މާލޭ އިންޑަސްޓްރިއަލް ވިލެޖަކީ މާލެ ސިޓީ ކައުންސިލުގެ އިހުތިސޯސްގެ ދަށުގައި އޮތް ބިމެއް ނޫން ކަން ޕްލޭނިން މިނިސްޓްރީން މިއަދު އަންގައިފި އެވެ.
ޕްލޭނިން މިނިސްޓްރީން މިގޮތަށް އަންގާފައިވަނީ މޭރީބްރައުން ކުރިމަތިން އިންޑަސްޓްރިއަލް ޒޯން ބިއްދޮށުން ސްޓެލްކޯއަށް 2016 ވަނަ އަހަރު ދީފައިވާ 21،000 އަކަފޫޓްގެ ބިމެއް ސިޓީ ކައުންސިލުން އަތުލިކަމުގެ ތުހުމަތު ކުރެވިފައިވަނިކޮށެވެ.
އެ ބިން ސްޓެލްކޯއިން އޮތީ ވަށައިގެން ފެންސް ޖަހައި ބަންދުކޮށްފައި ވަނިކޮށް މިދިޔަ އީދު ބަންދުގެ ތެރޭގައި އެ ފެންސްގެ ބޮޑު ބައެއް ވަނީ ސިޓީ ކައުންސިލުން ނަގައިފަ އެވެ.
ސިޓީ ކައުންސިލުން އެ ބިން ހުސްކުރިއިރު އެތަނުގެ ތެރޭގައި ގުދަންކޮށް ބަހައްޓާފައި ހުރި ސީސީޓީވީ ހަރުކުރާ ސާމާނުތައް ވެސް ގެއްލިފައިވާ ކަމަށާއި އެ ތަކެތީގެ އަގު ކުރަން ވެސް ދަތި ކަމަށް ސްޓެލްކޯއިން ބުނެފައި ވެ އެވެ.
އެކަމާ ގުޅިގެން ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަލް ކަމާލުއްދީން ސޮއިކުރައްވައި މާލެ ސިޓީގެ މޭޔަރު ޑރ. މުހައްމަދު މުއިއްޒަށް ފޮނުއްވާފައިވާ ސިޓީއެއްގައި ބުނެފައި ވަނީ އެ އިދާރާއިން މާލޭގައި ގާއިމުކުރާ ސަބްސްޓޭޝަންގެ ކޮންސްޓްރަކްޝަން މަސައްކަތަށް ބޭނުންވާ މެޓީރިއަލްސް ފަދަ ތަކެތި ބެހެއްޓުމަށް މާލޭ އިންޑަސްޓްރިއަލް ވިލެޖުން ސްޓެލްކޯއަށް ދޫކޮށްފައިވާ ބިމުގައި ޖަހާފައިވާ ފެންސާއި އެތަނުގައި ބަހައްޓާފައިވާ ތަކެތި ކައުންސިލުން ނަގާފައިވާކަމުގެ މައުލޫމާތު ލިބިފައިވާ ކަމަށެވެ.
އޭގެ އިތުރުން މާލޭގައި ދެމުންދާ ބަހުގެ ހިދުމަތާއި ގުޅިގެން ބަސްޑެޕޯގެ ގޮތުގައި ބޭނުންކުރުމަށް އިންޑަސްޓްރިއަލް ވިލެޖުގެ ތިން ނަމްބަރު ކޮށިން ވަގުތީގޮތުން ކަނޑައަޅާފައިވާ ބިން މާލެ ސިޓީ ކައުންސިލުން ބަންދުކޮށްފައިވާކަމުގެ މައުލޫމާތު ވެސް ލިބިފައިވާ ކަމަށެވެ.
މިނިސްޓްރީން ބުނީ އިންޑަސްޓްރިއަލް ވިލެޖުގެ ބިމަކީ ސިޓީ ކައުންސިލާ ހަވާލުކުރެވިފައިވާ ބިމެއް ނޫންކަމަށާއި އެ ބިމަކީ ސްޓެލްކޯގެ ބޭނުމަށް ވަގުތީ ގޮތުން ދޫކޮށްފައިވާ ބިމެއް ކަމަށެވެ.
"...އިންޑަސްޓްރިއަލް ވިލެޖުގެ ބިމަކީ ތިޔަ އިދާރާއާ ހާވާލުކުރެވިފައިވާ ބިމެއް ނޫންކަމުގައި ދެންނެވީމެވެ،" އެ ސިޓީގައި ބުންޏެވެ.
އެހެންކަމުން، މާލޭ އިންޑަސްޓްރިއަލް ވިލެޖުން ސްޓެލްކޯގެ ބޭނުމަށް ދޫކޮށްފައިވާ ބިމުގައި ޖަހާފައިވާ ފެންސާއި އެތަނުގައި ހުރި ތަކެތި ކައުންސިލުން ނަގާފައިވާނަމަ އެތަކެތި އެ ކުންފުންޏާ ހަވާލުކޮށް ދިނުމަށް އެ ސިޓީގައި އެދިފައި ވެ އެވެ.
އޭގެ އިތުރުން އިންޑަސްޓްރިއަލް ވިލެޖްގެ ތިން ނަންބަރު ކޮށީގެ ބިން ވެސް ކައުންސިލުން ބަންދުކޮށްފައިވާނަމަ އެކަން ހުއްޓާލުމަށް ވެސް އަންގާފައި ވެ އެވެ.
އެ ސިޓީއާ ގުޅޭގޮތުން އަކްރަމް މިރޭ "އަދަދު"އަށް ވިދާޅުވި ގޮތުގައި އެ ބިމުގެ މައްސަލަ ސާފުކުރަން މުއިއްޒުއަށް ގުޅުއްވި ކަމަށާއި، ނަމަވެސް އެކަމުގެ މައުލޫމާތެއް އެނގިވަޑައިނުގަންނަވާކަމަށް ވިދާޅުވި ކަމަށެވެ،
"ވިދާޅުވި ބައްލަވާލައްވާނަމޭ. އެކަމަކު އޭގެ ފަހުން ފޯނެއް ނުނަންގަވާ. އެހެންވީމާ އަޅުގަނޑުމެން މިއަދު މި ސިޓީ ފޮނުވީ،" އަކްރަމް ވިދާޅުވި އެވެ.
އިތުރަށް ވިދާޅުވީ އިންޑަސްޓްރިއަލް ވިލެޖަކީ ސިޓީ ކައުންސިލާ އެއްވެސް އިރެއްގައި ހަވާލުކޮށްފައިވާ ބިމެއް ނޫން ކަމަށެވެ.
ބިން އަތުލި މައްސަލަ ސްޓެލްކޯއިން ފުލުހުންނަށް ހުށަހެޅުމުން ފުލުހުން ވަނީ ތަހުގީގު ފަށައިފަ އެވެ.
ސްޓެލްކޯއިން ބުނީ އެ ބިން ހުސްކުރުމާ ގުޅޭގޮތުން ސިޓީ ކައުންސިލުން މިހާތަނަށް އެއްވެސް އެއްޗެއް އެ ކުންފުންޏަށް އަންގާފައި ނުވާ ކަމަށެވެ.
އެކަމާ ގުޅޭގޮތުން މާލޭގެ މޭޔަރު ޑރ. މުހައްމަދު މުއިއްޒާ "އަދަދު" އިން ސުވާލު ކުރުމުން ވިދާޅުވީ އެފަދަ ކަމެއް ހިނގިކަން އެނގިވަޑައިނުގަންނަވާ ކަމަށެވެ.
