ޕެރިސް (އޮގަސްޓް 8) - ފްރެންޗް ލީގުގެ އާ ސީޒަނުގައި ޕީއެސްޖީ ކުޅުނު ފުރަތަމަ މެޗުން ރޭ ފަހަތުން އަރައި 2-1 އިން ޓްރޯޔެސްގެ މައްޗަށް ކުރިހޯދައިފި އެވެ.
މީގެ ފަސް ދުވަސް ކުރިން ފްރެންޗް ސުޕަ ކަޕްގައި ލިލް އަތުން ބަލިވުމުން ޕީއެސްޖީން ލީގުގެ ފުރަތަމަ މެޗުން ރަނގަޅު ކުޅުމަކާ އެކު މޮޅެއް ހޯދަން އަމާޒުހިފި އެވެ. އެކަަމަކު، ޓްރޯޔެސް ކައިރީގައި ޕީއެސްޖީ އަށް އެންމެ ރަނގަޅު ކުޅުމެއް ނުދެއްކުނެވެ. މެޗުން މޮޅުވެވުނީ ވެސް ލިބުނު ބޯޅަތަކަށް ބަލާއިރު މަދު ފުރުސަތުތަކެއްގެ ބޭނުން ހިފައިގެންނެވެ.
އަމިއްލަ ދަނޑުގައި ކުޅުނު ޓްރޯޔެސް އިން ވަނީ މެޗުގެ ނުވަ ވަނަ މިނިޓްގައި ލީޑުނަގައިފަ އެވެ. މި ގޯލު ކާމިޔާބުކުރީ އޫލިދު އެލް ހައްޔާމް ބޮލުންނެވެ. ޓްރޯޔެސް އަށް ލީޑު ހިފަހައްޓައިލެވުނީ 10 މިނިޓް އެވެ. އެންޑަ ހެރޭރާ ދިން ބޯޅަ އަކުން މެޗުގެ 19 ވަނަ މިނިޓްގައި އަޝްރަފް ހަކީމީ ވަނީ ޕީއެސްޖީ އަށް އެއްވަރުކޮށްދީފަ އެވެ. ހަކީމީ އަކީ މި ފަހަރުގެ ޓްރާންސްފާ މާކެޓްގައި ޕީއެސްޖީން ގަތް ކުޅުންތެރިއެކެވެ.
ނަތީޖާ ހަމަހަމަ ކުރިތާ ދެ މިނިޓް ފަހުން ޕީއެސްޖީން ވަނީ ލީޑުނަގައިފަ އެވެ. މި ގޯލު ޖެހީ ކީލިއަން އެމްބާޕޭ ދިން ބޯޅައަކުން މައުރޯ އިކާޑީ އެވެ. ފަހުން ވެސް ލަނޑު ޖަހާނެ ރަނގަޅު ބޯޅަތަކެއް ލިބުނު ނަަމަވެސް ޕީއެސްޖީ އަށް ބޭނުމެއް ނުހިފުނެވެ.
މި ފަހަރުގެ ޓްރާންސްފާ މާކެޓްގައި ޕީއެސްޖީން ގެނައި ލިވަޕޫލްގެ މިޑްފީލްޑަރު ޖިއޮޖީނިއޯ ވައިނަލްޑަމް ރޭގެ މެޗުގައި ކުޅުނެވެ. އެކަމަކު، ސާޖިއޯ ރާމޯސް އާއި ޖިއަންލުއީޖީ ޑޮންނަރުންމާ މި މެޗުގައި ވެސް ނުފެނެ އެވެ.
ޕީއެސްޖީން އަންނަނީ ބާސެލޯނާގެ ކެޕްޓަން ލިއޮނަލް މެސީ ގެންނަން މަޝްވަރާކުރަމުންނެވެ. އަދި ކުރިއަށް އޮތް ދެ ދުވަސް ތެރޭ އެ ޓްރާންސްފާގެ ކަންކަން ނިމޭނެ ކަމަށް މީޑިއާ ރިޕޯޓްތައް ބުނެ އެވެ.
އެކަމަކު، ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނީ މެސީގެ ޓްރާންސްފާއާ ބެހޭގޮތުން ވަރަށް ގިނަ ގޮތްގޮތަށް ވަރަށް ގިނަ ވާހަކަ އެބަދެކެވޭ ކަމަށާއި އޭނާގެ ވިސްނުމަކީ ވާދަކުރާ ކޮންމެ މުބާރާތެއް ކާމިޔާބު ކުރެވޭ ވަރަށް ޕީއެސްޖީ ވަރުގަދަ ވުން ކަމަށެވެ.
ލީގުގައި ރޭ ލިޔޯން ކުޅުނު މެޗުން ވަނީ 1-1 އިން ބްރެސްޓާ އެއްވަރުވެފަ އެވެ.
