މިލާން (އޮގަސްޓް 7) - އިންޓަ މިލާންގެ މިޑްފީލްޑަރު ކްރިސްޓިއަން އެރިކްސަންގެ ސިއްހީ ހާލަތު ދެނެގަންނަން ހަދާ ޓެސްޓްތަކަށް ފަހު އޭނާ އަޒުމު ކަނޑައަޅައިގެން ހުރީ މި ސީޒަނުގައި އަލުން ދަނޑަށް އެނބުރި އައުމަށް ކަމަށް މީޑިއާ ރިޕޯޓްތައް ބުނެފި އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ޑެންމާކުން ފިންލެންޑާ ބައްދަލުކުރި މެޗުގެ ފުރަތަމަ ހާފުގެ ފަހު ކޮޅުގައި އެރިކްސަން ހިތްހުއްޓިގެން ދަނޑުމައްޗަށް ވެއްޓުނެވެ. ވަގުތުން ހޮސްޕިޓަލަށް ގެންގޮސް ފަރުވާދީ ހެދި ޓެސްޓްތަކުން އެނގުނީ އެރިކްސަން ހިތަށް އިމްޕްލާންޓަބަލް ކާޑިއޮވާޓާ ޑެފިބްރިލޭޓާ (އައިސީޑީ) ލައްވަން ޖެހޭ ކަމެވެ.
އެރިކްސަން ހިތަށް އައިސީޑީ ލެއްވިއިރު، އެ ޑިވައިސް އަކީ ހާޓް ރޭޓް ކޮންޓްރޯލް ވަރެއްގައި ދެމެހެއްޓުމަށް ހަރުކުރާ ޑިވައިސް އެކެވެ. ހިތުގެ ވިންދު މާ އަަވަސްވާނަމަ އައިސީޑީން އެ ޑިޓެކްޓްކޮށް ކޮންޓްރޯލް ކުރާނެ އެވެ.
އައިސީޑީ ލައްވައިގެން ހުރެ, އެރިކްސަން އަށް އިޓާލިއަން ލީގުގައި ނުކުޅެވޭނެ ކަމަށް ބުނެފައިވަނިކޮށް އެރިކްސަން ދާދި ފަހުން ވަނީ އިންޓަގެ ޓްރެއިނިން ސެންޓަރަށް ގޮސް ކްލަބްގެ މީހުންނާ ބައްދަލުކޮށްފަ އެވެ. އެރިކްސަން، އިންޓަގެ ޓްރެެއިނިން ސެންޓަރަށް ދިޔައީ އަލުން ކެރިއަރު ކުރިއަށް ގެންދަން ބަލާއިރު ހަދަންޖެހޭ މެޑިކަލް ޓެސްޓްތަކެއް ހެދުމަށެވެ.
އިންޓަ ޓީމުން އެރިކްސަން އަށް ހާއްސަ މަރުހަބާއެއް ކިޔައި އޭނާ އަށް ވަނީ ކުރިއަށް އޮތް ސީޒަނުގެ ޖޯޒީއެއް ހަދިޔާކޮށްފަ އެވެ. އެރިކްސަންއާ ބެހޭގޮތުން އިންޓަ އިން އެ ދުވަހު ނެރުނު ބަޔާނެއްގައި ބުނެފައިވަނީ "ފިޒިކަލީ އަދި މެންޓަލީ" އެރިކްސަން ހުރީ ރަނގަޅަށް ކަމަށެވެ.
އެރިކްސަން އިންޓަގެ ޓްރެއިނިން ސެންޓަރުގައި.
އެރިކްސަން އެ ދުވަހު އިންޓަގެ ސްކޮޑާ އެކު ގިނަ ވަގުތުތަކެއް ހޭދަކުރިއިރު، ކެރިއަރުގައި ކުރިއަށްދިއުމާ ބެހޭގޮތުން ވަނީ ކުޅުންތެރިންނާ އެކު މަޝްވަރާކޮށްފަ އެވެ.
"އެރިކްސަން ހުރީ ހަތަރެއް ނޫނީ ފަސް މަސް ތެރޭ އަލުން ދަނޑަށް ނުކުންނަން އަމާޒު ހިފައިގެން. އޭނާގެ ޓެސްޓްތައް ދަނީ ރަނގަޅަށް،" އިންޓަގެ ކުޅުންތެރިއަކާ ހަވާލާދީ އިޓަލީގެ މީޑިއާތަކުގައި ރިޕޯޓްކޮށްފައިވެ އެވެ.
އިންޓަ އާއި ޑެންމާކްގެ ހާއްސަ ޑޮކްޓަރުންގެ ޓީމަކުން ހަދާ އެރިކްސަންގެ ޓެސްޓްތަކުގައި ބަލާނީ އޭނާ އަށް އައިސީޑީ ނުލައްވައި ކުޅެވޭނެތޯ އެވެ. އެ ޓެސްޓްތަކުން އެރިކްސަން ފާސްވެއްޖެނަމަ އޭނާ ހަ މަސް ދުވަސް ވަންދެން އިތުރު ޓެސްޓްތަކެއް ހަދާނެ އެވެ.
ގަވާއިދުން ހެދޭ އެ ޓެސްޓްތައް ރަނގަޅުނަމަ ލަސްވެގެން އަށް މަހެއްހާ ދުވަސް ތެރޭ އެރިކްސަން އަށް އަލުން ކުޅުމަށް އެނބުރި އާދެވޭނެ ކަމަށް ޑެންމާކްގެ ޑޮކްޓަރުންނާ ހަވާލާދީ އެ ގައުމުގެ މީޑިއާގައި ރިޕޯޓްކޮށްފައިވެ އެވެ.
އެރިކްސަން އަކީ މިދިޔަ ސީޒަނުގައި އިންޓަ އިން އިޓަލީގެ ޗެމްޕިއަންކަން ހޯދިއިރު، ސީޒަންގެ ފަހު މެޗުތަކުގައި މޮޅު ކުޅުމެއް ދައްކައި މުހިއްމު ގޯލުތަކެއް ޖެހި ކުޅުންތެރިއެކެވެ.
