ވެހިކަލްތަކުން ފުރި ބާރުވެފައި އޮތް މާލޭގައި ދުއްވޭނެ ވެހިކަލްތަކުގެ އަދަދު ވަރަށް އަވަހަށް ކަނޑައެޅޭނެ ކަަމަށް މާލޭގެ މޭޔަރު ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
މާލޭގެ ލޭންޑް ޔޫސް ޕްލޭން އެކުލަވާލަން އާއްމުންގެ ހިޔާލު ހޯދަން ރޭ ބޭއްވި ބައްދަލުވުމުގައި މުއިއްޒު ފާހަގަކުރެއްވި ގޮތުގައި ވެހިކަލް އެތެރެކުރެވޭނެ އަދަދު ކަނޑައެޅުމަކީ ގާނޫނުން އެ ކައުންސިލަށް ލާޒިމްކޮށްފައި އޮތް ކަމެކެވެ. އެ މަސައްކަތް ކައުންސިލުން ކުރަމުން އަންނަ އިރު ލަސްތަކެއް މެދުވެރިވެފައި ވަނީ ޓްރާންސްޕޯޓް މިނިސްޓްރީއާ ހެދި ކަމަށް ވިދާޅުވި އެވެ.
އޭނާ ވިދާޅުވި ގޮތުގައި މާލޭގައި މިހާރު ދުއްވަނީ ކިހާ އަދަދެއް އަދި ކޮން ބާވަތެއްގެ ވެހިކަލް ކަން ސާފުކޮށްދޭން ޓްރާންސްޕޯޓުގައި ވާނީ އެދިފަ އެވެ. ސިޓީ ފޮނުވައިގެންނާއި ބައްދަލުކޮށްފައި ވެސް އެ ތަފްސީލްތައް ދޭން އެދިފައިވިޔަސް މިހާތަނަށް މައުލޫމާތު ނުދޭ ކަމަށް ވިދާޅުވި އެވެ.
މުއިއްޒު ވިދާޅުވީ މިނިސްޓަރު އައިޝަތު ނަހުލާއާ އެކު ބޭއްވި ބައްދަލުވުމުގައި ވެސް އެ ވާހަކަ ހިއްސާކުރައްވައި ސިޔާސީ މީހުންނާ އެކު އެ ވާހަކަ ދައްކަވާފައިވާ ކަމަށެވެ.
"އަޅުގަނޑުމެންނަށް މިތަނުގައި ހުރީ އަދި ދުއްވަނީ ކިތައް ވެހިކަލް ކަމެއް ރަސްމީކޮށް ނޭނގި ލިމިޓް ކަނޑައެޅުން އެހާ ދެކޮޅު ޖެހޭ ކަމަކަށް ނުވާނެ," މުއިއްޒު ވިދާޅުވި އެވެ.
"ކައުންސިލްގެ ވިސްނުމަކީ މާލަސްތަކެއް ނުވެ މާލޭގައި ދުއްވޭނެ ވެހިކަލްތަކުގެ އަދަދު ކަނޑައެޅުން."
މާލޭގައި ދުއްވޭނެ ވެހިކަލްތަކުގެ އުމުރު ވެސް ކަނޑައަޅަން ޖެހޭނީ ކައުންސިލުންނެވެ.
މާލޭގެ މަގެއް ވެހިކަލްތަކުން ފުރިފައި: ވެހިކަލްތަކުގެ އަދަދު ކަނޑައެޅުމަކީ ސިޓީ ކައުންސިލްގެ ޒިންމާއެއް.
މުއިއްޒު ވިދާޅުވި ގޮތުގައި މާލޭގެ ޕާކިން މައްސަލަ ހައްލުކުރަން ބިލްޑިންގުތަކެއް އަޅަން ޖެހެ އެވެ. އޭގެ ބޭނުމަކީ ވެހިކަލްތައް އިތުރުކުރުން ނޫން ކަަމަށާއި ކައުންސިލްގެ ވިސްނުމަކީ ވެހިކަލްތައް މަދުކޮށް ހިތްފަސޭހަ ތަނެއްގެ ގޮތުގައި މާލެ ހެދުން ކަމަށް ވިދާޅުވި އެވެ.
މާލޭގެ މަގުތައް ބަންދުކުރުމުން އާއްމުންނަށް ދިމާވާ ދަތިތައް ހައްލުކުރަން ވެސް ރޭގެ ބައްދަލުވުމުގައި ވާހަކަ ދެއްކެވި އެވެ.
މުއިއްޒު ވިދާޅުވީ މާލޭގެ ބައެއް މަގުތައް ފަސޭހަކުރަން ޗާންދަނީ މަގާއި އެ ނޫން ވެސް ބޮޑެތި މަގުތަކުގައި ތާރު އެޅުމުގެ ވިސްނުން ކައުންސިލްގައި އެބަހުރި ކަމަށެވެ. އެކަމަކު ގޮތް ނިންމާނީ މާލޭގެ ރައްޔިތުން ކަަމަށް ވިދާޅުވި އެވެ.
މަގު ހެދުމުގެ މަޝްރޫއުގެ ތެރޭގައި ނުހިމެނުނަސް ޕޭވްމަންޓްތައް މީހުންނަށް ލުއިކޮށް, ޕާކުކުރާނެ ގޮތަށް ވެސް ބަދަލުތަކެއް ގެންނަން ނިންމާފައިވާ ކަމަށް ވިދާޅުވި އެވެ. އެއީ ގެތަކަށް ވަދެ ނުކުމެ އުޅުމުގައި އާއްމުންނަށް ފަސޭހަކުރަން ކަމަށް ވިދާޅުވި އެވެ.
ކޮންސްޓްރަކްޝަން މަސައްކަތަށް މަގުތައް ބަންދުކުރާ އިރު ދުއްވާ މީހުންނަށް އެކަން ނޭނގުމަކީ އުނދަގޫތަކެއް ކުރިމަތިވާނެ ކަމަކަށް ވާތީ, އެކަން ފަސޭހަކުރަން އެޕްލިކޭޝަނެއް ތައާރަފްކުރަން ސިޓީ ކައުންސިލުން ވަނީ ނިންމައިފަ އެވެ.
