ރިޔާދް، ސައުދީ އަރަބިއްޔާ (އޯގަސްޓު 8) - ކޮވިޑް ބަލިމަޑުކަމާ ގުޅިގެން ސައުދީ އަރަބިއްޔާގެ ބޯޑަރު ބަންދު ކުރިތާ 18 މަސް ފަހުން، އެހެން ގައުމުތަކުގެ ވެކްސިން ފުރިހަމަކޮށްފައިވާ މީހުންނަށް އުމްރާގެ އަޅުކަމަށް މައްކާއަށް ޒިޔާރަތް ކުރުމުގެ ހުއްދަ ދޭން ތައްޔާރުވެއްޖެ އެވެ.
ދައުލަތުގެ މީޑިއާ، ސައުދީ ޕްރެސް އެޖެންސީން ރިޕޯޓު ކުރި ގޮތުގައި ބޭރުގެ އުމްރާވެރިންގެ ކަންކަން ބެލެހެއްޓުމާ ހަވާލުވެފައިވާ މިނިސްޓްރީގެ ކަމާ ބެހޭ ފަރާތްތަކުން ހޯމަ ދުވަހުން ފެށިގެން އެކި ގައުމުތަކުގެ މީހުން އުމްރާ ކުރުމަށް އެދި ފޮނުވާ ރިކުއެސްޓުތައް ބަލައިގަންނަން ފަށާނެ އެވެ.
ކޮވިޑުގެ ބަލިމަޑުކަމާ ހެދި އުމްރާ އާއި ހައްޖުގެ އަޅުކަމަށް ވެސް ވަރަށް ބޮޑަށް ބުރޫއެރި އެވެ. އެތައް މިލިއަން މީހުން ކޮންމެ އަހަރަކު ވެސް މި ދެ އަޅުކަން އަދާ ކުރާއިރު، ބަލިމަޑުކަމަށް ފަހު އެ ފުރުސަތު ލިބެމުން ދަނީ ވަރަށް މަދު އަދަދެއްގެ މީހުންނަށެވެ.
މީގެ ކުރިން އުމްރާ ކުރުމުގެ ހުއްދަ ދޫކުރަމުން ދިޔައީ ހަމައެކަނި ވެކްސިން ފުރިހަމަކޮށްފައިވާ ސައުދީ އަރަބިއްޔާގައި ދިރިއުޅޭ މީހުންނަށް އެކަންޏެވެ.
ސައުދީ ޕްރެސް އެޖެންސީން ބުނީ އުމްރާ ކުރުމަށް ސައުދީ އަރަބިއްޔާއަށް އެތެރެވާން ބޭނުންވާ ފަރާތްތަކުގެ ވަކި ޝަރުތުތަކެއް ފުރިހަމަ ވާން ޖެހޭ ކަމަށެވެ. އެގޮތުން ސައުދީން ބަލައިގަންނަ ކޮވިޑް ވެކްސިނެއްގެ ޑޯޒްތައް ފުރިހަމަކޮށްފައި ވުމާއި، ކަރަންޓީނު ވާން އެއްބަސްވާން ޖެހެ އެވެ.
ބަލިމަޑުކަމުގެ އަސަރު ކުޑަ ކުރުމުގެ ގޮތުން ސައުދީ އަރަބިއްޔާއިން މަސައްކަތް ކުރަމުން ދަނީ ވެކްސިން ޕްރޮގްރާމްގެ ދުވެލި އަވަސް ކުރުމަށެވެ. އެގޮތުން ސަރުކާރުގެ އެއްވެސް އިމާރާތަކަށް ވަދެވޭނީ ވެކްސިން ޖަހާފައިވާ މީހުންނަށް ކަމަށް އަންގާފައި ވެ އެވެ.
އޭގެ އިތުރުން ތައުލީމް ފޯރުކޮށްދޭ ތަންތަނާއި މުނިފޫހިފުލުވުމުގެ މަރުކަޒުތައް އަދި އާއްމު ދަތުރުފަތުރުގެ ނިޒާމު ވެސް ބޭނުން ކުރެވޭނީ ހަމައެކަނި ވެކްސިން ޖަހާފައިވާ މީހުންނަށެވެ.
ސައުދީ އަރަބިއްޔާއިން މިހާތަނަށް ކޮވިޑް ބަލީގެ 532،000 ކޭސް ފެނިފައި ވާއިރު، 8،300 މީހުން މި ބަލީގައި މަރުވެފައި ވެ އެވެ.
