ޕެރިސް (އޮގަސްޓް 4) - އަންނަ އަހަރުގެ ޖޫން މަހުގެ ނިޔަލަށް ކޮންޓްރެކްޓްގައި ހުރި ޕީއެސްޖީގެ ތަރި ކީލިއަން އެމްބާޕޭ، އެ ޓީމާ އެކު ހަދާފައިވާ އެއްބަސްވުން އާ ކުރާނެ ކަމުގެ ޔަގީންކަން ކުޑަވެ، އެ ކްލަބުން ދެ ވަނަ ވިސްނުމަކަށް ދާން ތައްޔާރުވަމުން އަންނަ ކަމަށް ފްރާންސްގެ މީޑިއާ ރިޕޯޓްތައް ބުނެފި އެވެ.
މިދިޔަ ސީޒަނުގައި ޕީއެސްޖީން ވަނީ އުމުރުން 22 އަހަރުގެ އެމްބާޕޭގެ ކޮންޓްރެކްޓް އާ ކުރަން ގިނަ މަސައްކަތްތަކެއް ކޮށްފަ އެވެ. ޕީއެސްޖީން އެމްބާޕޭ އަށް ހަތަރު އަހަރުގެ އެއްބަސްވުމެއް ހުށަހެޅި އެވެ. އެއީ އަހަރަކު 36 މިލިއަން ޔޫރޯ (43 މިލިއަން ޑޮލަރު) ލިބޭ ގޮތަށެވެ. އެކަމަކު އެ ކޮންޓްރެކްޓްގައި ސޮއިކުރަން އެމްބާޕޭ ބޭނުމެއް ނުވި އެވެ.
މި ފަހަރުގެ ޓްރާންސްފާ މާކެޓްގައި އެމްބާޕޭ ނުވިއްކާނެ ކަމަށާއި ކުރިއަށް އޮތް ސީޒަން ނިންމާފައި ހިލޭ ޓްރާންސްފާއެއްގައި އެމްބާޕޭ ޓީމު ދޫކޮށްދިއުމުގެ ފުރުސަތެއް ނެތް ކަމަށް ޕީއެސްޖީގެ ރައީސް ނާސިރު އެލް-ހެއްލާފީ ވަނީ މީގެ ކުރިން ވިދާޅުވެފަ އެވެ.
އެކަަމަކު، އެމްބާޕޭ ކޮންޓްރެކްޓް އާ ނުކޮށް މަޝްވަރާތައް ދިގުލާނަމަ ޕީއެސްޖީން މިހާރު އޮތީ ދެ ވަަނަ ވިސްނުމަކަށް ދާން ތައްުޔާރަށެވެ.
ރިޕޯޓްތައް ބުނާގޮތުން ޕީއެސްޖީން މިހާރު ވިސްނަމުން އަންނަނީ ޖެނުއަރީ މަހާ ހަމައަށް އެމްބާޕޭ ކޮންޓްރެކްޓް އާ ނުކޮށްފިނަމަ އެ މަސް ތެރޭ އަންނަ ފިނި މޫސުމުގެ ޓްރާންސްފާ މާކެޓް ތެރޭ އޭނާ ވިއްކާލުމަށެވެ. އެއީ ސީޒަން ނިމެންދެން މަޑުކޮށްފިނަމަ އެމްބާޕޭ ކްލަބް ދޫކޮށްލާނީ އެއްވެސް އަގެއް ނުލިބި ކަމަށްވާތީ އެވެ.
ދާދިފަހުން ޕީއެސްޖީގެ ރަސްމީ ވެބްސައިޓަށް ދިން އިންޓަވިއުއެއްގައި އެމްބާޕޭ ވަނީ ޕީއެސްޖީއާ އެކު ޗެމްޕިއަންސް ލީގު ތަށި އުފުލާލުން އެއީ ހުވަފެނެއް ކަމަށް ބުނެފަ އެވެ. އެކަމަކު، އެ ކްލަބްގައި ދިގު މުއްދަތަކަށް މަޑުކުރުމާ ބެހޭގޮތުން ކުރި ސުވާލަށް ސީދާ ޖަވާބެއް ދޭން އެމްބާޕޭ ބޭނުމެއްނުވި އެވެ.
މޮނާކޯ ދޫކޮށް އެމްބާޕޭ އެންމެ ފުރަތަމަ ޕީއެސްޖީ އަށް ބަދަލުވީ 2017 ވަނަ އަހަރު ލޯން އެއްބަސްވުމެއްގެ ދަށުންނެވެ. ޖެހިގެން އައި އަހަރު ޕީއެސްޖީން އެމްބާޕޭގެ އެއްބަސްވުން ދާއިމީ ކުރީ ޖުމްލަ އެއްކޮށް 210 މިލިއަން ޑޮލަރު ދެއްކުމަށް ފަހު އެވެ.
ޕީއެސްޖީގެ ވިސްނުމަކީ ދުރު މުސްތަގުބަލަކަށް ވިސްނައި އެމްބާޕޭ ވަށައިގެން ޓީމެއް އެކުލަވާލުމެވެ. އެ ގޮތުން މި ފަހަރުގެ ޓްރާންްސްފާ މާކެޓްގައި ޕީއެސްޖީ އަށް ބަދަލުވި ހުރިހާ ކުޅުންތެރިން ވަނީ އެމްބާޕޭ އެ ޓީމުގައި މަޑުކުރަން އެދޭ ކަމަށް ބުނެފަ އެވެ.
ފްރާންސްގެ ލަ ޕެރީސިއަން ނޫހުން ރިޕޯޓްކުރާގޮތުގައި އެމްބާޕޭގެ ވިސްނުން މިހާރު ހުރީ މި ސީޒަން ޕީއެސްޖީ އަށް ކުޅެދިނުމަށް ފަހު އަންނަ އަހަރު ހިލޭ ޓްރާންސްފާއެއްގައި ސްޕެއިންގެ ގަދަބާރު ރެއާލް މެޑްރިޑަށް ބަދަލުވުމަށެވެ. މި ފަހަރުގެ ޓްރާންސްފާ މާކެޓްގައި ބޮޑު އަގެއް ދީގެން އެމްބާޕޭ ގަނެވޭ ވަރުގެ މާލީ ތަނަވަސްކަމެއް މި ވަގުތު ރެއާލްގެ ނެތެވެ.
