ރިޔާދް، ސައުދީ އަރަބިއްޔާ (ޖުލައި 31) - ތެލަށް ބަރޯސާވެފައިވާ އިގްތިސާދުގެ ތެރެއިން އެކި ދާއިރާތައް ވެއްދުމުގެ ގޮތުން ފަތުރުވެރިކަން ފުޅާ ކުރުމުގެ މަގްސަދުގައި ފުރަތަމަ ފަހަރަށް ސައުދީ އަރަބިއްޔާއިން ސުޕާ ކްރޫޒްޝިޕެއް ފުރައިފި އެވެ.
އެމްއެސްސީ ބެލިއްސިމާއަކީ ތިން ފުޓްބޯޅަ ދަނޑަށް ވުރެ ދިގުކޮށް ފަރުމާކޮށްފައިވާ ބޯޓެކެވެ. އެ ބޯޓުގެ މި ދަތުރުގައި ޖިއްދާ އިސްލާމިކް ޕޯޓުން ފުރައިގެން ގޮސް އުރުދުންގެ އަގަބާ އަދި މިސްރުގެ ސަފާގާއަށް މަޑު ކުރާނެ އެވެ.
ހުކުރު ދުވަހު ސުޕާ ކްރޫޒްޝިޕްގެ ހިދުމަތް ފެށިއިރު، އޭގެ ދެ ދުވަސް ކުރިން ސައުދީ އަރަބިއްޔާއިން ވަނީ އެ ގައުމުގެ ހުޅަނގު އައްސޭރިފަށުގައި ހުންނަ ޖިއްދާ ބަނދަރުގައު ފުރަތަމަ ފަހަރަށް ކްރޫޒްޝިޕް ޓާމިނަލެއް ގާއިމްކޮށްފަ އެވެ.
"ފުރަތަމަ ކްރޫޒްޝިޕް ޕޯޓު ހުޅުވުމުން ރަމްޒުކޮށްދެނީ މުހިއްމު ފިޔަވަޅެއް. އެއީ ފަތުރުވެރިކަމުގެ ދާއިރާއަށް އެހީވުމަށް އެޅި ފިޔަވަޅެއް،" ކްރޫޒް ސައުދީގެ މެނޭޖިން ޑިރެކްޓަރު ފަވާޒް ފާރޫގީ ވިދާޅުވީ ކަމަށް ސައުދީ ޕްރެސް އެޖެންސީން ބުންޏެވެ.
ފަތުރުވެރިކަމާއި ލެއިޝާ ސެކްޓަރު ތަރައްގީ ކުރުމަކީ ވަލީ އަހުދު މުހައްމަދު ބިން ސަލްމާންގެ "ވިޝަން 2030" ތަސައްވުރުގެ މުހިއްމު ބަޔެކެވެ. އެ ތަސައްވަރަކީ 2030 ވަނަ އަހަރު އަންނަން ވާ އިރަށް އަރަބި ދުނިޔޭގެ އެންމެ ބޮޑު އިގްތިސާދު ތެލަށް ބަރޯސާވުން ހުއްޓުވުމަށް ގެންގުޅޭ ތަސައްވަރެކެވެ.
ސައުދީ އަރަބިއްޔާއިން 2019 ވަނަ އަހަރު ޓޫރިސްޓް ވިސާ ދޫކުރަން ނިންމީ އޭގެ ބޭނުމުގަ އެވެ. އޭގެ ވިސާ ދޫކުރުމުގެ ކަންކަން އޮތީ ވަރަށް ބޮޑަށް ހިފަހައްޓާފަ އެވެ. އެގޮތުން ވިސާ ލިބެނީ ވިޔަފާރި ދަތުރުވެރިންނާއި ހައްޖު އަދި އުމްރާއަށް ދާ މީހުންނަށެވެ.
ނަމަވެސް ޓޫރިސްޓް ވިސާ ދޫކުރަމް ފެށުމުން 49 ގައުމެއްގެ ރައްޔިތުންގެ ޝަރުތު ހަމަވާ ކަމަށް ކަނޑައެޅި އެވެ. އޭގެ ތެރޭގައި ގިނައިން ހިމެނެނީ ޔޫރަޕް ގައުމުތަކެވެ.
ސައުދީގެ ފުރަތަމަ ސުޕަ ކްރޫޒްޝިޕް، އެމްއެސްސީ ބެލިއްސިމާއަކީ ފްރާންސްގައި ބިނާކުރި ބޯޓެކެވެ. އޭގެ ދިގު މިނުގައި 315 މީޓަރު ހުންނަ އިރު، 4،500 ޕަސެންޖަރުން އުފުލުމުގެ ކެޕޭސިޓީ ލިބިފައި ވެ އެވެ. އެހެންކަމުން މިއީ މިހާރު ދުނިޔޭގައި އޮތް އެންމެ ބޮޑު އެއް ކްރޫޒްޝިޕެވެ.
އެންމެ ފުރަތަމަ 2019 ވަނަ އަހަރު ލޯންޗުކޮށް ސްވިޒަލޭންޑުގެ އެމްއެސްސީ ކްރޫޒަޒްއިން އޮޕަރޭޓް ކުރި މި ބޯޓުން އޮކްޓޯބަރު 30 އާ ހަމައަށް 21 ދަތުރު ކުރާނެ އެވެ.
