ޖަލުތަކަށް މަނާ ތަކެތި ވައްދާ މައްސަލަ ހައްލު ކުރެވެންދެން އޮޕަރޭޝަންތައް ކުރިއަށް ގެންދާނެ ކަމަށް މޯލްޑިވްސް ކަރެކްޝަންސް ސާވިސް އިން ބުނެފި އެވެ.
މީގެ ކުރިންވެސް ޖަލުތަކުން ވަނީ ޖަލަށް ވެއްދުން މަނާ ތަކެތި އަތުލައިގެންފަ އެވެ. ޖަލަށް މަނާ ތަކެތި ވެއްދުމަކީ މިހާރު ވެސް ހިނގަމުންދާ ކަމެއް ކަމަށް ކަރެކްޝަނުން މީގެ ކުރިން ވަނީ ބުނެފަ އެވެ.
ކޮމިޝަނާ އޮފް ޕްރިޒަންސް އަހްމަދު މުހައްމަދު ފުޅު ވިދާޅުވީ ހުސްވި ހަފްތާތެރޭ އައްސޭރިޖަލާއި މާފުށީ ޖަލުގައި ގިނަ އޮޕަރޭޝަންތަކެއް ކުރިއަށް ގެން ގޮސްފައިވާ ކަމަށެވެ.
އަދި ޖަލުތަކަށް ތަކެތި ވައްދާ މައްސަލައަށް ދާއިމީ ހައްލު ހޯދެންދެން، އަވަސްއަވަހަށް އޮޕަރޭޝަންތައް ކުރިޔަށް ގެންދެވޭނެ ކަމަށްވެސް އޭނާ ވިދާޅުވި އެވެ.
އެ އޮޕަރޭޝަންތަކުގައި ގިނަ އަދަދެއްގެ މަނާ ތަކެތި އަތުލާގަނެފައިވާއިރު އޭގެ ތެރޭގައި ހިމެނެނީ 44 މޯބައިލް ފޯނާއި، 8 މޯބައިލް ފޯނު ބެޓެރި، 7 ސިމް ކާޑު، 7 ފޯނު ހެޑްސެޓު، 22 މޯބައިލް ފޯނު ޗާޖަރު، 3 ޕެން ޑްރައިވްގެ މަސްތުވާ ތަކެއްޗަށް ޝައްކުކުރެވޭ 10 ރަބަރު ޕެކެޓު ކަމަށް ކަރެކްޝަނުން މައުލޫމާތުދެ އެވެ.
ގައިދީންނާ ބައިވެރިވެގެން ޖަލަށް މަނާ ތަކެތި ވައްދަން އެހީތެރިވަނީ ޖަލު އޮފިސަރުން ކަމަށް އަހުމަދު ވަނީ މީގެ ކުރިން "އަދަދު" އަށް ދެއްވި އިންޓަވިއު އެއްގައި ވިދާޅުވެފަ އެވެ.
އަދި އެ ފަރާތްތަކަށްވެސް ފިޔަވަޅު އަޅާނެ ކަމަށް އޭނާ ވިދާޅުވި އެވެ.
"އަޅުގަނޑުމެން މިހާރު މި ދަނީ އެންމެ ޖޫނިއާ ލެވެލްގެ މީހުންނާއެކު ސިޓް ކުރަމުން. އަޅުގަނޑު ބުނެފައި އޮންނާނީ އެއްވެސް ވަރަކަށް ޓޮލެރޭޓް ނުކުރާނަމޭ އެކަހަލަ އެއްވެސް މައްސަލައެއް. އެކަހަލަ މައްސަލައެއް ދިމާވެގެން ފިޔަވަޅު އަަޅަންޖެހިއްޖެޔާ އެންމެ ހަރުކަށި ފިޔަވަޅު އަޅާނީ. އަދި އިދާރީ ފިޔަވަޅު އެޅުމަށްފަހު ނިންމައެއް ވެސް ނުލާނަން. ޖިނާއީ ތަހުގީގު ކުރުމަށް ފޮނުވަން ވެސް މި ތިބީ ތައްޔާރަށް،"
