މުޖުތަމައުގައި އުޅޭ ކުޑަކުދިންނަށް ފުޓްބޯޅައިގެ ތެރެއިން ރައްކާތެރިކަން ކަށަވަރުކޮށްދިނުމުގެ ހާއްސަ އަމާޒެއްގައި އެފްއޭއެމް އާއި އެޑްވޮކޭޓިން ރައިޓްސް އޮފް ޗިލްޑްރެން (އާކް) އިން އެކުލަވާލި "އެފްއޭއެމް ޗައިލްޑް ސޭފްގާޑިން ޕޮލިސީ" ގެ މަސައްކަތް ރައީސް އިބްރާހިމް މުހައްމަދު ސޯލިހު ފާހަގަކުރައްވައިފި އެވެ.
ބުރާސްފަތި ގަލޮޅު ދަނޑުގައި ބޭއްވި ހަފްލާއެއްގައި އެފްއޭއެމްގެ މި ޕޮލިސީ ލޯންޗް ކޮށްދެއްވީ ރައީސް އިބްރާހިމް މުހައްމަދު ސޯލިހްގެ އަނބިކަނބަލުން، ފަސްޓް ލޭޑީ ފަޒްނާ އަހްމަދެވެ.
ރައީސް ކުރެއްވި ޓްވީޓެއްގައި ވިދާޅުވީ މިއީ ފުޓްބޯޅައިގައި ބައިވެރިވެ އުޅޭ ކުޑަކުދިންގެ ރައްކާތެރިކަން ކަށަވަރުކޮށްދެވޭނެ ފަދަ ޕޮލިސީ އެއް ކަމަށެވެ.
"މަދަނީ މުޖުތަމައުން ކުޑަކުދިންގެ ރައްކާތެރިކަން ކަށަވަރުކުރަން އަމިއްލަ އަށް އިސްނަަގައިގެން ކުރާ މި ފަދަ ކަންތައްތަކުގެ ސަބަބުން ހިތަށް ވަރަށް ބޮޑު ފިނިކަމެއް ލިބިގެންދޭ،" ރައީސް ވިދާޅުވި އެވެ.
އެފްއޭއެމް އިން މި ލޯންޗްކުރި ޗައިލްޑް ސޭފްގާޑިން ޕޮލިސީ އަކީ އެފްއޭއެމް ފައުންޑޭޝަނުން ކުރި މަސައްކަތެކެވެ. މިދިޔަ އަހަރު ނޮވެމްބަރު މަހު ލޯންޗް ކުރެވުނު އެފްއޭއެމް ފައުންޑޭޝަނުން ވަނީ މިހާތަނަށް ވެސް މުޖުތަމައު އަށް ފައިދާހުރި ގިނަ ޕްރޮޖެކްޓްތަކެއް ކުރިއަށް ގެންގޮސްފަ އެވެ.
މި ޕޮލިސީ އިން ކަށަވަރުކޮށްދޭ ކަންތައްތަކަށް ބަލާއިރު، ކޮންމެ ކަމެއް ނިންމުމުގައި ވެސް ކުއްޖާގެ ހައްގަށް އިސްކަން ދިނުމާއި ކުޑަކުދިންގެ ހައްގުތަކަށް ހުރިހާ ފަރާތެއް އިހުތިރާމްކުރުމާއި އެއްވެސް ޒާތެއްގެ ނަސްލީ ތަފާތުކުރުމެެއް ނުގެންގުޅުން ހިމެނެ އެވެ. ދެން ހިމެނެނީ ބޮޑެތި މީހުންގެ ޒިންމާ ބޮޑުވާ ގޮތްގޮތަށް ކުޑަކުދިންގެ ހައްގު ކަށަވަރުކުރުން އަދި ކުދިންގެ ހައްގަށް އިސްކަންދީގެން އެފްއޭއެމުން ވެސް ކުރެވެން ހުރި ހުރިހާ ކަމެއް ކުރުމެވެ.
ކުޑަކުދިންގެ ހައްގުގައި މި ލޯންޗްކުރެވުނު ޕޮލިސީގެ ކަންކަން ތަންފީޒްކުރަން އެފްއޭއެމުން ވެސް ގިނަ ކަންތައްތަކެއް ކުރާނެ އެވެ. އެގޮތުން އެފްއޭއެމުން ހާއްސަ ސޭފްގާޑް ޔުނިޓެއް އެކުލަވާލައި ޗައިލްޑް ސޭފްގާޑް ކޮމިޓީއެއް ހަދައި ޗައިލްޑް ސޭފްގާޑް އޮފިސަރެއް އައްޔަނުކޮށް އަދި ޗައިލްޑް ސޭފްގާޑް ފޯކަލް ޕޮއިންޓުން ހަމަޖައްސާނެ އެވެ. މީގެ ތެރެއިން ފޯކަލް ޕޮއިންޓް ހަމަޖައްސަން ޖެހޭނީ ކްލަބްތަކާއި އެކަޑަމީތަކުގަ އެވެ. އޭގެ އެންމެ ބޮޑު ބޭނުމަކީ ޗައިލްޑް ސޭފްގާޑާ ގުޅޭ ކަންކަމުގައި ސީދާ ޝާމިލުވެ އުޅޭ ފަރާތެއް އެނގޭ ގޮތަށް ހުރުމެވެ.
އެފްއޭއެމުން ވަނީ ޗައިލްޑް ސޭފް ގާޑިން ޕޮލިސީއާ ގުޅޭ މައުލޫމާތުގެ ސެޝަނެއް އައްޑޫ ސިޓީގައި ކުރިއަށް ގެންގޮސްފަ އެވެ.