އެ ކްރޫޒްޝިޕުން ގިނަ ހިދުމަތްތަކެއް ލިބެ އެވެ. އޭގެ ތެރޭގައި ސްވިމިން ޕޫލްތަކާއި ޖިމްތަކާއި ރެސްޓޯރެންޓް، ކެފޭ އަދި ޕާޓީއަށް ހާއްސަ ބޯލްރޫމްތައް ހިމެނެ އެވެ.
ދަތުރެއްގެ އަގު ފެށެނީ ގާތްގަނޑަކަށް 585 ޑޮލަރުންނެވެ. ބައެއް ދަތުރުތަކުގައި މިސްރުގެ ލަކްސާ އަދި އުރުދުންގެ ޕެޓްރާ ފަދަ މަންޒިލްތަކަށް ދާނެ ކަމަށް ޓްރެވެލް އޭޖެންސީތަކުން ބުނެފައި ވެ އެވެ.
ސައުދީގެ ޕަބްލިކް އިންވެސްޓްމަންޓް ފަންޑުގެ ދަށުން ހިންގާ ކްރޫޒް ސައުދީން މިދިޔަ އޭޕްރިލް މަހު ވަނީ އެމްއެސްސީ ކްރޫޒަޒް އާއެކު ފިނި މޫސުމުގެ ދަތުރުތަކެއް ނޮވެމްބަރު 2021 އިން މާޗް 2022 އާ ހަމައަށް ކުރުމަށް އެއްބަސްވެފަ އެވެ.
އެ ދަތުރުތައް ފަށާނީ ސައުދީގެ އިރުމަތީ އައްސޭރިފަށުގައިވާ ޖިއްދާ އަދި ދައްމާމުންނެވެ. އެ ދަތުރުތަކުގައި 170،000 ގެސްޓުން ބައިވެރިވާނެ ކަމަށް ވަނީ އަންދާޒާކޮށްފަ އެވެ.
މިހާތަނަށް ހަތަރު މިލިއަން މީހން މަރުވެފައިވާ ކޮވިޑް ބަލިމަޑުކަމުގެ ސަބަބުން ދުނިޔޭގެ ކްރޫޒް އިންޑަސްޓްރީއަށް ވަނީ ވަރަށް ބޮޑަށް އަސަރުކޮށްފަ އެވެ.
ސައުދީ އަރަބިއްޔާއިން މަސައްކަތް ކުރަނީ ވެކްސިން ޕްރޮގްރާމްގެ ދުވެލި އަވަސްކޮށް ފަތުރުވެރިކަން ފަށައި، ކުޅިވަރާއި މުނިފޫހިފުލުމުގެ ހަރަކާތްތައް ހޯސްޓު ކުރަން ފެށުމަށެވެ.
މިދިޔަ ބުރާސްފަތި ދުވަހު އެ ގައުމުން ވަނީ ވެކްސިން ފުރިހަމަކޮށްފައިވާ ފަރާތްތަކަށް އެތެރެވުމުގެ ހުއްދަ ދިނުމަށް ނިންމާފަ އެވެ.
ސައުދީ ދައުލަތުގެ ޓީވީން ބުނި ގޮތުގައި އެމްއެސްސީ ބެލިއްސިމާގެ ދަތުރު ފެށުމުގެ ކުރިން އޭގެ ކްރޫ ވަނީ 14 ދުވަހުގެ ކަރަންޓީން ފުރިހަމަކޮށްފަ އެވެ.
ދެ ހާސް ސަތާރަ ވަނަ އަހަރުން ފެށިގެން ވަލީ އަހުދު މުހައްމަދު ގެންދަވަނީ ބޮޑެތި އިގްތިސާދީ އަދި އިޖްތިމާއީ ބަދަލުތަކެއް ގައުމަށް ގެންވަމުންނެވެ. އޭގެ ތެރޭގައި އަންހެން މީހުންނަށް ކާރު ދުއްވަން ހުއްދަ ދިނުމާއި، ސިނަމާތައް އަލުން ހުޅުވުމާއި، ދެ ޖިންސުގެ މީހުން އެކުގައި މިއުޒިކް ކޮންސެޓުތައް ބޭއްވުމާއި އެހެނިހެން މުނިފޫހިފިލުވުމުގެ ހަރަކާތްތައް ހިމެނެ އެވެ.
ނަމަވެސް އިދިކޮޅު ފިކުރާއި ހިލާލު ފާޅު ކުރުމުގ މިނިވަންކަމާ ދެކޮޅަށް ވެސް ދަނީ ގިނަ ކަންކަން ހިންގަމުންނެވެ. އެގޮތުން އަންހެން އެކްޓިވިސްޓުންނާއި، ޝެއިހުންނާއި ނޫސްވެރިން އަދި ޝާހީ އާއިލާގެ ބައެއް މެމްބަރުން ވެސް ހައްޔަރުކޮށްފައި ވެ އެވެ.
