ވޮޝިންޓަން، އެމެރިކާ (އޯގަސްޓު 3) - ޗައިނާއާ މެދު އެމެރިކާއިން ގެންގުޅޭ ހަރުކަށި ފިކުރުގެ "ނުރައްކާ ބޮޑު" ކަމަށް ވިދާޅުވެ، "ރުޅިވެރިކަމާއެކު" ޗައިނާއަށް ގޮންޖެހުމާ ދެކޮޅަށް ސިންގަޕޫރުގެ ބޮޑު ވަޒީރު ލީ ސިއެން ލޫންގް އެމެރިކާއަށް އިންޒާރު ދެއްވައިފި އެވެ.
ލީ ވިދާޅުވީ ޗައިނާއާ އެކު ރަނގަޅު ވާދަވެރިކަމެއް ކުރިން އޮތް އެމެރިކާއިން މިހާރު ގެންގުޅޭ ވިސްނުމަކީ "ކޮންމެ ގޮތަކުން ވިޔަސް ޗައިނާ ފަހަތަށް ވައްޓާލުމަށް ފަހު މޮޅުވުމުގެ ވިސްނުން" ކަމަށެވެ.
"އެމެރިކާގެ ވިސްނުމަކީ [ޗައިނާއާ މެދު] ހަރުކަށިވުން. އެއީ އެންމެ ރަނގަޅު ގޮތް ކަމަށް އަޅުގަނޑަށް ގަބޫލެއް ނުކުރެވޭ،" އެސްޕެން ސެކިއުރިޓީ ފޯރަމްގައި އެމަނިކުފާނު ވިދާޅުވި އެވެ.
"ޗައިނާއަކީ ދުޝްމަނެއް ކަމަށް ކަނޑައަޅައިފި ނަމަ، އެއީ ކިހާ ވަރެއްގެ ކުޅަދާނަ ކަމާއި ގާބިލްކަން ހުރި ދުޝްމަނެއް ކަން އެމެރިކާ ރައްޔިތުންނަށް ވިސްނޭހެން އަޅުގަނޑަކަށް ހިޔެއް ނުވޭ. މި ހާލަތުގައި ދެ ފަރާތަށް ވެސް އަޅުގަނޑު ދަންނަވާނީ މަޑުކޮށްލާށޭ. އަވަސް އަރުވާލުމުގެ ކުރިން ރަނގަޅަށް ވިސްނާށޭ، މިއީ ނުރައްކާތެރި ހާލަތެކޭ."
ލީ ވިދާޅުވީ އެމެރިކާ އާއި ޗައިނާ އެކުގައި މަސައްކަތް ކުރުން މުހިއްމު ކަމަށާއި ދެ ގައުމުގެ މެދުގައި ކުރިމަތިލުމެއް ހިނގައިފި ނަމަ ދުނިޔެއަށް ބޮޑު ކާރިސާއެއް އަންނާނެ ކަމަށެވެ.
ޗައިނާ އާއި އެމެރިކާގެ ލީޑާޝިޕާ ގުޅޭ ތަޖުރިބާކާރެއްގެ ގޮތުގައި ގިނަ ބަޔަކު ސިފަކުރާ ލީ އިތުރަށް ވިދާޅުވީ އެމެރިކާއިން ޗައިނާއާ މެދު ހަރުކަށި ވިސްނުމެއް ގެންގުޅޭއިރު، ޗައިނާއިން ގަބޫލުކުރާ ގޮތުގައި އެމެރިކާއަކީ އިތުބާރު ކުރެވޭ ގައުމެއް ނޫނެވެ.
އޭގެ އިތުރުން މިދިޔަ މާޗް މަހު އެމެރިކާގެ ރައީސް ޖޯ ބައިޑެންގެ ސަރުކާރުން ޗައިނާ އާއެކު ބޭއްވި ފުރަތަމަ ބައްދަލުވުމުގައި އެމެރިކާއިން "ގަދަބާރު" ދައްކަން އުޅުނުކަން ފާހަގަކުރައްވާ ލީ ފާޑުވިދާޅުވި އެވެ.
ނަމަވެސް ކުރީގެ ރައީސް ޑޮނަލްޑް ޓްރަމްޕްއާ ހިލާފަށް ބައިޑެންގެ ސަރުކާރުން ގެންގުޅޭ "ހަމަޖެހޭ ހާރިޖީ ސިޔާސަތަށް" މަރުހަބާ ވިދާޅުވި އެވެ.
ޓައިވާންގެ މައްސަލައަކީ ޗައިނާ އާއި އެމެރިކާއިން އެންމެ އަރައިރުންވާ އެއް މައްސަލަކަން ފާހަގަކުރައްވާ ލީ ވިދާޅުވީ ޓައިވާން ހިފަން ޗައިނާއިން ނޫޅުނު ނަމަށް "ނުރައްކާ އެބަ އޮތް" ކަމަށެވެ.
ޗައިނާއިން ބުނާ ގޮތުގައި ޓައިވާނަކީ އެ ގައުމުގެ ބައެކެވެ. ނަމަވެސް ޓައިވާނުން ދެކޭ ގޮތުގައި ޓައިވާނަކީ މިނިވަން ދައުލަތެކެވެ.
މިދިޔަ ހަފްތާގައި އެމެރިކާގެ ޑިފެންސް ސެކެޓްރީން ލޮއިޑް އޯސްޓިން ސިންގަޕޫރަށް ވަޑައިގެން ވިދާޅުވީ ޓައިވާނުގެ ހާލަތު ބަދަލު ކުރުމާ ދެކޮޅަށް އެމެރިކާ ތެދުވާނެ ކަމަށެވެ. ލީ ވަނީ އެކަމަށް މަރުހަބާ ވިދާޅުވެފަ އެވެ.
"އަޅުގަނޑު ދެކޭ ގޮތުގައި އެ ވިސްނުން ސާފުކޮށް ދަމަހައްޓާ ނަމަ ޓައިވާން ސްޓްރެއިޓްގައި ސުލްހަ އާއި ހަމަޖެހުން އޮންނާނެ،" އޭނާ ވިދާޅުވި އެވެ.
އެމެރިކާއިން އަންނަނީ ޓައިވާނުގެ އަސްކަރިއްޔާ ޒަމާނީކޮށް ވަރުގަދަ ކުރުމަށް ބާރު އަޅަމުންނެވެ. އެމެރިކާއިން ބޭނުންވަނީ ޗައިނާއިން ދީފާނެ ހަމަލާއަކަށް އެ ގައުމުން ތައްޔާރުވެފައި އޮތުމެވެ. ޓައިވާނަށް އެންމެ ގިނައިން ހަތިޔާރު ފޯރުކޮށްދީ، ބައިނަލްއަގްވާމީ މުޖުތަމައުގައި ޓައިވާނުގެ އެންމެ ބޮޑު ބައިވެރިއަކީ ވެސް އެމެރިކާ އެވެ.
