ރިޔާދް، ސައުދީ އަރަބިއްޔާ (އޯގަސްޓު 8) - ކޮވިޑުގައި މަރުވާ ސައުދީ އަރަބިއްޔާގެ ސިއްހީ މަސައްކަތްތެރިންގެ އާއިލާތަކަށް ބަދަލުގެ ގޮތުގައި ފައިސާގެ އެހީ ދޭން ފަށައިފި އެވެ.
ދައުލަތުގެ މީޑިއާއިން އާދީއްތަ ދުވަހު އެގޮތަށް ރިޕޯޓު ކުރިއިރު، މިދިޔަ އަހަރު ސައުދީ ސަރުކާރުން އިއުލާނު ކުރި ގޮތުގައި ކޮންމެ އާއިލާއަކަށް ވެސް ބަދަލުގެ ގޮތުގައި 500,000 ސައުދީ ރިޔާލު (133،000 ޑޮލަރު) ލިބޭނެ އެވެ.
މި އެހީ ދިނުމުގައި މަރުވި މުވައްޒަފު ނިސްބަތްވަނީ ސަރުކާރު ނުވަތަ އަމިއްލަ ހޮސްޕިޓަލަކަށްތޯ، މަދަނީ ނުވަތަ އަސްކަރީ ހޮސްޕިޓަލަކަށްތޯ ނުބަލާނެ ކަމަށާއި ސައުދީ ރައްޔިތުންނާއި އެހެން ގައުމުތަކުގެ ރައްޔިތުންގެ މެދުގައި ތަފާތު ނުކުރާނެ ކަމަށް ބުނެފައި ވެ އެވެ.
ތެލުގެ މުއްސަނދިކަން ލިބިފައިވާ ސައުދީ ސަރުކާރުން ބުނީ އެ ނިންމުމުގައި ބަލާނީ ސައުދީ އަރަބިއްޔާގެ އެންމެ ފުރަތަމަ ކޮވިޑް ކޭސް ފެނުނު މާޗް 2، 2020 ވަނަ ދުވަހުން ފެށިގެން މަރުވި ސިއްހީ މަސައްކަތްތެރިންނަށް ކަމަށެވެ.
ސައުދީ އަރަބިއްޔާއިން ކޮވިޑުގައި މިހާތަނަށް މަރުވީ ކިހާ އަދަދެއްގެ ސިއްހީ މަސައްކަތްތެރިންނެއް ކަމެއް ސާފެއް ނޫނެވެ. ނަމަވެސް އެހެން ގައުމުތަކުގެ އެތައް ހާސް ރައްޔިތުން ސިއްހީ މަސައްކަތްތެރިންގެ ގޮތުގައި ސައުދީގައި މަސައްކަތް ކުރެ އެވެ.
ބަލިމަޑުކަމުގެ އަސަރު ކުޑަ ކުރުމުގެ ގޮތުން ސައުދީ އަރަބިއްޔާއިން މަސައްކަތް ކުރަމުން ދަނީ ވެކްސިން ޕްރޮގްރާމްގެ ދުވެލި އަވަސް ކުރުމަށެވެ. އެގޮތުން ސަރުކާރުގެ އެއްވެސް އިމާރާތަކަށް ވަދެވޭނީ ވެކްސިން ޖަހާފައިވާ މީހުންނަށް ކަމަށް އަންގާފައި ވެ އެވެ.
އޭގެ އިތުރުން ތައުލީމް ފޯރުކޮށްދޭ ތަންތަނާއި މުނިފޫހިފުލުވުމުގެ މަރުކަޒުތައް އަދި އާއްމު ދަތުރުފަތުރުގެ ނިޒާމު ވެސް ބޭނުން ކުރެވޭނީ ހަމައެކަނި ވެކްސިން ޖަހާފައިވާ މީހުންނަށެވެ.
ހެލްތު މިނިސްޓްރީން ހޮނިހިރު ދުވަހު އިއުލާނު ކުރި ގޮތުގައި މިހާތަނަށް ވެކްސިންގެ 29 މިލިއަން ޑޯޒް ދޫކޮށްފައިވާއިރު، 35 މިލިއަން މީހުންގެ އާބާދީގެ ތެރެއިން ގާތްގަނޑަކަށް 10 މިލިއަން މީހުން ވަނީ ވެކްސިންގެ ޑޯޒު ފުރިހަމަކޮށްފަ އެވެ.
ސައުދީ އަރަބިއްޔާއިން މިހާތަނަށް ކޮވިޑް ބަލީގެ 532،000 ކޭސް ފެނިފައި ވާއިރު، 8،300 މީހުން މި ބަލީގައި މަރުވެފައި ވެ އެވެ.
