އޭއެފްސީ ކަޕްގެ ދެކުނު އޭޝިއާގެ މެޗުތައް މި މަހު މާލޭގައި ކުޅެން ތައްޔާރުވަމުން އަންނައިރު، ބަންގްލަދޭޝްގެ ޗެމްޕިއަން ބަޝުންދުރާ ކިންގްސްގެ ކޯޗު އޮސްކާ ބްރުޒޮން ދެކޭގޮތުގައި މުބާރާތުގެ އަނެއް ބުރަށް ދިއުމަށް ހުރިހާ ޓީމަކަށް ވެސް އޮތީ ހަމަހަމަ ފުރުސަތެއް ކަމަށް ބުނެފި އެވެ.
އޭއެފްސީ ކަޕުގެ ދެކުނު އޭޝިއާ ފަޅީގެ ޕްލޭއޮފުގައި ރާއްޖޭގެ އީގަލްސް އާއި އިންޑިއާގެ ބެންގަލޫރު އެފްސީގެ މެޗު އޮންނާނީ މި މަހުގެ 15 ވަނަ ދުވަހު އެވެ. އެ މެޗުން މޮޅުވާ ޓީމަކަށް ދެކުނު އޭޝިއާ ގްރޫޕުގެ ފަހު ޖާގަ ލިބޭނެ އެވެ.
ދެކުނު އޭޝިއާގެ ގްރޫޕްގައި މި ވަގުތު އޮތީ ބަޝުންދުރާގެ އިތުރުން ރާއްޖޭގެ ޗެމްޕިއަން މާޒިޔާ އަދި އިންޑިއާގެ އޭޓީކޭ މޯހަން ބަގާން އެވެ. ބަޝުންދުރާ ކުޅޭ ފުރަތަަމަ މެޗުގައި މި މަހު 18 ވަނަ ދުވަހު މާޒިޔާއާ ބައްދަލުކުރުމަށް ފަހު 21 ވަނަ ދުވަހު ކުޅޭނީ ބެންގަލޫރާއި އީގަލްސް ތެރެއިން ޕްލޭއޮފުން މޮޅުވާ ޓީމަކާ އެވެ. ބަޝުންދުރާ މި މަހު 24 ވަނަ ދުވަހު ގްރޫޕްގެ ފަހު މެޗުގައި ބައްދަލުކުރާނީ އޭޓީކޭއާ އެވެ.
ބަންގްލަދޭޝްގެ ރޭސްޕޯޓްސް އަށް ދިން އިންޓަވިއުއެއްގައި އޮސްކާ ބުނީ ގްރޫޕްގެ ކޮންމެ މެޗެއް ވެސް އުނދަގޫވާނެ ކަމަށާއި ކޮންމެ ޓީމަކަށް ވެސް އަނެއް ބުރުން ފުރުސަތު ހޯދިދާނެ ކަމަށެވެ. ކޮންމެ ގްރޫޕަކުން އަނެއް ބުރަށް ހޮވޭނީ އެއް ވަނަ ޓީމެވެ.
"އަހަރެމެންގެ މި ވަގުތުގެ އަމާޒަކީ ފުރަތަމަ މެޗުން (މާޒިޔާ އަތުން) މޮޅުވުން. ފޯމެޓް އޮތްގޮތަށް ބަލާއިރު އަހަރެންގެ ނަޒަރުގައި ހަ ޕޮއިންޓް ހޯދައިގެން އަނެއް ބުރަށް ދެވިދާނެ. ވަރަށް އުނދަގޫ ޓާސްކެއް ކޮންމެ ޓީމަކަށް ވެސް މި އޮތީ. އެއް ވަނަ އަށް އެރުމުގެ ހަމަހަމަ ފުރުސަތެއް އޮތަސް މީގެ އެއްވެސް މެޗެއް ފަސޭހައެއް ނުވާނެ،" އޮސްކާ ބުންޏެވެ.
ކޮލިފައިން ގްރޫޕްގެ މަންޒަރު ސާފުކޮށް ފެންނާނީ ކޮންމެ ޓީމެއްގެ އެއް މެޗު ނިމުމުން - އޮސްކާ
އޭއެފްސީ ކަޕްގައި އޮސްކާ ވަނީ ރާއްޖޭގެ ނިއު ރޭޑިއަންޓް ގޮވައިގެން ވާދަކޮށްފަ އެވެ. އޭރު މެޗުތައް އޮތީ ހޯމް އެންޑް އަވޭ އުސޫލުންނެވެ. އެކަމަކު، މި ފަހަރު ކޮވިޑް-19ގެ ހާލަތުގެ ސަބަބުން މެޗުތައް ސެންޓްރަަލައިޒްކޮށް ކުޅޭނީ ހަމައެކަނި މާލޭގަ އެވެ.
