އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހާ ދެމެދު އުފެދިފައިވާ ހިޔާލުތަފާތުވުންތައް އެއްފަރާތްކޮށް، އެކުގައި އަލުން މަސައްކަތް ކުރެވޭނެ ގޮތެއް ހޯދައިދޭން އެ ޕާޓީގެ ޗެއާޕާސަން ހަސަން ލަތީފް އިސްނަންގަވައިފި އެވެ.
ނަޝީދާއި ރައީސް ސޯލިހާ ދެމެދު ސިޔާސީ ހިޔާލުތަފާތުވުން ބޮޑުވެފައިވާ ތަން ފެންނަން ފެށީ، ބަރުލަމާނީ ނިޒާމުގެ ވާހަކަތަކުންނެވެ. ނަޝީދު ވަނީ އެމަނިކުފާނު ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ރައީސް ސޯލިހްގެ އަރިހުން އެދިވަޑައިގެންފަ އެވެ. އެކަމަކު ނިޒާމް ބަދަލުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށް ތަކުރާރުކޮށް ރައީސް ސޯލިހް ވަނީ ވިދާޅުވެފަ އެވެ.
އަދި އޭގެ ފަހުން، ރައީސް ސޯލިހްއާ ދެމެދު އެއްވެސް މައްސަލައެއް ނެތް ނަމަވެސް، އެމަނިކުފާނާ އެކު ސިޔާސީ ގޮތުން ދެން ހުންނެވެން ނެތް ކަމަށް ނަޝީދު ވަނީ ފާޅުގައި ވިދާޅުވެފަ އެވެ.
އަދި ނަޝީދު އަވަހާރަކޮށްލަން ދިން ޓެރަރިސްޓު ހަމަލާއަށްފަހު، އިސްލާމް ދީނާ ގުޅުވައިގެން ނަފްރަތު އުފައްދަން ހުއްޓުވަން ސަރުކާރުން ހުށަހެޅި ބިލާމެދު ފާޑުކިޔުންތައް ބޮޑުވުމުން އެ ބިލު ފާސްކުރަން ސަރުކާރުން ފަހަތު ފަޔަށް ބުރަވި މައްސަލައިގައި ވެސް އެމަނިކުފާނު ވަނީ ވަރަށް ބޮޑަށް ނުރުހުންފާޅު ކުރައްވައިފަ އެވެ.
އޭގެ އިތުރުން، ވެރިކަމުގެ ނިޒާމު، ބަދަލުކުރަން އިދިކޮޅު ލީޑަރު އަބްދުﷲ ޔާމީންއާ އެކުގައި މަސައްކަތް ކުރައްވަން ތައްޔާރަށް ހުންނެވިކަމަށް ވެސް ނަޝީދު ވަނީ މި ފަހުން އިއުލާނު ކުރައްވައިފަ އެވެ.
ދެ ރައީސުންގެ ކޯޅުމުގެ އަސަރު އެމްޑީޕީގެ ތެރެއިން ވެސް މިހާރު ދަނީ ފެންނަމުންނެވެ. އެގޮތުން، އެމްޑީޕީގެ ސާފު އަގުލަބިއްޔަތު އޮންނަ މަޖިލީހުގެ އިތުރުން ޕާޓީގެ މައި ގުނަން ކަމަށްވާ ގައުމީ މަޖިލީހުގެ ތެރޭގައި ވެސް ވަނީ ދެ ފެކްޝަނެއް އުފެދިފަ އެވެ.
އެކަމާ ގުޅޭގޮތުން "އަދަދު"ން ކުރި ސުވާލަކަށް ޖަވާބު ދެއްވަމުން ހަސަން ލަތީފް ވިދާޅުވީ ޕާޓީގެ އެންމެ އިސް ދެ ބޭފުޅުންގެ މެދުގައި އޮތް ހިޔާލުތަފާތުވުންތަކަށް ހައްލެއް ހޯދަންޖެހޭ ކަމަށެވެ.
އެގޮތުން، އެ ހިޔާލުތަފާތުވުންތައް އެއް ފަރާތްކޮށް، ދެ ބޭފުޅުން އެކުގައި މަސައްކަތް ކުރެވޭ މަގެއް ހޯދައިދޭން މަސައްކަތް ކުރުމަކީ ޕާޓީގެ ޗެއާޕާސަންގެ ހައިސިއްޔަތުން ކުރައްވަންޖެހޭނެ ކަމެއް ކަމަށް ހަސަން ގަބޫލުކުރައްވަ އެވެ.
"އެހެންވީމާ އެމަގަށް މަސައްކަތް ކުރެވޭނެ ގޮތެއް ހޯދަން އަޅުގަނޑު ވާނެ ރައީސް ސޯލިހާއި އަދި ރައީސް ނަޝީދާ ވެސް ބައްދަލުކުރަން އެދިފައި،" ހަސަން ވިދާޅުވި އެވެ.
އިތުރަށް ވިދާޅުވީ ދެވަނަ ދައުރުގެ ޗުއްޓީއަށްފަހު އަންނަ ހޯމަ ދުވަހު މަޖިލީހުގެ ޖަލްސާތައް ފެށުމުގެ ކުރިން އެ ބައްދަލުވުންތައް ބޭއްވޭތޯ މަސައްކަތް ކުރައްވަމުން އަންނަ ކަމަށެވެ.
ދެ ރައީސުންގެ ހިޔާލުތަފާތުވުން ފިނިކުރަން ޗެއާޕާސަން އިސް ނެންގެވިއިރު، ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް ވަނީ ޕާޓީގެ ތެރޭގައި އުފެދިފައިވާ ބައިބައިވުމަކީ މުޅި ޕާޓީއަށް އޮތް ދެރައެއް ކަމަށް ދޭހަވާ ގޮތަށް ވާހަކަ ދައްކަވައިފަ އެވެ. އެކަމުގައި، އެމަނިކުފާނު ބައްލަވަނީ މަސްލަހަތަށް ކަމަށާއި ކުރިއަށް ވަޑައިގަންނަވާނީ އެ މަގުން ކަމަށް ވާހަކަފުޅު ދެއްކެވި އެވެ.
ޕާޓީގެ ނިންމުންތަކުުގެ ތެރެއިން ރައީސް ނަޝީދު ބޭނުންފުޅުވި ބައެއް ކަންކަމާ ސީދާ ދެކޮޅު ކަން ވެސް ހާމަކުރެއްވި އެވެ. އޭގެތެރޭގައި އިދިކޮޅު ޕީޕީއެމާއި ގުޅިގެން އެމްޑީޕީން މަސައްކަތް ކުރުމާއި ކުއްލި ހާލަތު އިއުލާންކުރުން ހިމެނެ އެވެ.
އެމްޑީޕީގެ އެންމެ އިސް ލީޑަރުގެ ހައިސިއްޔަތުން މަސައްކަތް ކުރައްވާނީ ޕާޓީއަށް ފައިދާހުރި ގޮތަށް ކަމުގެ ޔަގީންކަން ވެސް އޮތީ ދެއްވައިފަ އެވެ.
