކޮށްގެނެވެ. ގޮނޑުދޮށް ބޭނުން ކުރާނެ ގޮތުގެ ހިޔާލު އޭގެ ފަހުން މި ހޯދަނީ އަލަށެވެ.
އެޗްޑީސީއާމެދު ނުރުހުން ފާޅުކޮށް ސިޓީ ކައުންސިލުން ބަޔާނެއް ނެރެފައިވާއިރު ސްޓޭޓް އިލެކްޓްރިކް ކޮމްޕެނީ އާއި މާލޭ ވޯޓާ އެންޑް ސުވަރޭޖް ކޮމްޕެނީއާ ވެސް ކައުންސިލުން ވަނީ މައްސަލަ ޖެހިފަ އެވެ. މައްސަލައިގެ ފެށުން އައީ އިންޑަސްޓްރިއަލް ވިލެޖު ސަރަހައްދުން ސްޓެލްކޯއަށް ހައުސިން މިނިސްޓްރީން ދީފައިވާ ބިމެއް، ކައުންސިލުން ހުސްކުރި މައްސަލަ ފުލުހަށް ހުށަހެޅުމުންނެވެ.
އޭގެ ބަދަލެއްގެ ގޮތުން ކައުންސިލުން އެންގީ ސްޓެލްކޯއާ ވިދިގެން އޮތް ކުރިން މަގެއްގެ ގޮތުގައި ބޭނުން ކުރި ތަން ހުސްކޮށް އާންމުންނަށް ބޭނުން ކުރެވޭ ގޮތް ހެދުމަށެވެ. ފެން ކުންފުނި އޮފީސް ބިއްދޮށުން މާލެ އާ ސަހަރާ ކައިރިން ބަންދުކޮށްފައި އޮތް މަގު ހުސްކޮށް އަލުން އާންމުންނަށް ބޭނުން ކުރެވޭ ގޮތް ހެދުމަށް ވެސް ކައުންސިލުން އެންގި އެވެ.