އޮސްކާ ބުނީ ކޮންމެ ޓީމަކަށް ވެސް ރަނގަޅުވާނީ ހޯމް އެންޑް އަވޭ އުސޫލުން މެޗުތައް ކުޅުން ކަމަށާއި އެކަމަކު މި ވަގުތު ހާލަތު އޮތްގޮތުން އެ ފުރުސަތު ނެތްކަން ވެސް ގަބޫލުކުރަން ޖެހޭ ކަމަށެވެ.
"މިހާރު މި އޮތް ގޮތުން ތިން މެޗު ވެސް ކުޅެން ޖެހޭނީ އެއް ލެވަލަކަށް ފޯކަސް ބަހައްޓައިގެން. ހެދޭ އެންމެ ގޯހެއްގެ ސަބަބުން ވެސް ލިބޭ ގެއްލުން ވަރަށް ބޮޑުވާނެ،" އޮސްކާ ބުންޏެވެ.
ނިއު ދޫކޮށް 2018 ވަނަ އަހަރު ބަންގްލަދޭޝަށް ބަދަލުވެ، އޮސްކާ އަންނަނީ އެ ޓީމުގައި ފާހަގަކޮށްލެވޭ ރަނގަޅު މަސައްކަތްތަކެއް ކުރަމުންނެވެ. އޮސްކާ ހަވާލުވި ފަހުން ބަންގްލަދޭޝްގައި ބަޝުންދުރާ ވާދަކުރި ހުރިހާ މުބާރާތެއް ވަނީ ކާމިޔާބުކޮށްފަ އެވެ. އަދި އޭނާ ވަނީ އެ ގައުމުގެ މޮޅު ކޯޗުގެ މަގާމު ވެސް ހޯދައިފަ އެވެ.
ބަޝުންދުރާ ގޮވައިގެން މިހާތަނަށް އޮސްކާ ވަނީ އޭއެފްސީ ކަޕްގެ އެއް މެޗަށް ނުކުމެފަ އެވެ. އެއީ މިދިޔަ އަހަރުގެ އޭއެފްސީ ކަޕްގެ ގްރޫޕް ސްޓޭޖުގައި ރާއްޖޭގެ ޓީސީ ސްޕޯޓްސް ކްލަބާ ބައްދަލުކުރި މެޗެވެ. ބަންގްލަދޭޝްގައި ކުޅުނު އެ މެޗުން ބަޝުންދުރާ މޮޅުވީ 5-1 އިންނެވެ. އެ މެޗުގައި ބަޝުންދުރާގެ ހަތަރު ގޯލު ޖެހީ އާޖެންޓީނާގެ ފޯވާޑް ހާނަން ބާކޯސް އެވެ. މިދިޔަ އަހަރުގެ އޭއެފްސީ ކަޕް ކެންސަލްކޮށްލިއިރު، ބާކޯސް ވެސް ވަނީ ބަޝުންދުރާ ދޫކޮށްލައިފަ އެވެ.
އޮސްކާ ވަނީ މި ވަގުތު ބަޝުންދުރާގެ އެޓޭކްގައި ތިބި ބްރެޒިލްގެ ފެނާންޑޭޒާއި ރޮބީނިއޯ އަދި އާޖެންޓީނާގެ ރައުލް ބަސޭރާ އަކީ ވެސް ތަފާތު ދެއްކޭނެ ކުޅުންތެރިން ކަމަށް ބުނެފަ އެވެ. ބަންގްލަދޭޝް ލީގުގައި މިހާތަނަށް މި ފަހަރު ރޮބީނިއޯ 17 ގޯލު ޖެހިއިރު، ރައުލް ވަނީ 15 ގޯލު ކާމިޔާބުކޮށްފަ އެވެ.
ބަޝުންދުރާ އޮތީ މިހާރު ކުރިއަށްދާ ބަންގްލަދޭޝް ޕްރިމިއާ ލީގުގެ އެއް ވަނައިގަ އެވެ. އެއީ ހަތް ޕޮއިންޓުގެ ލީޑަކާ އެކު އެވެ. ބަންގްލަދޭޝް ލީގު މި ވަގުތު ކުރިއަށްދާތީ ބަޝުންދުރާ އޭއެފްސީ ކަޕަށް އަންނާނީ ރަނގަޅު ލެވަލެއްގައި ކުޅެމުން އައިސްކަމަށްވާތީ އެ ޓީމަށް ކޮންމެވެސް ވަރެއްގެ އެޑްވާންޓޭޖެއް އޮންނާނެ އެވެ.
އޮސްކާ ބޭނުންވަނީ އޭއެފްސީ ކަޕްގެ މެޗުތަކުގެ ހަފްތާއެއްހާ ދުވަސް ކުރިން މާލެ އަންނާށެވެ. އެއީ މާހައުލަށް ރަނގަޅަށް ހޭނުމުގެ ބޭނުމުގަ އެވެ. އެކަމަކު، ރާއްޖެ އަންނާނެ ސީދާ ތާރީހެއް އަދި ފައިނަލްނުވާ ކަމަށް އޮސްކާ ވަނީ ބުނެފަ އެވެ.
