ޑުބާއީ، ޔޫއޭއީ (އޯގަސްޓު 11) - މި އަހަރުގެ ފުރަތަމަ ހަ މަސް ދުވަހު ޑުބާއީ އިންޓަނޭޝަނަލް އެއާޕޯޓުގެ ޕެސެންޖާ ޓްރެފިކް 40 ޕަސެންޓު ކުޑަވެއްޖެ އެވެ.
ނަމަވެސް ކޮވިޑާ ގުޅިގެން ދަތުރު ކުރުމުގައި ހުރި ގިނަ ހުރަސްތަކެއް މިހާރު ނެތެމުން ދާތީ ކުރިއަށް އޮތް ތަނުގައި ކުރިއެރުން ލިބޭނެ ކަމަށް ލަފާކޮށްފައި ވެ އެވެ.
ބައިނަލްއަގްވާމީ ދަތުރުތަކަށް ހާއްސަ ދުނިޔޭގެ އެންމެ ބޮޑު އެއާޕޯޓުން މި އަހަރުގެ ފުރަތަމަ ހަ މަސް ދުވަހު ދަތުރު ކުރި މީހުންގެ އަދަދު ވަނީ 10.6 މިލިއަނަށް ވެއްޓިފަ އެވެ.
މިދިޔަ އަހަރުގެ ފުރަތަމަ ކުއާޓާގައި 17.8 މިލިއަން މީހުން ޑުބާއީ އެއާޕޯޓު މެދުވެރިކޮށް ދަތުރު ކުރި އެވެ. ނަމަވެސް 2020 ވަނަ އަހަރު ދެ ވަނަ ކުއާޓާގައި ކޮވިޑާ ގުޅިގެން ކޮމާޝަލް ފްލައިޓުތައް ސަސްޕެންޑު ކުރި އެވެ.
ފަހަކަށް އައިސް ޑުބާއީ އަށް ދަތުރު ކުރާ މީހުންގެ އަދަދު ވަނީ އިތުރު ވާން ފަށާފަ އެވެ. މިދިޔަ ޑިސެމްބަރު މަހު ޔޫއޭއީ އިން ފެށި ވެކްސިން ޕްރޮގްރާމުގައި ގައުމުގެ 10 މިލިއަން މީހުންގެ އާބާދީގެ 72 ޕަސެންޓު މިހާތަނަށް ވަނީ ވެކްސިން ޖަހާފަ އެވެ.
މިދިޔަ އަހަރު ޑުބާއީ އިންޓަނޭޝަލް އެއާޕޯޓުގެ ޓްރެފިކް 70 ޕަސެންޓު ކުޑަވި އެވެ. ދެހާސް ނަވާރަ ވަނަ އަހަރު ދަތުރުވެރިންގެ އަދަދު 86 މިލިއަންގައި ހުރިއިރު، މިދިޔަ އަހަރު އެ އަދަދު 25.9 މިލިއަނަށް ވެއްޓުނެވެ.
އިންޓަނޭޝަނަލް އެއާ ޓްރާންސްޕޯޓް އެސޯސިއޭޝަނުން ލަފާކޮށްފައިވާ ގޮތުގައި ކޮވިޑާ ގުޅިގެން އަޅާފައިވާ ފިޔަވަޅުތަކުގެ ސަބަބުން 2020 ވަނަ އަހަރު މުޅި ދުނިޔޭގެ ޕެސެންޖާ ޓްރެފިކް 66 ޕަސެންޓު ކުޑަވި އެވެ.
