ކާޑިފް (އޮގަސްޓް 1) - ކެނަޑާ އަށް އުފަން މަޝްހޫރު އެކްޓަރު ރަޔާން ރޭނޯލްޑް، ވޭލްސްގެ ނޮން ލީގު ކްލަބް ވްރެކްސަމް ގަތީ އެ ޓީމާއި އެ ކްލަބް ހިމެނޭ ސަރަހައްދަށް ގިނަ ހިދުމަތްތަކެއް ކޮށްދެން ބޭނުންވާތީ ކަމަށް ބުނެފި އެވެ.
މިދިޔަ ފެބްރުއަރީ މަހު ރޭނޯލްޑް ވަނީ ތިން މިލިއަން ޑޮލަރަށް ވްރެކްސަމް ގަނެފަ އެވެ. ވްރެކްސަމް ފާއިތުވި 13 އަހަރު ކުޅެފައިވަނީ ނޮން ލީގުގަ އެވެ. ލީގު ސިސްޓަމަށް ވަންނަން މިދިޔަ ސީޒަނުގައި ޕްލޭއޮފްގެ ޖާގައަކުން ކެޓީ ފަހު ވަގުތު އެވެ. ލީގު ސިސްޓަމަށް ވަންނަން ޕްލޭއޮފްގެ ޖާގައެއް ނުލިބުނު ނަމަވެސް ރޭނޯލްޑްގެ ވިސްނުމަކީ ވްރެކްސަމް އަށް ކުރަމުން އަންނަ އިންވެސްޓްމަންޓް ކުރިއަށް ގެންދިއުމެވެ.
"ކުރިއަށް އޮތްތަނުގައި ޕްރޮމޯޝަނަކަށް ފަހު ޕްރޮމޯޝަނެއް. މިއީ އަހަރެންގެ އަމާޒު،" މަޝްހޫރު ސުޕަ ހީރޯ ފިލްމް ޑެޑްޕޫލްގެ މެއިން ކެރެކްޓާގެ އެކްޓިން އިން ގިނަ ބަޔެއްގެ ސަމާލުކަން ހޯދި ރޭނޯލްޑް ބުންޏެވެ.
ކޮވިޑް-19ގެ ސަބަބުން ވްރެކްސަމްގެ މެޗެއް ދަނޑަށް ގޮސް ބަލާލުމުގެ ނަސީބު އަދި ރޭނޯލްޑަށް ނުލިބެ އެވެ. ވަރަށް އަވަހަށް އެ ކަން ކުރަން އަމާޒުހިފައިގެން ހުރި ރޭނޯލްޑް ބުނީ ކްލަބާ ގުޅޭ އެކިއެކި މައުލޫމާތު އެއްކުރަމުން އަންނަ ކަމަށާއި ކުރިއަށް އޮތްތަނުގައި ގިނަ ބަދަލުތަކެއް ކްލަބް ހިންގުމަށް ގެންނާނެ ކަމަށެވެ.
"އާ ސީޒަނަކާ ކުރިމަތިލާއިރު އަހަރެންގެ އުއްމީދުތައް މިހުރީ ވަރަށް މަތީގައި. އެއީ އަހަރެންގެ ހަޔާތުގައި ވެސް ކަންތައް ކުރާ ގޮތަކީ ބޮޑު ކަމެއް ހާސިލްކުރާނަމަ އަބަދުވެސް އުއްމީދުތައް މަތި ކުރަން ޖެހޭނެ،" މިލްކިއްޔާތުގައި 150 މިލިއަން ޑޮލަރު ހުރި ރޭނޯލްޑް ބުންޏެވެ.
ވްރެކްސަމް އަކީ 156 އަހަރުވެފައިވާ ކްލަބެކެވެ. ވޭލްސް އަށް ނިސްބަތްވާ ކްލަބްތަކުގެ ތެރެއިން އެންމެ ދުވަސްވީ ކްލަބަކީ ވްރެކްސަމް އެވެ. ވްރެކްސަމް ވަނީ މީގެ ކުރިން ވޭލްސް ކަޕްގެ ޗެމްޕިއަނުންގެ ގޮތުގައި ޔޫރަޕިއަން ކަޕް ވިނާސް ކަޕްގައި ވެސް ވާދަކޮށްފަ އެވެ.
އިނގިރޭސި ދަށް ޑިވިޝަންތަކުގައި ގިނަ އަހަރުތަކެއް ގުނަމުން އަންނަ ވްރެކްސަމްގެ އަމާޒަކީ އިނގިރޭސި މަތީ ޑިވިޝަންތަކުގައި ކުޅުމެވެ.
ވްރެކްސަމް ވަނީ އިނގިރޭސި ލީގު ސިސްޓަމަށް ބަލާއިރު، ތިން ވަަނަ ޑިވިޝަނުގައި ވާދަކޮށްފަ އެވެ. އެއީ 2004-2005 ވަނަ ސީޒަނުގަ އެވެ. އެ ޓީމުން އެންމެ ފަހުން ލީގު ސިސްޓަމްގެ އެންމެ މަތީ ލެވަލެއްގައި ކުޅެފައިވަނީ 2007-2008 ވަނަ އަހަރު އެވެ. އެ ފަހަރު އެ ޓީމުން ވަނީ އިނގިރޭސި ހަތަރު ވަނަ ޑިވިޝަނުގައި ވާދަކޮށްފަ އެވެ.
