ޖެނީވާ، ސްވިޓްޒަލޭންޑް (އޯގަސްޓު 4) - ކޮވިޑް ވެކްސިންގެ ބޫސްޓާ ޝޮޓު ނުވަތަ ތިން ވަނަ ޑޯޒެއް ދިނުން މަޑުޖައްސާލަން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ގޮވާލައިފި އެވެ.
ޑަބްލިއުއެޗްއޯއިން ބުނީ ސެޕްޓެމްބަރު މަސް ނިމެންދެން ބޫސްޓާ ޝޮޓު ދިނުން މަޑުޖައްސާލައިފި ނަމަ ފަގީރު ގައުމުތަކާއި މުއްސަނދި ގައުމުތަކަށް ވެކްސިން ލިބުމުގައި އޮތް ފަރަގު ކުޑަވެ، ދުނިޔޭގެ ހުރިހާ ގައުމަކުން ވެސް މަދުވެގެން 10 ޕަސެންޓު މީހުންނަށް ވެކްސިން ދިނުމަށް މަގުފަހިވާނެ ކަމަށެވެ.
އޭއެފްޕީގެ ތަފާސްހިސާބަށް ބަލާއިރު ކޮވިޑް ބަލިމަޑުކަމުގައި މުޅި ދުނިޔެއިން މަރުވި މީހުންގެ އަދަދު މިހާރު ވަނީ 4.2 މިލިއަނަށް އަރާފަ އެވެ. އެންމެ ގިނަ މީހުން މަރުވެފައި ވަނީ އެމެރިކާ، ބްރެޒިލް އަދި އިންޑިއާ އިންނެވެ.
އޮލިމްޕިކް ގޭމްސްގެ ފުރަތަމަ ކްލަސްޓާ
ޖަޕާނުގައި ކޭސްތައް އިތުރުވަމުން ދިޔަ ނަމަވެސް އޮލިމްޕިކް ގޭމްސް ލަސްނުކޮށް ވަނީ ފަށައިފަ އެވެ. މުބާރާތުގައި ވާދަކުރާ ގްރީސްގެ އާޓިސްޓިކް ސްވިމިން ޓީމުގެ ފަސް މެމްބަރުން ކޮވިޑަށް ޕޮޒިޓިވްވުމުން، 12 މެމްބަރުންގެ އެ ޓީމު ވަނީ އައިސޮލޭޓުކޮށްފަ އެވެ.
މުބާރާތުގެ ތަރުޖަމާނު މާސާ ޓަކާޔާ ވިދާޅުވީ އެ ޓީމުން މުބާރާތުގެ ބާކީ އިވެންޓުތަކާ ވަކިވެފައިވާ ކަމަށާއި ކޮވިޑް ސާމްޕަލް ނެގެޓިވް ކަމަށް ދެއްކި ހަތް މެމްބަރުން "ކްލޯޒް ކޮންޓެކްޓްސް" އަށް ހާއްސަ ފެސިލިޓީއެއްގައި ބައިތިއްބާފައިވާ ކަމަށެވެ.
ޓަކާޔާ ވިދާޅުވީ އެއީ މުބާރާތުގެ ތެރެއިން މިހާތަނަށް ފާހަގަވި ފުރަތަމަ ކްލަސްޓާ ކަމަށެވެ. ނަމަވެސް މީގެ ކުރިން މުބާރާތާ ގުޅުން ހުރި 322 މީހަކު ޕޮޒިޓިވްވެފަ ވާއިރު، އޭގެ ތެރޭގައި އެތުލީޓުންނާއި އޮފިޝަލުން އަދި މީޑިއާ ހިމެނެ އެވެ.
ޗައިނާގެ ފިޔަވަޅުތައް ވަރުގަދަ ކުރުން
ޑެލްޓާ ވޭރިއެންޓު ސަބަބުން ޗައިނާގައި ހަލުވިކަމާއެކު ބަލި ފެތުރެމުންދާތީ ބައެއް ސިޓީތަކުގައި މީހުން ގެއިން ނިކުތުން ވަނީ މަނާކޮށްފަ އެވެ. އަދި އެތެރޭގެ ދަތުރުތައް ކުރުމަށް ހުރަސްތައް އަޅާފައިވާއިރު، ގައުމުން ބޭރަށް ދިޔުމުގެ އުސޫލު ވެސް ވަނީ ހަރުކަށިކޮށްފަ އެވެ.
