ޕެރިސް (އޮގަސްޓް 12) - ޕީއެސްޖީން ދެ އަހަރުގެ ކޮންޓްރެކްޓެެއްގައި ލިއޮނަލް މެސީގެ ސޮއި ހޯދުމަކީ އެ ޓީމުން ކީލިއަން އެމްބާޕޭ ދޫކޮށްލަން ޖެހޭ ސަބަބެއް ނޫން ކަމަށް ޕީއެސްޖީގެ ރައީސް ނާސިރު އެލް ހެއްލާފީ ވިދާޅުވެއްޖެ އެވެ.
ބާސެލޯނާ އިން ހިލޭ ޓްރާންސްފާއެއްގައި މެސީ ވަނީ ޕީއެސްޖީ އަށް ބަދަލުވެފަ އެވެ. އެއާ އެކު ފްރާންސް މީޑިއާގައި އެންމެ ގަދަޔަށް ދެކެވުނު ވާހަކަ އަކީ އެމްބާޕޭ، ޕީއެސްޖީ ދޫކޮށްލަން ތައްޔާރުވަމުން އަންނަ ކަމުގެ ވާހަކަ އެވެ.
ޕީއެސްޖީ ކުޅުންތެރިއެއްގެ ގޮތުގައި މެސީ މީޑިއާ އަށް ތައާރަފްކުރަން ބޭއްވި ޕްރެސް ކޮންފަރެންސްގައި ނޫސްވެރިއަކުގެ ސުވާލަކަށް ހެއްލާފީ ވިދާޅުވީ އެމްބާޕޭގެ ކަންކަމާ ބެހޭގޮތުން ޕީއެސްޖީން ވިސްނާ ގޮތް އަދިވެސް ބަދަލުނުވާ ކަމަށެވެ.
"ކީލިއަން (އެމްބާޕޭ) އަކީ ޕެރީސިއަން އެއް. (ޕެރިހުގެ މީހެއް). އޭނަ ބުނެފައި އެބައޮތް (ހުރިހާ މުބާރާތަކަށް ރަނގަޅަށް) ވާދަކުރެވޭނެ ފެންވަރު ޓީމެއް އޮތުމޭ ބޭނުމީ. މިހާރު އަހަރެމެން (ޕީއެސްޖީ) ވަރުގެ ވަރުގަދަ އަށް ވާދަކުރެވޭނެ އިތުރު ޓީމެއް ނޯންނާނެ. އެހެންވީމަ އޭނަ (އެމްބާޕޭ) މި ކްލަބް ދޫކޮށްލަން ޖެހޭ ސަބަބެއް ނެތް. އަދި އަހަރެމެން އޭނަ (އެމްބާޕޭ) ދޫކޮށްލަން ޖެހޭ ސަބަބެއް ވެސް ނެތް،" ހެއްލާފީ ވިދާޅުވި އެވެ.
ޕީއެސްޖީއާ އެކު އެމްބާޕޭ، 22، ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ. މިދިޔަ ސީޒަނުގައި ޕީއެސްޖީން ވަނީ އެމްބާޕޭގެ ކޮންޓްރެކްޓް އާ ކުރަން ގިނަ މަސައްކަތްތަކެއް ކޮށްފަ އެވެ. ޕީއެސްޖީން އެމްބާޕޭ އަށް ހަތަރު އަހަރުގެ އެއްބަސްވުމެއް ހުށަހެޅި އެވެ. އެއީ އަހަރަކު 36 މިލިއަން ޔޫރޯ (43 މިލިއަން ޑޮލަރު) ލިބޭ ގޮތަށެވެ. އެކަމަކު އެ ކޮންޓްރެކްޓްގައި ސޮއިކުރަން އެމްބާޕޭ ބޭނުމެއް ނުވި އެވެ.
ފައިނޭންޝިއަލް ފެއާޕްލޭ (އެފްއެފްޕީ) ގަވާއިދުގެ ތެރެއިން ވެސް ޕީއެސްޖީ އަށް އެމްބާޕޭ ލައްވައި އާ ކޮންޓްރެކްޓެއް ހެދުމުގެ ފުރުސަތު އެބައޮތް ކަމަށް އެ ކްލަބުން ބުނެ އެވެ.
ޕީއެސްޖީގައި މަޑުކުރާނެ ކަމަށް ދާދި ފަހުން އިންޓަވިއުއެއްގައި ބުނި ނަމަވެސް އެމްބާޕޭގެ ވިސްނުމަކީ އެ ކްލަބާ އެކު މި ވަގުތު ހުރި ކޮންޓްރެކްޓް ފުރިހަމަަ ކުރުން ކަމަށް ފްރާންސްގެ ނޫސްތަކުން ވަނީ ރިޕޯޓްކޮށްފަ އެވެ.
މީގެ ކުރިން ވެސް ޕީއެސްޖީން ވަނީ އެ ކްލަބްގެ ބައެއް ކުޅުންތެރިން ކްލަބް ދޫކޮށްލަން ކުރި މަސައްކަތަށް ހުރަސް އަޅައިފަ އެވެ. އެއީ އެޑިންސަން ކަވާނީ އާއި ނޭމާ އަދި މާކޯ ވެރާޓީ އެވެ. ސްޕެއިންގެ ނޫސްތަކުން ރިޕޯޓްކުރާ ގޮތުގައި މި މަހުގެ ނިޔަލަށް ކުރިއަށްދާ މި ފަހަރުގެ ހޫނު މޫސުމުގެ ޓްރާންސްފާ މާކެޓް ނިމުމުގެ ކުރިން ރެއާލް މެޑްރިޑަށް ބަދަލުވާން އެމްބާޕޭ ބޭނުންވެ އެވެ.
