ޓެރަރިސްޓު ޖަމާއަތަކާ ގުޅިގެން ސީރިޔާގައި ހަނގުރާމަ ކުރަނިކޮށް އިތުރު ދިވެއްސަކު މިދިޔަ ހަފްތާގައި މަރުވެފައިވާތީ އެކަމުގެ ކަންބޮޑުވުން ކަމުގެ ތަޖުރިބާކާރުން ފާޅުކޮށްފި އެވެ.
ހަޔާތު ތަހްރީރް އަލް ޝާމް ނުވަތަ އެޗްޓީއެސްއާ ގުޅިގެން ހަނގުރާމަ ކުރަނިކޮށް ދެކުނު އިދްލީބުގައި މިދިޔަ ބުރާސްފަތި ދުވަހު ދިވެއްސަކު މަރުވެފައިވާކަން އެ ޖަމާއަތާ ގުޅުން އޮންނަ ބައެއް ސޯޝަލް މީޑިއާ އެކައުންޓުތަކުގައި ވަނީ އިއުލާންކޮށްފަ އެވެ.
އެގޮތުން ޓުވިޓާ، ޓެލެގްރާމް، ފޭސްބުކް އަދި ރެޑިޓްގެ އެކައުންޓުތަކުން އެ ހަބަރު ވަނީ ގެނެސްދީފަ އެވެ. އޭގެ ތެރެއިން ބައެއް އެކައުންޓުތަކަކީ ޓެރަރިސްޓުނާ ގުޅުން އޮތް އެކައުންޓުތައްކަން މި ނޫހުން ވަނީ ކަށަވަރުކޮށްފަ އެވެ.
މަރުވި ކަމަށް އިއުލާންކޮށްފައި ވަނީ އަބޫ އަބްދުއްރަހްމާން ނުވަތަ އަބޫ ހާޖަރެވެ. އޭނާގެ އަސްލު ނަން ހާމަކޮށްފައެއްނުވެ އެވެ. އޭނާ މަރުވެފައި ވަނީ ސީރިޔާ ސަރުކާރާއި ރަޝިޔާގެ ހަނގުރާމަމަތީ ސިފައިން ގުޅިގެން އިދްލީބުގެ ކޮންޓްރޯލް ނެގުމަށް ހިންގި ވަރުގަދަ އޮޕަރޭޝަނެއްގައި ކަމަށްވެ އެވެ. އަދި ދިވެހި މީހާ މަރާލީ ސީރިޔާ ސިފައިންގެ ސްނައިޕަރަކު ބަޑިޖަހައިގެން ކަމަށްވެ އެވެ.
ސީރިޔާގައި ދިވެއްސަކު އަނެއްކާ ވެސް މަރުވުމާ ގުޅިގެން މުހިންމު ދެ ކަމެއް ފާޅުވެއްޖެ ކަމަށް ޓެރަރިޒަމްގެ މައްސަލަތަކާ ގުޅޭ ތަޖުރިބާކާރު އަދި ރާއްޖޭގެ ޓެރަރިޒަމްގެ ހާލަތު ދިރާސާ ކުރައްވާ އާޒިމް ޒާހިރު ފާހަގަ ކުރައްވަ އެވެ. އެއް ކަމަކީ އަދި ވެސް ސީރިޔާއި ދިވެހިން ހަނގުރާމަ ކުރުމެވެ. އަނެއް ކަމަކީ ސީރިޔާގައި އުޅޭ ފަރާތްތަކާ ގުޅިގެން ރާއްޖޭގައި މީހުން ހަރަކާތްތެރިވުމެވެ.
"އެ މީހާގެ މަހާނައިގެ ފޮޓޯއެއް ވެސް ޝެއާކޮށްފަ އިނީ އެކައުންޓުތަކުން. މީގެން އެނގިގެންދަނީ އެ ސަރަހައްދުގައި ދިވެހިން އުޅޭކަން. އަދި އެމީހުންނާ ގުޅިގެން މަސައްކަތް ކުރާ ބަޔަކު ރާއްޖޭގައި އުޅޭކަން،" އޭނާ ވިދާޅުވި އެވެ.
އޭގެ އިތުރުން އެފަދަ ޓެރަރިސްޓު އެކައުންޓުތަކުން ކުރާ ޕޯސްޓުތަކަށް ލައިކްކޮށް ހެދުން ވެސް އެއީ މައްސަލައެއްގެ ގޮތުގައި އާޒިމް ފާހަގަ ކުރައްވަ އެވެ.
އެޗްޓީއެސްއަކީ ކުރިން ދިވެހި ޓެރަރިސްޓުންގެ ތެރޭގައި މަގްބޫލް ޖަމާއަތް އަލް ނުސްރާ ފްރަންޓާއި ޖަބްހަތު ފަތަހް އަލް ޝާމް އެކުވެގެން އުފެދުނު ޖަމާއަތެކެވެ. އޭގެ އިތުރުން ދިވެހިން ދެން އެންމެ ގިނައިން ހަނގުރާމަކޮށްފައި ވަނީ ޓެރަރިސްޓު ޖަމާއަތް އައިސިސްއާ ގުޅިގެންނެވެ.
އެޗްޓީއެސް ކުރިން މަސައްކަތް ކުރީ ސީރިޔާގެ ސަރުކާރު އަދި އެތަނުގައި ހަނގުރާމަ ކުރި ބައެއް އެހެން ޖަމާއަތްތަކާ ދެކޮޅަށް ޖިހާދުގެ ނަމުގައި ހަރަކާތްތެރިވާ ގްރޫޕެއްގެ ގޮތުގަ އެވެ. ނަމަވެސް މިހާރު އެ ޖަމާއަތުން މަސައްކަތް ކުރަނީ އިދުލީބުގައި ވަކި ސަރުކާރެއް ހަދައި ދުނިޔޭގެ ބަލައިގަތުން ހޯދުމަށެވެ.
ތަޖުރިބާކާރު ބުނާ ގޮތުގައި އެޗްޓީއެސްގެ ލީޑަރު އަބޫ މުހައްމަދު އަލް ގޮލާނީ މިހާރު މަސައްކަތް ކުރަނީ ހުޅަނގުގެ ގައުމުތަކުގެ ރުހުން ހޯދުމަށެވެ. އެމެރިކާގެ ޕީބީއެސް ފްރޮންޓްލައިނަށް ނިމިދިޔަ އޭޕްރީލް މަހު ގޮލާނީ އިންޓަވިއުއެއް ދިނުމަކީ ރުހުން ހޯދުމުގެ އެޖެންޑާގެ ތެރެއިން ހިންގި ހަރަކާތެއް ކަމަށް ތަޖުރިބާކާރުން ދެކެ އެވެ.