ޗައިނާގެ އިމިގްރޭޝަނުން ބުދަ ދުވަހު ބުނީ ޒަރޫރީ ބޭނުމެއް ޖެހިގެން ނުވަތަ އެމެޖެންސީ ހާލަތެއް މެދުވެރިވެގެން މެނުވީ ގައުމުން ބޭރަށް ދިޔުމަށް ޕާސްޕޯޓާއި އެހެން ލިޔުންތައް ދޫނުކުރާނެ ކަމަށެވެ. ނަމަވެސް ތައުލީމާއި، ވަޒީފާ އަދި ވިޔަފާރީގެ ބޭނުމެއްގައި ކޮންމެހެން ދަތުރު ކުރަން ޖެހޭ ނަމަ ހުއްދަ ލިބޭނެ އެވެ.
މީގެ ކުރިން ޗައިނާގައި ކޮވިޑް ފެތުރުން ކޮންޓްރޯލް ކުރީ ވެސް ގައުމުގެ ބޯޑަރުތައް ބަންދުކޮށް، އެއް ފަހަރާ ގިނަ އަދަދެއްގެ މީހުން ޓެސްޓު ކުރުމާއެކު ލޮކްޑައުން ތަންފީޒުކޮށްގެންނެވެ. މިހާރު ބަލި ފެތުރެމުން ދާ ގޮތަށް ބަލާއިރު، ޖުލައި މަހުގެ މެދަކާ ހިސާބުން ފެށިގެން 500 ޑޮމެސްޓިކް ކޭސް ފެނިފައި ވެ އެވެ.
އިރާނުގެ ޖުމްލަ ކޭސްތައް ހަތަރު މިލިއަނަށް
އިރާނުގެ ކޮވިޑުގެ ހާލަތު ގޯހުން ގޯހަށް ދާ ތަން ފެންނައިރު، ބުދަ ދުވަހުގެ ތަފާސްހިސާބުން ދެއްކި ގޮތުގައި އެ ގައުމުގެ ޖުމްލަ ކޭސްތައް ވަނީ ހަތަރު މިލިއަނަށް އަރައިފަ އެވެ.
ފާއިތުވި 24 ގަޑިއިރު ތެރޭގައި 39،357 ކޭސް ފެނިފައި ވާއިރު 409 މީހުން މަރުވި އެވެ. އެއާއެކު މަރުވި މީހުންގެ ޖުމްލަ އަދަދު ވަނީ 92،194 އަށް އަރައިފަ އެވެ.
ސަރުކާރުން ބުނެފައި ވަނީ ފަސް ވަނަ ރާޅުގައި ހަލުވިކަމާއެކު ބަލި ފެތުރެމުން ދަނީ ޑެލްޓާ ވޭރިއެންޓުގެ ސަބަބުން ކަމަށެވެ. ބަލި ކޮންޓްރޯލް ކުރަން އަޅަން ޖެހުނު ހުރިހާ ފިޔަވަޅެއް އެޅުމަށް ރޫހާނީ ލީޑަރު އާޔަތުﷲ އަލީ ހާމަނާއީ ވަނީ އަމުރު ކުރައްވާފަ އެވެ.
އިންޑޮނީޝިއާގައި އެއް ލައްކަ މަރު
ދެކުނު އިރުމަތީ އޭޝިއާގެ ގައުމުތަކުގައި ހަލުވިކަމާއެކު ބަލި ފެތުރެމުން ދާއިރު، އިންޑޮނީޝިއާގައި މަރުވި މީހުންގެ އަދަދު ވަނީ އެއް ލައްކައަށް އަރައިފަ އެވެ.
އެ ސަރަހައްދުގެ އެންމެ ބޮޑު އިގްތިސާދު އޮތް އިންޑޮނީޝިއާއިން ޑެލްޓާ ވޭރިއެންޓު ފެނުނީ މިދިޔަ ޖޫން މަހު އެވެ. މިހާރު ވަނީ ބޮޑު ސަރަހައްދަކަށް ފެތުރިފަ އެވެ.
ގިނަ އަދަދެއްގެ ބަޔަކު މަރުވަމުން ދަނީ ފަރުވާ ނުލިބުމުގެ ސަބަބުންނެވެ. ހޮސްޕިޓަލްތައް ފުރި، އޮކްސިކަން ހުސްވެފައި ވާއިރު، ސިއްހީ މަސައްކަތްތެރިން ވެސް ތިބީ ވަރުބަލިވެފަ އެވެ.
މިހާތަނަށް އެ ގައުމުގައި 3.5 މިލިއަން ކޭސް ރަސްމީކޮށް ރިކޯޑްކޮށްފައި ވާއިރު، ނުރަސްމީ ތަފާސްހިސާބު އެއަށްވުރެ އެތައް ގުނައެއް އިތުރުވާނެ ކަމަށް ބެލެވެ އެވެ.
